Տիգրան Առաքելյանին տարան դատարանից
Քիչ առաջ Կենտրոն եւ Նորք-Մարաշ ընդհանուր իրավասության դատարանից քաղաքացիական մեքենայով անհայտ ուղղությամբ տարան Հայ Ազգային կոնգրեսի երիտասարդ ակտիվիստ Տիգրան Առաքելյանին, ով ձերբակալված է հունիսի 5-ից: Այսօր ոստկանությունը դիմել էր դատարանին` Առաքելյանին կալանելու թույլտվություն ստանալու համար:
Դատարանը, փաստորեն, բավարարել է ոստիկանության խնդրանքը, քանի որ Տիգրան Առաքելյանը ազատ չի արձակվել դատարանի դահլիճից: Նշենք, որ դատարանը որոշումը կայացրել է դռնփակ դահլիճում:
Հիշեցնենք, որ Տիգրան Առաքելյանը ձերբակալվել էր հուլիսի 1-ին Երեւանի կենտրոնում տեղի ունեցած միջադեպից հետո: Այդ օրը ՀԱԿ-ի երիտասարդները թռուցիկներ են տարածել հուլիսի 2-ի հանրահավաքի վերաբերյալ: Աբովյան փողոցում երիտասարդները բախվել են ոստիկանների հետ:
ՀԱԿ-ը հայտարարել էր, որ ոստիկաններն են ծեծի ենթարկել Տիգրան Առաքելյանին եւ մի քանի այլ ակտիվիստների, որոնք տեղափոխվել էին հիվանդանոց:
Կատարվածի վերաբերյալ ոստիկանները հաղորդագրություն էին տարածել, որտեղ նշված էր, թե Տիգրան Առաքելյանն է ծեծի ենթարկել քաղաքացիական հագուստով ոստիկանին:
Հուլիսի 5-ին Տիգրանը ձերբակալվել է, նա կասկածվում է Քրեական օրենսգրքի 258-րդ հոդվածի 3-րդ մասի 2-րդ կետի հատկանիշներով, այն է` «խուլիգանություն, որը զուգորդվել է իշխանության ներկայացուցչին կամ հասարակական կարգի պահպանության պարտականություն իրականացնող անձին դիմադրություն ցույց տալով»:
Նշենք, որ ի պաշտպանություն Տիգրան Առաքելյանի երեկվանից անժամկետ հացադուլ է հայտարարել ՀՀՇ երիտասարդական թեւի ղեկավար Կարեն Կարապետյանը, որին այսօր միացել են եւս մի քանի երիտասարդներ:
«Եթե Տիգրան ազատ չարձակեն, մենք կդիմենք Հայաստանում օտարերկրյա դեսպանատներին, նաեւ միջազգային կառույցներին»,- «Հետքի» հետ զրույցում ասաց Կարեն Կարապետյանը: Նա կոչ արեց բոլոր ուսանողական միության նախագահներին իրենց բողոքի ձայնը բարձրացնել հանուն երիտասարդի ազատության:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել