Կենցաղային աղբն ու արտադրական թափոնները փչացնում են Լոռու բնությունը
Լոռու անկրկնելի բնությանը անողոք վնասներ են պատճառում ոչ միայն Ալավերդու պղնձաձուլական գործարանի արտանետումներն ու տարածաշրջանում հանքարդյունաբերական գործարանների պոչամբարները, այլև ամենուր թափված կենցաղային աղբակույտերը, որոնք երբևէ սանիտարական մշակման չեն ենթարկվում:
Լոռու մարզի Թումանյանի տարածաշրջանի 31 համայնքներից ոչ մեկը չունի օրինական աղբավայր: Համայնքապետարանները կենցաղային աղբը կուտակում են՝ որտեղ պատահի: Ալավերդու համայնքապետարանն, օրինակ, այն լցնում է Դեբեդ գետը: Նկարում պատկերված Ախթալա համայնքին պատկանող աղբի ավտոմեքենայի վարորդը սեպտեմբերի 22-ին մեզ հավաստիացնում էր, որ Ախթալայից Շամլուղ քաղաք թեքվող ճանապարհաեզրի աղբակույտերը թափվել են Ախթալայի «Մեթըլ Փրինս» ընկերության կողմից:
Վարորդը, անշուշտ, ճիշտ էր ասում, քանի որ այստեղ լցված էին մեծ քանակությամբ արտադրական թափոններ, սակայն տարածքը զերծ չէր նաև կենցաղային աղբից: Իր ասածը հիմնավորելու համար վարորդը նաև մեզ ասաց, որ Ախթալայի համայնքապետարանը, իր վարած ավտոմեքենայով, Ախթալա համայնքի կենցաղային աղբը Դեբեդ գետի Ալավերդու նախկին շինվարչության շենքի դիմացի հատվածից լցնում է գետը: Դա ճիշտ նույն վայրն է, որտեղից բնակչության կենցաղային աղբը օրական մի քանի անգամ գետն են լցնում Ալավերդու քաղաքապետարանի «Բարեկարգում» ՍՊԸ-ի աղբի ավտոմեքենաները:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել