ՀՀ նախագահ Պարոն Սերժ Սարգսյանին,  գլխավոր դատախազ պարոն Գ.  Կոստանյանին, ոստիկանապետ պարոն Վ. Գասպարյանին

ԲԱՑ ՆԱՄԱԿ

Հարգելի պարոն Նախագահ, հարգելի պարոնայք

Սույն բաց նամակը հղում եմ Ձեզ` նպատակ ունենալով վերականգնել արդարությունը և թույլ չտալ, որ Հայ ժողովրդի մեծանուն զավակ՝օպերային հայտի մենակատար՝ Շարա Տալյանի թոռնուհի` Ռուզաննա Միքայելի Բաբաջանյանը, մուրացիկի կարգավիճակում շրջի Երևանի փողոցներում:

Ես հանդիսացել եմ Շարա Տալյանի դստեր`Լուսյա Շարայի Տալյանի ընտանիքի բարեկամը և վերջերս մամուլից տեղեկացա,որ նրա միակ դուստրը` Ռ. Բաբաջանյանը, ունենալով սեփականության իրավունքով  իր անունով գրանցված Երևանի Ղ. Փարպեցի 9 ա շենքի 12 բնակարանը չի կարողանում մուտք գործել իր բնակարան, քանի որ այ ն զբաղեցնում է Լևոն  Ջամհարյանի ընտանիքը և թույլ չի տալիս Ռուզաննա Բաբաջանյանին մուտք գործել իր բնակարան:

Ռ. Բաբաջանյանը հանդիսացել է նշված բնակարանի 1/3 մասի սեփականատեր: Ծնողների մահից հետո նա ժառանգել է   նրանց պատկանող 1/3-ական բաժինները և գրանցել իր սեփականության իրավունքը ամբողջ բնակարանի նկատմամբ: Սակայն 2012 թ. ապրիլի 2-ին նրան հայտնի է դարձել, որ  Լ.Ժամհարյանի անչափահաս որդին` Ա. Ժամհարյանը Լ.Շ.Տալյանի անկողնային հիվանդ և անօգնական վիճակում գտնվելու ընթացքում՝ 2007 թ.ի մարտի 3-ին,  իբրև թե նվեր է ստացել այդ բնակարանը Լ. Շ. Տալյանից:

Նվիրատվության պայմանագիրը կնքվել է օրենքների բազմաթիվ կոպիտ խախտումներով, այդ թվում խաբեության, բռնության, սպառնալիքի ազդեցության ներքո:

2007 թ. մարտի 3-ին նախորդող և հաջորդող ժամանակահատվածում Ա. Լ. Ժամհարյանի օրինական ներկայացուցիչ` Լ. Ժամհարյանի կողմից արգելվել է Լ. Շ.Տալյանին շփումներ ունենալ արտաքին աշխարհի հետ: Լ. Շ. Տալյանը կոտրվածքներով պառկած է եղել տանը: Իսկ Լ.Ժամհարյանը արգելել է հարևաններին մուտք գործել բնակարան և զրուցել վերջինիս հետ: Նախկինում Լ. Շ. Տալյանը իր հարևան` բնակչուհի Ի.Ս. Ս. Մավյանին հայտնել էր, որ Լ.Ժամհարյանը  հեռավոր ազգական է և ինքը անհանգստացած է, որ նա իրենց բնակարանի վրա աչք ունի և իր աղջիկը կարող է մնալ առանց բնակարանի: Ի. Ս. Ս. Մավյանը 2007 թ. դիմել է թաղային ոստիկանին, հայտնելով, որ արգելում են իրեն  հանդիպել  Լ. Շ. Տալյանի հետ և կարծում է, որ նրան պահում են գերության մեջ: Խնդրել է ոստիկանին այցելել Լ. Շ. Տալյանին, միայնակ մնալ նրա հետ  և պարզել վերջինիս վիճակը: Ոստիկանը Ի. Ս. Ս. Մավյանին հայտնել է, որ ինքը այցելել է  Լ. Շ. Տալյանին, վերջինս պառկած է, իրենց միայնակ չեն թողե, ոնց որ լավ է:

Մի քանի ամիս անց 2008 թ. փետրվարին Լ. Շ.Տալյանը մահացել է:

Ռ. Բաբաջանյանը հանդիսանում էր Լ.Շ. Տալյանի միակ ժառանգորդը : 1999 թվականի կտակի  համաձայն իր մահից հետո իրեն պատկանող գույքն ամբողջությամբ,  այդ թվում նաև Երևանի Ղ. Փարպեցու 9ա շենքի 12 բնակարանը Լ Շ Տալյանը կտակել է Ռ. Բաբաջանյանին: Կտակի մեկ օրինակը թողել էր իր մտերիմներից մեկի` Երևանի Հր.Ներսիսյան 8շ 12 բն. բնակչուհի Անուշ Հովհաննիսյանի մոտ:  Վերջինս հայտնել է Ռ. Բաբաջանյանին, որ  Լ. Ժամհարյանի պահանջով ինքը կտակի օրինակը տվել է նրան: Ինքը հաղթահարելով Ժամհարյանների դիմադրությունը մի կերպ հիվանդանոցում հանդիպել է Լ. Շ. Տալյանին, սակայն Ժամհարյանների ներկայությամբ: Լ.Շ.Տալյանը վիրահատության կարիք ուներ, սակայն Ժամհարյանները չեն համաձայնվել, որ վիրահատվի և նա մի քանի ամիս անց մահացել է:

Իր միակ ժառանգին ժառանգությունից զրկելու և իր ժառանգական գույքը մեկ այլ անձի նվիրելու Լ.Շ. Տալյանի կամքի արտահայտությունը ազատ չի եղել, քանի որ նա պառկած է եղել անօգնական` կտրված արտաքին աշխարհից, իսկ պայմանագրի կնքման պահին Լ. Շ. Տալյանի կողմից որևէ մեկը ներկա չի եղել, ավելին` պայմանագրի կնքման պահին ներկա է եղել վկա` Սուքիասյան Աստղիկը. բնակվող Երևան Սարյան 24 ա շենք բն 23. ով հանդիսացել է` Ա.Լ. Ժամհարյանի և նրա ընտանիքի հարևանը:  Անչափահաս` Ա. Լ. Ժամհարյանը իր ընտանիքի հետ հաշվառված է Ք. Երևան Սարյան 24ա շենք 27 բն.:

Լ. Ժամհարյանը ծրագրված մեկուսացրել է Լ. Շ. Տալյանին. նրան պահել անազատության մեջ և վերջինս այդ գործարքը կնքել է խաբեության, սպառնալիքի և բռնության ազդեցության տակ:

Ներկայումս Ռ. Բաբաջանյանը դիմել է դատական պաշտպանության, սակայն Կենտրոն և Նորք Մարաշ Վարչական շրջանների ընդհանուր իրավասության դատարանի դատավոր Ռուբեն Ափինյանը ծաղրում է, կատակի է վերածում դատական նիստը:

Առկա է երկու կադաստրային գործ նույն բնակարանի նկատմամբ: Գրանցված է երկու անձի սեփականության իրավունք:

Ռ. Բաբաջանյանը կիրթ է, ռոմանտիկ խառնվածք ունի,  բանաստեղծություններ է գրում, նկարում  է: Նա միայնակ է, անօգնական և անօթևան: Որպես ընտանիքի բարեկամ  և հայ մարդ իմ պարտքն եմ համարում Ձեզանից օգնություն հայցել նրա խախտված իրավունքների վերականգնման համար: Կարծում եմ, պետք է քրեական գործ հարուցվի պարզելու համար թե ինչու  են Լ.Շ. Տալյանին պահել անազատության մեջ և ինչպես է Լ. Ժամհարյանի անչափահաս որդին` Ա.Ժամհարյանը  Լ. Շ. Տալյանի անկողնային  հիվանդ և  անօգնական վիճակում գտնվելու ընթացքում, իբրև թե նվեր ստացել այդ բնակարանը Լ. Շ. Տալյանից:

Օգնենք Շարա Տալյանի թոռնուհուն:

Հարգանքով,

դոցենտ, ՀՀ Ազգային Ակադեմիայի ավագ գիտաշխատող

Ռեմ Ղազանջյան