Կարեն Եսայանի սպանության քրեական գործի չբացահայտված դրվագներից մեկն էլ վերջինիս մեքենայի վրա նախաքննության ընթացքում հայտնաբերված մատնահետքերն են, որոնք, ինչպես պարզ է դառնում հրապարակված դատական նյութերից, կոնկրետ հասցեատեր չունեն: Նախորդ նիստերի ժամանակ ավտոլվացման կետի աշխատակիցները, ովքեր դատարանում հարցաքննվել էին որպես վկաներ, պատասխանելով կողմերի հարցերին, նշել էին, որ սպանվածի մեքենան դեպքի օրն իրենք շատ լավ լվացել և սրբել են: Դատաքննության ժամանակ նրանք պնդեցին, որ Եսայանի մեքենային դրանից հետո որևէ մեկը ձեռք չի տվել:

Առավոտյան Կարեն Եսայանը եկել և տարել է մեքենան: Ըստ մեղադրանքի՝ Կարեն Եսայանը, մեքենայով դուրս գալով ավտոլվացման կետից, հետագայում իր մեքենան նստած անձի հետ անմիջապես ուղևորվել է այն վայրը, որտեղ էլ և սպանվել է: Դիակը հայտանբերելուց հետո՝ դեպքի վայրում ոստիկանների կողմից տեղազննություն կատարելու ժամանակ, մեքենայի վրա հայտնաբերվել են մատնահետքեր: Ինչպես կարգն է, դրանք ուղարկվել են փորձաքննության:

Պարզվել է, որ մեքենայի վրա հայտնաբերված մատնահետքերը չեն պատկանում ոչ ավտոլվացման կետի աշխատակիցներին, ոչ Կարեն Եսայանին և ոչ էլ ամբաստանյալ Հարություն Սարգսյանին: «Ակնհայտ է, որ դրանք պատկանում են Եսայանին սպանած անձին»,- հայտարարեց փաստաբան Լուսինե Սահակյանը:

Եսայանին սպանել են՝ կրակելով աչքին: Մեքենայի մեջ՝ վարորդի նստարանից աջ գտնվող հատվածում, հայտնաբերվել են արյան հետքեր: Սակայն, ինչպես պնդում է ամբաստանյալի փաստաբանը, իր պաշտպանյալի հագուստի վրա չեն հայտնաբերվել ոչ արյան հետք, ոչ կրակոցի արգասիքներ:

«Եթե անձը կրակել է, ապա նշված հետքերը նրա հագուստի և մարմնի վրա պիտի հայտնաբերվեին,- նկատեց փաստաբանը,- սակայն դրանք Հարությունի վրա չեն հայտնաբերվել: Որևէ հետք չի հայտանբերվել նաև իմ պաշտպանյալի մեքենայում: Հարությունի հագուստի և մարմնի վրա չեն հայտնաբերվել զենքի կրման հետքեր: Եթե անձը զենք է կրել, ապա գոնե քսայուղի հետք կմնար հագուստին: Եթե Հարություն Սարգսյանն այն անձն է, ով նստել է մեքենան, ապա պիտի իր հետ կրեր նաև զենքը, և հետքեր կմնային անպատճառ»:

Սպանության գործիքն, ըստ քրեական գործի, որսորդական հրացան է եղել, որն անգամ կարճեցված փողի դեպքում, ի տարբերություն ատրճանակի, հնարավոր չէ հագուստի տակ այնպես թաքցնել, որ չնկատվի: Բացի դրանից՝ կրակոցից հետո զենքի վրա մնում են արգասիքներ: Եթե մարդասպանը գործն ավարտելուց հետո զենքը թաքցրել է հագուստի տակ, ապա հագուստի ներսի հատվածում պիտի առկա լինեին այդ արգասիքները: Այնինչ փորձաքննությունը նման արգասիքներ չի հայտնաբերել Հարություն Սարգսյանի ոչ հագուստի, ոչ մարմնի վրա: Հետագայում՝ Սարգսյանների տան խուզարկության ժամանակ, լվացքի միջից հայտնաբերվել է Հարություն Սարգսյանի հագուստներից մեկը, որի վրա եղել են կապարի հետքեր: Այս կապակցությամբ, դեռ նախորդ նիստերից մեկի ժամանակ նշվել էր, որ հագուստն ամբաստանյալը կրել է, երբ մեքենայի ավտոմասեր է քանդել-հավաքել, իսկ դրանից հետո հնարավոր է՝ քսայուղի հետքեր մնացած լինեն տաբատի վրա:

Մեղադրող Արմեն Մարուխյանը փաստաբանի մատնահետքերի վերաբերյալ եզրակացությունը համարեց ենթադրություն, որին ի պատասխան՝ Լուսինե Սահակյանը նշեց, որ իր ասածն ընդամենը պարզ տրամաբանություն է:

Օգոստոսի 13-ի դատական նիստում քննարկվեց նաև պաշտպանական կողմի միջնորդությունը՝ վկաներից 1994թ. ծնված Հակոբ Կարապետյանի նկատմամբ դատաբժշկական, դատահոգեբանական համալիր փորձաքննություն նշանակելու վերաբերյալ: Տուժողի իրավահաջորդի ներկայացուցիչ, փաստաբան Վարդուհի Էլբակյանը հայտարարեց, որ թիվ 3 օժանդակ դպրոցից ուղարկված բնութագիրն ուսումնասիրելուց հետո եկել է այն եզրակացության, որ տղան չունի ծանր մտավոր հետամնացություն: Մեղադրող Արմեն Մարուխյանը ևս հակված էր այս տեսակետին: «Եթե, ինչպես տղայի դասղեկն է գրել բնութագրում, Հակոբն ունի մաթեմատիկական փայլուն գիտելիքներ, ապա չի կարող այս անձը լինել մտավոր ծանր հետամնաց երեխա»,- նշեց մեղադրողը:

Փաստաբան Լուսինե Սահակյանը ներկաներին հիշեցրեց, որ նման հաստատություններում փայլուն գիտելիքները կարող են վերաբերել միայն պարզագույն մաթեմատիկային: «Եթե երեխան գիտի, որ 2-ին գումարած 2 հավասար է 4-ի, սա դեռևս ոչինչ չի ասում նրա գիտելիքների մակարդակի մասին: Այս դպրոցներում բարդագույն բաներ չեն սովորեցնում»,- հավելեց փաստաբանը:

Նա դատարանում հրապարակեց Գյումրիի մտավոր հետամնաց երեխաների համար նախատեսված թիվ 3 օժանդակ դպրոցից ստացած, հոգեբանի և բժշկի եզրակացությունը՝ Հակոբ Կարապետյանի վերաբերյալ: Դրանում նշված էր, որ դպրոցում երեխաները սովորում են գումարել, հանել, հաշվել մինչև 20-ը: Եվ որ իրենց սանը՝ Հակոբ Կարապետյանը, չի փայլում հիշողությամբ: Կամակոր երեխա է, չի սիրում հարցերին պատասխանել, սիրում է միայն լսել: Սովորածը վատ է մտապահում:

«Եթե Հակոբ Կարապետյանը առողջ է, բայց նրան ընդունել են մտավոր թերզարգացած երեխաների համար նախատեսված դպրոց, նշանակում է՝ կատարվել է հանցանք, և պիտի պատժվի այդ դպրոցի տնօրենը: Եթե ուղարկված բնութագիրը համապատասխանում է իսկությանը, և նա տառապում է օլիգոֆրենիայով, ապա Հակոբ Կարապետյանը չէր կարող հարցաքննվել դատարանում, իսկ նախաքննական նրա ցուցմունքը չի կարող դրվել մեղադրական եզրակացության հիմքում»,- հայտարարեց Լուսինե Սահակյանը:

Հիշեցնենք, որ Հակոբ Կարապետյանը միակ վկան էր, ով դատարանում պատմեց, որ սպանության օրը տեսել է Հարությունին ինչ-որ մեքենա նստելիս:

Դատարանը որոշեց բավարարել փաստաբանի միջնորդությունը, որին միացավ նաև մեղադրող կողմը, և գործով վկա Հակոբ Կարապետյանի նկատմամբ նշանակել դատահոգեբանական, դատաբժշկական համալիր փորձաքննություն: