Հին Երևան հյուրանոցային համալիրի դիմացի մուտքի մոտ Լևոն Զուրաբյանը ոստիկանության Երևան քաղաքի վարչության պետ Ներսիկ Նազարյանի հետ բանակցությունից հետո հայտարարեց, որ իրենց թույլ են տվել մտնել Ազատության հրապարակ: Ժողովրդին առաջնորդում է անձամբ Լևոն Տեր-Պետրոսյանը:Ժողովուրդն արդեն աստիճանաբար մտնում է Ազատության հրապարակ` չնայած այն բանին, որ երեխաների համար ատրակցիոն խաղեր են տեղադրված:

Այս պահին «Ժառանգություն» կուսակցության առաջնորդ Րաֆֆի Հովհաննիսյանի մոտ հավաքված բազմությունը վանկարկում է «Րաֆֆի», «Ազատ, անկախ Հայաստան»: Վանկարկումներն ուղեկցվում են ծափահարություններով:

Լևոն Տեր-Պետրոսյանը մոտենում է հարթակին և ձեռքերի շարժումով ողջունում ժողովրդին, ինչպես երեք տարի առաջ` հետընտրական հանրահավաքների ժամանակ:

Հարթակում եմ Ստեփան Դեմիրճյանը, Արամ Սարգսյանը, Լյուդմիլա Սարգսյանը, Հովհաննես Հովհաննիսյանը, Դավիթ Շահնազարյանը, Գագիկ Ջհանգիրյանը, Սմբատ Այվազյանը և այլք:

Մարդիկ շարունակում են վանկարկել «Լևոն, Լևոն», «Պայքար, պայքար մինչև վերջ»:

Լևոն Զուրաբյանը հայտարարեց, որ բոլորով սպասում են մինչև հարթակ բերվի աուդիոտեխնիկան: Նա նաև նշեց, որ թեև իշխանություններն Ազատության հրապարակում դիտմամբ տեղադրել են երեխաների համար ատրակցիոն խաղեր` ընդդիմության հանրահավաքներին խոչընդոտելու համար, այնուամենայնիվ ժողովուրդը պետք է շատ զգույշ լինի, որ հանկարծ այդ ատրակցիոնները չվնասվեն: