Առջեւում Փաստաբանների պալատի նախագահի ընտրություններն են: Թեկնածուներից Արա Զոհրաբյանն ուշադրություն է սեւեռում մի կարեւոր հանգամանքի վրա. քրեական գործերով նախաքննության ժամանակ որոշ քննչական գործողությունների պետք է պարտադիր մասնակցեն ընթերականեր: Սակայն շատ են դեպքերը, երբ որոշ անձինք ընթերակա են «մշտական հիմունքերով», կամ էլ իրավապահները որպես ընթերակա նշում են հորինված անձանց տվյալներ. նման մարդիկ իրականում չկան:

«Հիմա առաջարկում ենք ՓՊ-ի կայքում ստեղծել ընթերակաների բազա: Յուրաքանչյուր փաստաբան իր գործով ընթերակայի տվյալները կգրանցի ընդհանուր բազայում: Հետագայում, օրինակ, մեկի գործով, եթե փաստաբանը կուզենա ճշտել Պողոս Պողոսյան ընթերակայի տվյալները, ուղղակի այդ անունը կայքում փնտրելով՝ կտեսնի, որ, ասենք, այդ մարդը բոլոր թմրամիջոցներով կապված գործերով ընթերակա է: Ժամերն էլ կֆիքսենք. եղել են դեպքեր, երբ նույն մարդը նույն ժամին տարբեր տեղեր որպես ընթերակա է մասնակցել: Սրանով համապատասխան պայմաններ կստեղծվեն, որպեսզի փաստաբաններն իրենց վստահորդի շահերն ավելի արդյունավետ պաշտպանեն»,- ասում է Փաստաբանների պալատի նախագահի թեկնածու Արա Զոհրաբյանը: