Զանգվածային անտառահատումներ՝ Ջիլիզայում
Ջիլիզայի անտառներում սկսվել են զանգվածային հատումներ: Հուլիսի 30-ին Ալավերդի-Ջիլիզա ճանապարհի 20-րդ կմ-ում «Հետքը» հանդիպեց անտառի խորքում կանգնած տրակտորների ու բեռնատարների, որոնց միջոցով անտառից հանվում և տեղափոխվում էին հատված ծառերը:
Ակնհայտ էր, որ փայտը անտառից տեղափոխողները անտառում աշխատում և ծառերը հատում են գիշերով. ցերկվա ժամը 11:00-ին նրանք դեռ քնած էին անտառի խորքի իրենց կացարանում:
Փայտահատները հրաժարվեցին ներկայանալ: «Մենք մասնավոր փայտ կտրողներ ենք, ոչինչ չենք կարող ասել»,- ասացին նրանք:
Անտառի խորքում գտնվող փայտահատների այս խմբից մի փոքր վերև մենք հանդիպեցինք մասնավոր փայտահատների նոր խմբի: Վերջիններս ներկայացան որպես ազնվամորի հավաքողներ, թեև այդ չէին վկայում անտառի եզրին՝ ճանապարհի վրա թափված, նոր հատված փայտակույտը, որը նրանք հսկում էին, «Դրուժբա» մակնիշի ծառահատող մեքենան, որը նրանցից մեկի ձեռքում էր, ինչպես նաև կիսաբեռնված բեռնատարը:
«Եկել ենք մալինա հավաքելու, ձեռքի հետ էլ խորովածի փայտ ենք տանում: Թե կտրում էլ ենք, օրինական ենք կտրում»,- ասացին նրանք, բայց անտառից փայտ տեղափոխելու իրավունքը հաստատող որևէ փաստաթուղթ չներկայացրին:
Փայտահատներից մի տղամարդ ռուսերեն ասաց. «Мы с ведром пришли малину собирать»: Նա ներկայացավ Գամսախուրդիա ազգանունով: Ասաց, որ փայտը և ավտոմեքենան իրենը չեն, թեև Ջիլիզայից մեր վերադարձին արդեն մենակ էր հսկում կիսաբեռնված ու անսարք բեռնատարը:
Նրան խնդրեցինք ցույց տալ ազնվամորու իր դույլերը: «Там в лесу»,- պատասխանեց նա: Ռուսախոսն ասաց, որ Վրաստանից է և Սադախլոյով է եկել Ջիլիզա:
Մենք շրջակայքում չհայտնաբերեցինք հատված փայտի կոճղերը: Փայտահատներն ասացին, թե թափված փայտը անտառի խորքից են բերել, և կոճղերը տեսնելու համար հնարավոր չէ հասնել այնտեղ:
Հուլիսի 30-ին Մադան-Ջիլիզա ճանապարհին հարող անտառների եզրերին կանգնած էին փայտով բեռնված մի քանի այլ բեռնատարներ, որոնց վարորդներին ու փայտի տերերին մեզ չհաջողվեց գտնել:
Կեսօրից հետո Ջիլիզայի մայրուղով դեպի անտառ էին գնում Գյումրիի, Երևանի և Էջմիածնի պետհամարանիշներով նոր ավտոմեքենաներ: «Հայանտառ» ՊՈԱԿ-ի «Ջիլիզայի անտառտնտեսության» որևէ անտառապահի օրը ցերեկով անտառում նույնպես չհաջողվեց հանդիպել:
Այդ օրը Ջիլիզայի անտառները անտեր էին:
Մեկնաբանություններ (8)
Մեկնաբանել