ՈՒրբաթ, 17 նոյեմբերի

Տնտեսագիտական համալսարանն ու բրիտանական «Globe Education (GB) LTD» կազմակերպությունը համատեղ բիզնես դպրոց են հիմնում



Հայաստանի պետական տնտեսագիտական համալսարանն ու բրիտանական «Globe Education (GB) LTD» սահմանափակ պատասխանատվությամբ ընկերությունը համատեղ կհիմնադրեն «Հայաստանում բրիտանական բիզնես դպրոց» ՓԲԸ: Այս որոշումը ՀՀ Կառավարությունն ընդունել է այսօր կայացած նիստում:

Համատեղ բիզնես դպրոց ստեղծելու նախաձեռնությանը նախորդել են փոխադարձ այցեր: ՀՊՏՀ ռեկտոր Կորյուն Աթոյանի գլխավորությամբ աշխատանքային խումբը եղել է Լոնդոնում, որից հետո նշված կազմակերպության ներկայացուցիչները եկել են Հայաստան՝ հանդիպել Տնտեսագիտական համալսարանի ռեկտորի հետ, ծանոթացել համալսարանի կարողություններին ու հնարավորություններին, ստացել դրական տպավորություններ:

«Շուրջ մեկ տարի է` բանակցում ենք «Globe Education (GB) LTD» կազմակերպության հետ և ուրախալի է, որ այսօր Կառավարությունը թույլատրեց մեզ կյանքի կոչել համատեղ կրթական ծրագիր իրականացնելու շուրջ ձեռքբերված փոխհամաձայնությունը, այն է՝  իրականացնելու  մագիստրոսական ծրագիր: Այս նախագիծը կարևոր է Հայաստանի համար, քանի որ նման բիզնես դպրոց հիմնելով մենք հենց Հայաստանում միջազգային կրթություն ստանալու հնարավորություն ենք ընձեռում ոչ միայն մեր երկրի քաղաքացիներին, այլև տարածաշրջանի ուսանողների ն: Սա Հայաստանի կրթական համակարգի հեղինակության բարձրացմանը միտված լուրջ քայլ է և հավակնոտ ծրագիր»,- ծրագրի մասին ՀՊՏՀ Լրատվության և հասարակայնության հետ կապերի բաժնի տարածած մամլո հաղորդագրութան մեջ նշել է ՀՊՏՀ ռեկտոր Կորյուն Աթոյանը:

«Globe Education (GB) LTD»-ի գործընկերները 4 բրիտանական բուհեր են, որոնցից Հայաստանի պետական տնտեսագիտական համալսարանի հետ համագործակցելու է Քարդիֆի Մետրոպոլիտեն համալսարանը: Համատեղ բիզնես դպրոցի մագիստրոսական ծրագիրն իրականացվելու է անգլերենով՝ «Globe Education (GB) LTD»-ի ծրագրով, որը նախատեսում է 6 պարտադիր մոդուլներ և 2 ընտրովի, որոնք հնարավոր է ընտրել 3 հնարավոր մոդուլներից: Ուսանողին հնարավորություն է տրվում նաև ընտրել ավարտական աշխատանքը, որը կարող է լինել մագիստրոսական թեզ, ուսումնասիրություն կամ բիզնես պլանի մշակում: Հեռակա դասընթացը նախատեսվում է անցկացնել վեց շաբաթը մեկ՝ 3 օրով՝ ուրբաթ երեկոյան, շաբաթ և կիրակի օրերն ամբողջությամբ, որից հետո ուսանողը կունենան 6 շաբաթ ժամանակ՝ տվյալ մոդուլի կուրսային աշխատանքի ներկայացման համար: Դասախոսական անձնակազմի զգալի մասը կլինեն «Globe Education (GB) LTD»-ի դասախոսներ: Ուսումնառության 18 ամիսների ընթացքում ուսման վարձը համատեղ բիզնես դպրոցում վճարած ուսանողը հնարավորություն է ստանում մոդուլներից ցանկացածի ընթացքում ընդգրկվել «Globe Education (GB) LTD»-ի որևէ մասնաճյուղում, որոնք գտնվում են Լոնդոնում, Բելգրադում, Կուալա Լամպուրում, Հոնգ Կոնգում և այլն:

Համատեղ ծրագրի իրականացման արդյունքում կողմերը նախնական բանավոր համաձայնության են եկել, որ «Globe Education (GB) LTD» ընկերությունը կապահովի գրադարանային ռեսուրսներով կտրամադրի հասանելիություն իր էլեկտրոնային ցանցին: Ծրագրի իրականացման համար տնտեսագիտական համալսարանն անհատույց կտրամադրի 275 քառակուսի մետր տարածք:

 


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ