Հասմիկ Կարապետյան

Մարտի 9-ին Տավուշի մարզի Հովք համայնքում տեղի ուենցան համայնքի ղեկավարի և ավագանու ընտրություններ:

Համայնքի ղեկավարի պաշտոնի համար ինքնառաջադրվել էին 2 թեկնածու՝ արդեն 18 տարի նույն պաշտոնը զբաղեցրած Յուրիկ Ցուգունյանը և Գրիգոր Գևորգյանը:

Ավագանու ընտրության համար առաջադրվել էին 6 թեկնածուներ՝  Ծուղունյան Ալբերտ, Կոնջոյան Արտյոմ, Մակունց Մխիթար, Նաղդալյան Արտուշ, Տրուզյան Արամայիս և Օսիպյան Տիգրան:

Արդեն 6 անգամ վերընտրված համայնքապետ ունեցող համայնքում ընտրություններն ընթացան թեժ մթնոլորտում: Համայնքի բնակիչները, ինչպես իրենք էին ասում, րոպե առաջ շտապում էին իրենց «քաղաքացիական պարտքը» կատարել:

Տեղամասում դիտորդների կողմից արձանագրվեց երկու խախտում: Առաջին դեպքում համայնքի բնակիչները հավաքվել էին ընտրատեղամասում, որի վերաբերյալ դիտորդի դիտարկումից հետո հանձնաժողովի նախագահը բնակիչներին խնդրեց պահպանել 50 մետր հեռավորությունը: Երկրորդ դեպքում գործող համայնքապետի վստահված անձը տեղամաս մտնող ընտրողներին ուղղորդում էր և հուշում՝ ում ընտրել: Այս դեպքում դիտորդի նկատառումը ագրեսիվ ընդունվեց, այնուամենայնիվ, վստահված անձն ընտրատեղամասում դադարեցրեց այդ գործողությունները:

Ամբողջ օրվա ընթացքում տեղամասի հարակից տարածքում կայանված էին գործող համայանքապետի աջակիցների մեքենաները, և նրանք կարծես վերահսկում էին բոլոր ընտրողների մուտքն ու ելքը տեղամաս:

Ընտրատեղամասը փակվեց 20:00-ին: 318 ընտրողներից մարտի 9-ին իրենց քաղաքացիական պարտքը կատարեցին 236-ը:

Հանձնաժողովի հաշվարկից հետո հրապարակեց հետևյալ արդյունքները՝

Ծուղունյան Ալբերտ - 45

Կոնջոյան Արտյոմ - 10

Մակունց Մխիթար - 41

Նաղդալյան Արտուշ - 30

 Տրուզյան Արամայիս - 28

 Օսիպյան Տիգրան - 41

Անվավեր – 36

Համայնքի ղեկավարի պաշտոնում 125/99 հարաբերակցությամբ ընտրվեց առաջին անգամ առաջադրված Գրիգոր Գևորգյանը, ՀՀԿ-ական թեկնածու Յուրիկ Ցուգունյանին չհաջողվեց 7-րդ անգամ դառնալ Հովք համայնքի ղեկավար: