HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արարատ Դավթյան

ՓՊ նախագահի ընտրություններ. Զոհրաբյանի առաջարկած բարեփոխումները

Փաստաբանների պալատի (ՓՊ) նախագահի ընտրություններին ընդառաջ՝ թեկնածուներից Արա Զոհրաբյանը, ՓՊ նախագահի պաշտոնում ընտրվելու դեպքում խոստանում է 2013-2017թթ. իրագործել մի շարք բարեփոխումներ:

Նախընտրական ծրագրում փաստաբան Զոհրաբյանը մասնավորապես խոստանում է ապահովել Պալատի կառավարման եւ գործունեության թափանցիկության բարձր մակարդակ: ՓՊ-ի կառավարման մարմիններից ամենագործունը թերեւս գործադիր մարմինն է՝ Պալատի խորհուրդը, որը կազմված է 12 անդամից: Կարևոր քաղաքականությունը, ավելին՝ կարգապահական պատասխանատվության քաղաքականությունը վարում է հենց այդ խորհուրդը:

«Անկախ նրանից՝ ով կընտրվի պալատի նախագահ, եթե ընտրված նախահագը փաստաբանության առաջընթացի ուղղությունից շեղվեց, ապա խորհուրդը հաստատ կարող է նրան կաշկանդել, որովհետև ունի լուրջ լիազորություններ, կարող է նույնիսկ սահմանել եւ փոփոխել ՓՊ նախագահի աշխատավարձը»,- ասում է Արա Զոհրաբյանը՝ առաջարկելով Պալատի խորհրդի նիստերին առցանց հետեւելու հնարավորություն ընձեռել փաստաբաններին:

Բացի դրանից՝ թեկնածուի նախընտրական ծրագրով նախատեսվում է առնվազն եռամսյակային կտրվածքով Պալատի կայքում տեղադրել ֆինանսական մուտքերի եւ ելքերի ամբողջ հաշվետվությունը: Իսկ ՓՊ-ի հիմնական մուտքերը գոյանում են փաստաբանների անդամավճարից (ամսական 5000 դրամ): Պալատն այսօր ունի 1300-ից ավելի գործող փաստաբան:

Զոհրաբյանը նաեւ առաջարկում է Պալատում նախատեսվող գործուղումների (տեղական և արտասահմանյան) թափանցիկության ապահովում եւ համապատասխան մեխանիզմների մշակում, որպեսզի բոլոր փաստաբաններն իմանան, թե ովքեր են գնում գործուղման եւ վերջիններս ինչպես են ընտրվում:

Ինչ վերաբերում է փաստաբանների իրավունքների պաշտպանությանը, Արա Զոհրաբյանն առաջարկում է ՓՊ-ին ստեղծել մասնագիտական կառույց՝ փաստաբանների իրավունքների պաշտպանության հանձնաժողով:

«Հարկ եմ համարում նշել, որ հնչեցված տեսակետը, թե ՓՊ-ն գործընկերների կողքին չի կանգնում, իրականությանը չի համապատասխանում: Ունենք բազմաթիվ դեպքեր՝ Մուշեղ Շուշանյան, Ստեփան Ոսկանյան, Թամարա Յալոյան... Մեր գործընկերների հետ կապված ցանկացած միջոցառման ՓՊ-ն արձագանքնել եւ արձագանքում է: Իհարկե, տպավորություն ստեղծվեց, որ Պալատը պարտավոր է պաշտպանել իր բոլոր փաստաբաններին: Բայց ՓՊ-ն չի կարող պաշտպանել այն փաստաբանին, ով իր վստահորդին խաբում է: Հակառակը, կարծում եմ՝ Պալատը պետք է օբյեկտիվ լինի, եւ եթե մենք ինքներս մեզանից չպահանջենք, հետո ինչպես ենք պահանջելու, օրինակ, դատավորներից: Եթե ինքներս դիմում ենք, որպեսզի դատավորին կարգապահական պատասխանատվության ենթարկեն, ինքներս էլ մեր հանդեպ պետք է ազնիվ լինենք»,- ասաց Ա. Զոհրաբյանը:

Ըստ նրա՝ քիչ չեն դեպքերը, երբ պետական մարմինները փաստաբանների նկատմամբ ճնշումներ են գործադրում: ՓՊ-ն էլ շատ դեպքերում տեսնելով, որ, օրինակ, փաստաբանի նկատմամբ կարգապահական վարույթ հարուցելու միջնորդության նպատակը փաստաբանին «խեղճացնելն» է, միանշանակ իր վերաբերմունքն արտահայտում է. «Մենք շատ ունենք այդպիսի դեպքեր, երբ Պալատի խորհուրդը կարճել է հարուցված կարգապահական վարույթները, թեեւ ձեւականորեն խախտման առերեւույթ հատկանիշներ եղել են»:

Անդրադառնալով փաստաբան Արգիշտի Կիվիրյանի հետ կատարվածին՝ բանախոսը դատապարտեց այն՝ շեշտելով, որ «հավասարության եւ համաչափության սկզբունքը պետք է ոստիկանության կողմից անպայման պահպանվի»:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter