Երկուշաբթի, 25 սեպտեմբերի

Օֆշորային սկանդալի «պատահականությունների» շղթան



Վարչապետն անընդհատ ասում է, որ ինքը Կիպրոսում չի եղել, բայց մենք երբեւէ ասե՞լ ենք, թե վարչապետը եղել է Կիպրոսում, կամ ի՞նչ նշանակություն ունի նրա՝ Կիպրոսում լինել-չլինելը, մյուս բաժնետեր Նավասարդ Կճոյանն էլ եղել է Կիպրոսում, դրանից ինչ- որ բան փոխվո՞ւմ է:

Վարչապետը եւ նրա թիմակիցները անընդհատ «Հետքին» ուզում են տեղափոխել իրենց քաղաքական խարդավանքերի դաշտը: Մի ժամանակ Հովիկ Աբրահամյանի հետ փորձեցին կապել մեզ, հետո էլ՝ Վարդան Օսկանյանի հետ: Ես մի անգամ էլ եմ ասում, որ դրանք զուր ջանքեր են, մենք քաղաքական խաղերի մեջ չկանք: Մեզ չեն հետաքրքրում վարչապետի հարաբերությունները Հովիկ Աբրահամյանի, Գագիկ Ծառուկյանի, դաշնակցականների, մնացած օլիգարխների, այս կամ այն խմբագրի, լրագրողների հետ: Դա ձեր խաղն է, խաղացեք՝ ինչպես եւ ինչքան ուզում եք, խաղընկեր դարձրեք ում ուզում եք:

«Ես հանդիսացել եմ Հայ Առաքելական Եկեղեցու Արարատյան թեմի Սուրբ Սարգիս եկեղեցու ջրօրհնեքի խաչքավորը, ատենապետը հանդիսանում է Տիգրան Սարգսյանը, իսկ թեմի առաջնորդը՝ սրբազան Կճոյանը: Ուզում եմ անդրադառնալ օֆշորային կազմակերպությանը՝ WLISPERA HOLDINGS LIMITED: Նախ ասեմ, որ այս կազմակերպության հիմնադիրը ես եմ և ես եմ բաժնեմասեր գրել Տ. Սարգսյանի և Ն. Կճոյանի անուններով՝ առանց նրանց գիտության և առանց նրանց համաձայնության: Դա արել եմ նրա համար, որպեսզի իմ բիզնեսը զերծ պահեմ տարբեր ոտնձգություններից: Չեմ գիտակցել, որ այն կարող է հետևանքներ ունենալ»: Այս տողերի հեղինակը ադամանդագործ Աշոտ Սուքիասյանն է: Այս մասին Ա. Սուքիասյանը նշել է ՀՀ գլխավոր դատախազ Աղվան Հովսեփյանին եւ «Հետքի» գրած նամակում

Վարչապետ Տիգրան Սարգսյանը, Արարատյան թեմի առաջնորդ Նավասարդ (Սամվել) Կճոյանը եւ Աշոտ Սուքիասյանը մոտ հարաբերություններ ունեին: Նրանք պարբերաբար հանդիպումեր էին ունենում Աշոտ Սուքիասյանի առանձնատանը, որը գտնվում է Արարատյան թեմի առաջնորդարանի հարեւանությամբ: 

Վարչապետ Տիգրան Սարգսյանը «Հետքի» հրապարակումից հետո հայտարարեց, որ ինքը կապ չունի այդ ընկերության հետ, նույնը հայտարարեց Ն. Կճոյանը: Նրանք հայտարարեցին նաեւ, որ չգիտեն՝ ինչպես են իրենց անունները հայտնվել WLISPERA HOLDINGS LIMITED ընկերության բաժնետերերի մեջ: Եվ ոստիկանությունն արդեն ամիսներ շարունակ փորձում է պարզել՝ արդյոք Կիպրոսի ռեգիստրի փաստաթղթերում առկա՞ է Տիգրան Սարգսյանի ստորագրությունը, թե՞ ոչ: Փորձաքննությունը  չստացվեց, քանի որ նրանք բնօրինակներն են պահանջում, եւ Հայաստանի դատախազությունը դիմել է Կիպրոսի դատախազությանը, որպեսզի վերջինս բնօրինակներն առգրավվի եւ ուղարկի Հայաստան: Կարելի է ենթադրել, որ նման բան չի լինելու, քանի որ Կիպրոսի եւ Հայաստանի դատախազությունների միջեւ ստորագրվել է ընդամենը մի հուշագիր, որը կարծես թե ոչ մի իրավական ուժ չունի: Այսինքն, ըստ այդ հուշագրի՝ Կիպրոսի դատախազությունը որեւէ պարտավորություն չունի այդ գործողությունը կատարելու: Առայսօր չեն հարցաքննվել ո՛չ Տիգրան Սարգսյանը, ո՛չ Նավասարդ Կճոյանը: Վերջինս երկու անգամ եղել է Կիպրոսում հենց Աշոտ Սուքիասյանի հետ (Նավասարդ Կճոյանը հայտարարել է, որ մի անգամ է եղել Կիպրոսում Աշոտ Սուքիասյանի հետ): Մենք պնդում ենք երկու հանդիպումը: Դա ապացուցելու համար ոստիկանությանը մի քանի րոպե է անհրաժեշտ: Բայց քանի որ չկա քաղաքական որոշում, ոստիկանությունը չի անելու:

Չգիտես ինչու՝ թե՛ ոստիկանությունը, թե՛ վարչապետը, թե՛ Կճոյանը, թե՛ Աշոտ Սուքիասյանը խոսում են Կիպրոսում գրանցված միայն մեկ՝ WLISPERA HOLDINGS LIMITED ընկերության մասին: Մինչդեռ խոսքը երկու ընկերությունների մասին է, ընդ որում՝ հիմնական գործարքները կատարվել են երկրորդ ընկերության «A.B.S. GLOBAL LIMITED»-ի միջոցով: Հիշեցնենք, որ «Ամերիաբանկ» ՓԲԸ-ից ստացված վարկային գումարից Աշոտ Սուքիասյանը 9 մլն 370 հազար 450 ԱՄՆ դոլար փոխանցել է «HELLENIC BANK PUBLIK COMPANY»-ում օֆշորային երեք ընկերությունների հաշվեհամարներին: Այդ ընկերություններն են`

  1. «A.B.S. GLOBAL LIMITED» ՍՊԸ-ին` 7 մլն 20 հազար 450 դոլար,
  2. «WLISPERA HOLDINGS LIMITED» ՍՊԸ-ին՝ 350 հազար դոլար,
  3. «STR EMERALD LIMITED» ՍՊԸ-ին՝ 2 մլն դոլար:

«A.B.S. GLOBAL LIMITED» ՍՊԸ-ի հաշվեհամարին Ա. Սուքիասյանը «Ամերիաբանկից» փոխանցել է  7 մլն 20 հազար 450 դոլար: Իսկ այդ ընկերության 66 տոկոս բաժնետերը եղել է  WLISPERA HOLDINGS LIMITED-ը: Այսինքն՝ Աշոտ Սուքիասյանը, Տիգրան Սարգսյանը եւ Նավասարդ Կճոյանը: Եվ այդ ընկերության շրջանառությունը, ըստ մյուս բաժնետերերից մեկի, եղել է 35 մլն դոլար:

Աշոտ Սուքիասյանն այժմ դատական վեճի մեջ է Սիերա Լիոնեում գրանցված «GMC GLOBAL (SL) LIMITED» ընկերության հետ: Վերջինս ունի ադամանդի եւ ոսկու հանքավայրեր: Այս ընկերության սեփականատերերը Աշոտ Սուքիասյանի հրավերով երկու անգամ եղել են Հայաստանում եւ հանդիպել են նաեւ վարչապետ Տիգրան Սարգսյանին: «A.B.S. GLOBAL LIMITED»-ի շահերը դատարանում, ինչպես մի անգամ արդեն նշել ենք, ներկայացնում է Շերմոն Սիսին: Վերջինիս Աշոտ Սուքիասյանը լիազորագիր է տվել «A.B.S. GLOBAL LIMITED»-ի գործերով որպես լիազոր ներկայացուցիչ հանդես գալու: Շերմոն Սիսիի հետ վարչապետ Տիգրան Սարգսյանը եւ Աշոտ Սուքիասյանը Երեւանում՝ կառավարության շենքում, հանդիպել են 2008 թվականի նոյմեբերի 7-ին:

«A.B.S. GLOBAL LIMITED»-ի մնացած 34 տոկոսի բաժնետերերը երեք ընկերություններ են, դրանց բաժնետերերից երկուսը՝ Սերգեյ Տրյուկազյուկն ու Ալեքսանդր Վալչիկովսկին, 2010-ի հուլիսին Երեւանում՝ կառավարության շենքում, հանդիպել են վարչապետ Տիգրան Սարգսյանին:  

«Պատահականությունների» շարքը թափով աճում էր. կառավարությունը որոշում է զարգացնել ադամանդագործությունը Հայաստանում, էկոնոմիկայի նախարար Ներսես Երիցյանը «պատահաբար» իր մոտ է հրավիրում 23 կազմակերպությունների ներկայացուցիչների եւ նրանց ներկայացնում «պատահաբար» իր մոտ գտնվող ադամանդագործ Աշոտ Սուքիասյանին: Ներսես Երիցյանը հետո «պատահաբար» միջնորդում է «Ամերիաբանկի» ղեկավարներին, որ բանկը վարկավորի մի բիզնես ծրագիր: «Ամերիաբանկում» նստում եւ մի «պատահական» բիզնես ծրագիր են գրում: Բանկը որոշում է իր «պատահական գրած» բիզնես ծրագրով 12 մլն դոլար տալ Աշոտ Սուքիասյանին: Գրավադրվեց Փայլակ Հայրապետյանի ամբողջ ունեցվածքը՝ 30 մլն դոլար շուկայական արժեքով: Եվ ահա, միանգամայն «պատահական», այդ գույքն այժմ անցել է «Ամերիաբանկին»:

«Պատահականությունների» այս շարքը մենք չենք հնարել, սրանք սոսկ չոր փաստեր են: Այսքանից հետո ստորագրությունները կուղարկե՞ն փորձաքննության, բնօրինակները կպահանջե՞ն Կիպրոսից, կտա՞ն, թե՞ չեն տա՝ ի՞նչ նշանակություն ունի:  


Գլխավոր էջ


Տես նաև՝

ավելին



Մեկնաբանություններ (6)
1. Վ.Առաքելյան16:36 - 10 հունվարի, 2014
Տեղադրում էս այս երեքի նկարները Ֆոտոշոփ կոչված ծրագրում և ծրագիրը չգիտես ինչու այս երեքին որպես մեկ անձ է ճանաչում, և հետն էլ որպես ,,ավազակ,, ,,կաշառակեր,, մականուններով է մեծարում:
2. HayMard19:10 - 10 հունվարի, 2014
Im hamar amenavriavorakan@ et "ekexecakan"i masnakic lineln e. Mtacum es inch astichani mard petq e lini vor ham ekexecakan lini u voch mi srbutyun chunena. Che vor Astu patgamneri mej e gravac mi goxaci, mi xabi.. Esqanic heto inq@ iren ekexecakan e hamarum. Es @tenc ekexecakan mer@
3. Bulo08:21 - 11 հունվարի, 2014
Mek@ Iranq bolor@ naxagahi glaxavorutuan kpatjven Bolor@
4. Առայժմ15:13 - 11 հունվարի, 2014
Ժողովուրդը լավ խոսք ունի՝ վրան (կամ տակը) բռնվելուց հետո նույնիսկ ասում են - "չէ ես ըտենցը չեմ": Ռուսներն ուրիշ կերպ են նկարագրում անիմաստ ժղտողականությունը - "я ни я, и хата не моя!": Սրանց տեղը լինեի ուղղակի կասեի՝ տո հենց ըտենց էլ կա, փաթթած ունենք բոլորիդ! (Շմայսի նման պարզ ու հասկանալի!) Հավատացած եմ, եթե ասեն էլ ոչինչ չի փոխվելու դրանից - (ԱՌԱՅԺՄ !!!):
5. Արբագ08:46 - 12 հունվարի, 2014
Այս քաջատես այրեր մեծապես կխորհուրդանշին հայաստանի գործուարար, իշխանական եւ հոգեւօր երեք ճիուղերն: Արդիօք որեէ այլ խոսք կրնանք աուելացնիլ տեսանելի դարձնելու համար թե ինչ ահաուօր փտախտին մեջ ընկղմուած է այդ դժբախտ երկիր!!!
6. Gor17:03 - 12 հունվարի, 2014
Ուզում են համոզել, որ Սերժը կապ չունի:Էն մարզպետը, որ հիմա Սերժի հոտ է, նա է կողքինի տեղը մուծելու չգիտե*ք:
Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ