Մի քանի օր առաջ «Հետքը» նամակ էր ստացել Կոտայքի մարզի Նոր Գեղիի գյուղատնտեսական քոլեջի դասախոսներից: Հեղինակները պնդում էին, որ արդեն 5 ամիս է` պետական քոլեջը չի վճարում ոչ միայն իրենց աշխատավարձերը, այլեւ ուսանողների կրթաթոշակները:

«Նոր տարվա շեմին բաժանեցին կասկածելի գումարներ` իբր երկու ամսվա աշխատաբարձ (երկուսն իրար հետ կազմում էր 30 հազար ՀՀ դրամ): Չգիտեինք` ստանա՞լ, թե՞ ոչ: Որևիցե օրինական փաստաթուղթ չենք ստորագրում, ինչպե՞ս կարող է ամսեկան աշխատավարձը կազմել 15 հազար դրամ»,- հարցնում են նամակագիրները:

Նամակի առնչությամբ «Հետքը« դիմել է թե Կրթության եւ գիտության եւ թե Գյուղատնտեսության նախարարությանը: Նոր Գեղիի գյուղատնտեսական քոլեջը վերջինիս ենթակայության տակ է: Երկու նախարարությունից էլ վստահեցրին, որ «Հետքի» հրապարակած նամակի մասին զեկուցվել է նախարարների առաջին տեղակալներին, տրվել են համապատասխան հանձնարարականներ, եւ խնդիրը մանրամասն ուսումնասիրվում է: Իսկ այսօր «Հետքը» զրուցեց քոլեջի տնօրեն Արա Խաչատրյանի հետ:

«Հավաստիացնում եմ` դա լիովին սուտ է: Ճիշտ է` հիմնարկությունը ֆինանսական խնդիրներ ունի, բայց չենք վճարել ընդամենը երկու ամսվա աշխատավարձ, եւ դա հիմնականում վերաբերում է արտաբյուջետային աշխատավարձներին, այսինքն` այն աշխատավարձերին, որոնք գոյանում են ուսանողների վարձավճարից»,- ասում է քոլեջի տնօրենը:

Նա մանրամասնում է, որ անցյալ տարվա նոյեմբեր-դեկտեմբեր ամիսների համար արտաբյուջետային աշխատավարձ չստացած դասախոսները մոտ 20-ն են, իսկ չվճարման պատճառն այն է, որ ուսանողներից շատերը վճարունակ չեն, վարձավճարները մուծելու համար լրացուցիչ ժամանակ են խնդրել, ինչին քոլեջի ղեկավարությունն ընդառաջել է:

«Հենց վարձավճարները սկսեն գոյանալ, արտաբյուջետային աշխատավարձերն անմիջապես կվճարենք: Ուսանողներին վարձերի պարտքերը մարելու համար ժամկետ է տրվել մինչեւ մարտի վերջ»,- ասում է Արա Խաչատրյանը:

Վերջինս հերքում է նաեւ նամակի այն հատվածը, ըստ որի` Նոր տարվա շեմին դասախոսներին վճարվել է 30 հազար դրամ` իբրեւ 2 ամսվա աշխատավարձ. «Ես պատրաստ եմ ցույց տալ ցանկացած ֆինանսական փաստաթուղթ, որ ընդհանրապես 30 հազարի չափով աշխատվարձ չունենք: Նվազագույն աշխատավարձը մեզ մոտ 34 հազար դրամ է` մեկ ամսվա համար: Այսինքն` հնարավոր չէ, որ ինչ-որ մեկը 30 հազար դրամ ստանար, եւ նրան ասվեր, թե դա 2 ամսվա աշխատավարձ է»:

Ինչ վերաբերում է նրան, որ ուսանողների կրթաթոշակները չեն վճարվել, քոլեջի տնօրենը պարզաբանում է, որ ասվածը հիմնավոր է միայն մասնակի. 60 ուսանողը չի ստացել անցյալ տարվա դեկտեմբեր ամսվա կրթաթոշակը. «Պետությունը դեռ այդ գումարները մեզ չի հատկացրել: Հենց գումարները նստեցին մեր բալանսին, ուսանողները միանգամից իրենց կրթաթոշակները կստանան: Ես ակնկալում եմ, որ փետրվար ամսին նրանք կստանան իրենց կրթաթոշակները` հին պարտքերը ներառյալ»:

«Հետքի» ստացած նամակի հեղինակը, Արա Խաչատրյանի համոզմամբ, ոչ թե մի խումբ դասախոսներ են, այլ քոլեջի նախկին դասախոսներից մեկը: Քոլեջի տնօրենի փոխանցմամբ, ուսանողների թվաքանակի կրճատմամբ` առաջ է եկել նաեւ քոլեջի աշխատակազմը փոքրացնելու խնդիր, քանզի պետությունը կրթօջախին ֆինանսավորում է ուսանողների թվին համապատասխան:

«Նոյեմբերին մենք գնացել ենք կրճատման` պահպանելով Աշխատանքային օրենսգրքի բոլոր կանոնները: Կրճատվել են մի քանիսը, բայց վրդովված դուրս է եկել միայն մեկը: Ոչ միայն ես, այլեւ մեր ողջ կոլեկտիվը մտածում է, որ տվյալ անձը փորձել է իր անձնական կարծիքը նման կերպով` չարակամորեն դրսեւորել»,- ասում է քոլեջի տնօրեն Արա Խաչատրյանը: