«Հետք»-ի մայիսի 26-ի համարում հրապարակվել էր «Քաղաքապետը մսխում է բյուջեի փողերը» հոդվածը (այն արտատպել է նաեւ «168 ժամ» թերթը), որտեղ ներկայացված փաստերի վերաբերյալ ՀՀ վարչապետի վերահսկողական ծառայությունը ուսումնասիրություն էր սկսել( Քաղաքապետը չի՞ մսխում բյուջեի փողերը):

Սակայն այդ ուսումնասիրությունը զավեշտի է վերածվել: Պարզվում է` իր ուսումնասիրության արդյունքների մասին ծառայությունը «տեղեկացրել է համայնքի ավագանուն, լսել է ավագանու անդամների կարծիքը` ավագանու արտահերթ նիստում»: Ավագանու անդամներ Գագիկ Էվոյանը եւ Հակոբ Ճուղուրյանը մեզ հայտնեցին, որ գվագանու անդամների մեծ մասը չէգ կարդացել հոդվածը եւ չէգ տեսել գերեզմանոցի բարեկարգման շինարարության պատկերը: «Այդ պատճառով առաջարկել ենք հարցի անաչառ քննարկման համար նիստին հրավիրել հոդվածի հեղինակին, որը վերահսկողության ծառայության աշխատակիցների կողմից շրջանցվել է»: Ավագանու անդամ, մասնագիտությամբ բժիշկ Սիմոն Զախարովն էլ ասաց. «Նիստում մեզ տեղեկացրին, որ գերեզմանոցի բարեկարգման համար կառավարության կողմից հատկացված 40 մլն դրամից 20 մլն դրամով գնվել է գերեզմանոցի հողատարածքը, 20 մլն դրամով էլ բարեկարգվել է գերեզմանոցը»: Հիշեցնենք, որ կառավարության կողմից գերեզմանոցի բարեկարգման համար հատկացված 41, 8 մլն դրամի մեջ հողատարածքի գնման 20 մլն դրամը չի մտնում: Թե նիստում իրենց չտեսածի ու չիմացածի մասին ի՞նչ կարծիքներ կարող էին հայտնել ավագանու անդամները վարչապետի վերահսկողության ծառայության աշխատակիցներին, եւ դա ի՞նչ քննարկում կարող էր լինել, հետեւությունը թողնում ենք ընթեցողին: Ուսումնասիրության մեջ նշվում է, որ հոդվածում հրապարակվել են բազմաթիվ «անճշտություններով փաստեր», եւ որպես այդպիսին նշվում է. «Նշված 20 մլն դրամը (խոսքը վերաբերում է գերեզմանոցի հողատարածքի գնման գումարին-Լ. Փ.) քաղաքապետարանը ձեռք է բերել «Արմենիան Քափըր Փրոգրամ» ընկերությանը նախկինում սպասարկման համար հատկացված հողամասից 2,4491 հա հողամաս օտարելու դիմաց», ապա շարունակում. ««Մադան» թաղամասից «Էյ- Սի-Փի» ընկերությանը ոչ մի հողատարածք չի վաճառվել, ինչպես պնդում է հոդվածագիրը»: Վերահսկողական ծառայության աշխատակիցներին տեղեկացնենք, որ «Արմենիան Քափըր Փրոգրամ»-ը եւ «Էյ-Սի-Փի»-ն երկու տարբեր ընկերություններ չեն, ««Էյ-Սի-Փի» անվանումը «Արմենիան Քափըր Փրոգրամ»-ի` անգլերեն տարբերակի հապավումն է` ACP: Վերահսկողական ծառայությունը նաեւ տեղեկացնում է, որ գերեզմանատան բարեկարգման մրցույթում հաղթող ճանաչված «Բազմաշող» ՍՊԸ-ն, Ալավերդու քաղաքապետարանի հետ կնքած պայմանագրի համաձայն, հիշյալ տարածքում, ըստ կատարողականի, իրականացրել է 41,8մլն դրամի աշխատանքներ (ներառյալ ԱԱՀ-ն, շահույթը եւ վերադիր ծախսերը), այդ թվում` 9 մլն 643,5 հազար դրամ արժողությամբ շինություն` արարողակարգային ծառայությունների մատուցման համար, 13,8մլն դրամի ասֆալտապատում եւ 18,4 մլն դրամ ցանկապատում: «Այսինքն` նախատեսված գումարից 13 մլն դրամ ծախսած լինելու մասին հոդվածագրի պնդումը իրականությանը չի համապատասխանում»: 

Հրապարակված այս թվերը գերեզմանոցում փաստացի կատարված աշխատանքների համեմատ էլ ավելի տխուր իրողություն են հաստատում, օրինակ` այն, որ հատկացված 41,8 մլն դրամը ոչ միայն ամբողջությամբ չի ծախսվել, այլ գերեզմանոցում լվացվել է, 18,4 մլն դրամով, որը կազմում է 58 հազար դոլար, ցանկության դեպքում կարելի էր ոչ թե հնամաշ ցանցով շրջափակել գերեզմանոցը, այն էլ` այդ որակով, այլ քարե գեղեցիկ պարիսպներով: Վերահսկողական ծառայությունը շրջանցել է հոդվածում բարձրացված այն խնդիրը, թե ում է պատկանում բարեկարգման գումարների հաշվին գերեզմանոցում մահվան արարողակարգային ծառայության շինության կառուցման որոշումը` քաղաքապետի՞ն, թե՞ ավագանուն: Ավագանու անդամ Գագիկ Էվոյանը մեզ հայտնեց, որ այդ շինության կառուցման հարցն ավագանու նիստում չի քննարկվել:

Քաղաքապետի պաշտոնը մեր երկրում բիզնես է: Քաղաքապետ Արթուր Նալբանդյանը, որն իր ձեռքում է կենտրոնացրել քաղաքի ներհամայնքային ավտոբուսային տրանսպորտը, զրկելով քաղաքի բոլոր մթերային խանութներին համայնքի բյուջեից օգտվելու հնարավորությունից, առանց մրցույթի, 2008 թ. շուրջ 40 մլն դրամի գնումներ է կատարում իրեն եւ Տարոն Աբգարյանին պատկանող «Կատա» խանութների ցանցից: Այժմ էլ, իր պաշտոնեական դիրքն օգտագործելով, փորձում է տնօրինել քաղաքի մահվան արարողակարգային բիզնեսը: Այսպես շարունակվելու դեպքում նրա եւ Տարոն Աբգարյանի կողմից ստեղծված «Բազմաշող» շինարարական ՍՊԸ-ն, մրցույթներին միայնակ մասնակցելով, իր ձեռքում կկենտրոնացնի քաղաքապետարանի կողմից պատվիրվող ողջ շինարարությունը:

Հոդվածում ներկայացված փաստերը քաղաքապետ Արթուր Նալբանդյանի հանձնարարությամբ մեզ տրամադրել են քաղաքապետարանի այն պատասխանատու պաշտոնյաները, ովքեր անմիջականորեն առնչվել եւ վերահսկել են գերեզմանոցի շինարարությունը (ի դեպ, դա տեսագրված է եւ կարող ենք տրամադրել վերահսկողական ծառայության աշխատակիցներին):

Այդ մասին մենք տեղեկատվություն ենք ստացել նաեւ «Բազմաշող» ՍՊԸ-ի շինարարության ղեկավար Աշոտ Խաչատրյանից եւ ՍՊԸ-ի նախագահ Տարոն Աբգարյանից: Դրանք նկարահանված են: Նկարահանված այդ եւ այլ նյութերով մեր կողմից պատրաստվել է նաեւ տեսանյութ, որը հունիսի 18-ին Ալավերդու «Անկյուն + 3» հեռուստաընկերության ուղիղ եթերում կազմակերպված թոք- շոուի ընթացքում ցուցադրվել է հեռուստաընկերության 35 հազարանոց լսարանին` շինարարության ողորմելի պատկերներով, քաղաքապետի տեղակալ Արտավազդ Վարոսյանի, քաղաքաշինության բաժնի պետ Գագիկ Սոխակյանի` հոդվածում հրապարակված ֆինանսական ծախսերի բացատրություններով: Թոք-շոուին հրավիրված էր նաեւ Ալավերդու քաղաքապետ Արթուր Նալբանդյանը: Եթե հոդվածի հրապարակումների հետ քաղաքապետն անհամաձայնություն ունենար, պետք է մասնակցեր թոք-շոուին եւ բնակչության առաջ դրանք հերքեր: Այս մարդիկ գերեզմանոցի բարեկարգման շինարարության նախահաշվային եւ կատարողական փաստաթղթերին կամ տեղյակ չեն եղել, կամ էլ, տեղյակ լինելով շինաշխատանքների վիճակին, միտումնավոր ծախսերը քիչ են ներկայացրել: Հանգամանք, որը վերահսկողական ծառայությունը շրջանցել է: Ի դեպ, հունիսի 6-ին Վանաձորում կայացած հյուսիսային մարզերի իրավապահ մարմինների արտագնա նիստում Լոռու մարզի դատախազ Կարեն Շահբազյանը հայտնել է. «Որոշ պաշտոնատար անձանց չարաշահումների արդյունքում ոչ նպատակային է օգտագործվել եւ մասամբ հափշտակվել են Ալավերդու նոր գերեզմանոցի բարեկարգման շինարարության համար հատկացված պետբյուջեի գումարները»: Վերահսկողական ծառայությունը զավեշտական ինքնավստահությամբ Սանահինի եկեղեցու հարեւանությամբ կառուցված հասարակական զուգարանի մասին գրում է, որ դրա կառուցման համար փաստացի ծախսվել է 4,8մլն դրամ (հրապարակման մեջ նշված է 7մլն դրամ), որի ստուգման արդյունքներով էլ աշխատանքի անհամապատասխանություններ չեն հայտնաբերվել: Հետաքրքիր է` վերահսկողության ծառայության աշխատակիցները իրենց ստուգման ընթացքում զուգարանի պատի սպիտակ ծեփը գոնե մի 10 սմ մաքրե՞լ են` տեսնելու, թե ինչ քարով է պատված զուգարանի պատը, տեսե՞լ են, որ զուգարանը կառուցվել է քաղաքի` մի քանի տարի առաջ քանդված եւ մի 40 տարի առաջ կառուցված մշակույթի տան շենքի մնացորդներով: Զուգարանի համար հատկացված 7,2մլն դրամի եւ շինարարության անհամապատասխանության մասին մեր ահազանգերը 1,5 տարվա ընթացքում քաղաքապետարանը չի համարձակվել վիճարկել: Հիմա զուգարանը կառուցած շինարարական կազմակերպության` «Տիտանյան եղբայրներ» ՍՊԸ-ի նախագահ Սանասար Տիտանյանը մեզ, քաղաքապետ Արթուր Նալբանդյանն էլ` հեռուստաեթերում բնակչությանը ուզում են համոզել, թե զուգարանի վրա 7մլն դրամից ավելի ծախս է արվել, բայց վճարվել է 4,8մլն դրամ: Մինչդեռ ավագանու անդամ Լաուրա Մելիքսեթյանը զուգարանի գնի մասին մեր հարցին ամիսներ առաջ պատասխանել է. «Քաղաքապետն ավագանուն առաջարկել է 7մլն դրամից էլ ավելացնել զուգարանի գինը, ավագանու որոշ անդամներ չեն համաձայնել` «զոլոտոյ» զուգարա՞ն է, ինչ է»:

Նշենք, որ քաղաքապետարանի քաղաքաշինության բաժնից եւ «Տիտանյան եղբայրներ» ՍՊԸ-ից զուգարանի նախահաշվային փաստաթուղթը ստանալու մեր փորձերն անհաջողության են մատնվել: Իսկ զուգարանի մշտահոս ջրի մասին սանահինցի գյուղացիները բացատրություն ունեն: «Սանահին գյուղի համար ԽՍՀՄ-ի փլուզումից հետո խմելու մշտահոս ջուրը երազանք է: Գյուղացիները ավտոյով, էշով, ձիով, ձեռքով գյուղի «Մլի» աղբյուրից են խմելու ջուր կրում: Զուգարանի ջրի շուրջ 200լ տարողությամբ բաքը սնուցվում է գյուղի «Աստծոնազ» լեռնային աղբյուների ջրամբարի ոռոգման ջրից, որի 4 ջրագծերից մեկն անցնում է զուգարանի կողքով: Ջրագծերից յուրաքանչյուրը 3 օրը մեկ է ջուր ստանում: Ջրամբարի հատակին 2մ հաստությամբ տիլ է նստած: Անձրեւների ժամանակ խողովակներով ցեխաջուր է հոսում: Էդ ջրով սկի մեր տան հատակը չենք լվանում, ուր մնաց` թե ձեռքեր լվանան»,- ասաց սանահինցի տիկին Անահիտը:

Ակնհայտ է, որ վարչապետի վերահսկողական ծառայության ուսումնասիրության արդյունքների հրապարակումը ճնշում է դատախազության վրա: Այսքանից հետո դատախազությունը քրեական գործ կհարուցի՞:

Եթե վերահսկողական ծառայությունը դիմեր «Հետքի» խմբագրություն, նրան կտարամդրվեին համապատասխան ձայնագրությունները եւ այլ փաստական նյութեր: Սակայն ուսումնասիրությունն իրականացնողներն ի սկզբանե գնացել են գործը փակելու ուղղությամբ, այլապես անհասկանալի է ավագանու նիստին հոդվածագրի ներկայությունն ապահովելու առաջարկի մերժումը: