Ալավերդցիները չեն սիրում բնությունը. բնակիչներն աղբը թափում են Դեբեդի ափին
Ալավերդի քաղաքի Էնգելս թաղամասի թիվ 13 շենքի բնակիչներ Գայանե Վարդանյանն ու Սուրեն Հարությունյանը նեղսրտած ցույց տվեցին իրենց շենքի բակում տեղադրված երկու աղբարկղները, որտեղ թափվում են նաև հարևան 4 շենքի բնակիչների կենցաղային աղբը: Աղբարկղները տեղադրված են շենքի բակում գտնվող հանգստի տաղավարի հարևանությամբ:
«Բնակիչները ճիշտ չեն օգտվում աղբարկղներից, բացի այդ աղբարկղները գտնվում են նաև Դեբեդի ափերի հենապատի եզրին: Դրանց բերնեբերան լցվելու դեպքում շատ բնակիչներ աղբը լցնում են հենապատից ներքև, որտեղ գետի ափն է: Երեկոյան տղամարդիկ այս բեսետկայում, գարշահոտության մեջ նարդի կամ շախմատ են խաղում, ամռան շոգին էլ աղբի հոտի պատճառով պատշգամբներում նստել կամ կանգնել հնարավոր չի լինում»,-դժգոհեց տիկին Գայանեն:
«Տղաս մի քանի տարի առաջ է մահացել, նրա հիշատակի համար կառուցել եմ փոքրիկ ցայտաղբյուր, շատ կցանկանայի այս աղբարկղները ցայտաղբյուրի հարևանությամբ չտեսնել»,- ասաց Սուրեն Հարությունյանը ցույց տալով հենապատի երկայնքով բնակիչների կողմից գետի ափերին լցրած կենցաղային աղբը:
Թիվ 13 շենքի բնակիչները գտնում էին, որ աղբարկղները շենքի բակից պետք է տեղափոխել այլ վայր:
«Մեր բնակիչներն էլ չեն հարգում բնությունը, մինչդեռ ամռանը այստեղով անցնել չի լինում»,- ասաց տիկին Գայանեն: Բնակիչներն այն կարծիքին են, որ ժամանակն է պատժել այն բնակիչներին, ովքեր աղբը թափում են գետի ափին:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել