Վահան Հովհաննիսյան. «Մենք թույլ չենք տա ձեռքերը լվալ»
Այսօր «Արցախ» ակումբում հրավիրված ասուլիսի ժամանակ ԱԺ պատգամավոր, ՀՅԴ Բյուրոյի անդամ Վահան Հովհանիսյանն անդրադարձավ Սահմանադրական դատարանի (ՍԴ) հունվարի 12-ի որոշմանը, որով հայ-թուրքական հարաբերություններին վերաբերող զույգ արձանագրությունները ճանաչվել են ՀՀ Սահմանադրությանը համապատասխանող:
Ըստ Հովհաննիսյանի, թեև չի հաջողվել հասնել առավելագույն նպատակին, որ արձանագրությունները գոնե մասնակիորեն համարվեին հակասահմանադրական, այնուամենայնիվ, ՍԴ-ն իր որոշման մեջ պատասխանել է գլխավոր հարցադրմանը` «ո՞րն է արձանագրությունների առարկան»:
«ՍԴ-ն շատ հստակ պատասխանել է, որ առարկան միայն երկու խնդիր է` դիվանագիտական հարաբերություններ հաստատել (Հայաստանի և Թուրքիայի միջև) և բացել սահմանը (հայ-թուրքական): Մնացած բոլորը ածանցյալ են... »,- ասում է Վ. Հովհաննիսյանը:
Ըստ նրա` ՍԴ որոշմամբ ամրագրվել է նաև, որ արձանագրությունները որևէ կերպ պայմանավորված չեն երրորդ երկրի հետ հարաբերություններով: Այլ կերծ ասած` որևէ կասկած, որ Արցախի հարցը կամ հայ-ադրբեջանական հարաբերությունների կարգավորումը կարող է փոխկապակցվել հայ-թուրքական հարաբերությունների հետ, այլևս հանված է:
Բանախոսի ներկայացմամբ` հիշյալ որոշմամբ ասված է նաև, որ ՀՀ-ն պարտավոր է բոլոր իր հետագա գործողություներում հաշվի առնել ՀՀ Սահմանադրության նախաբանը և Անկախության հռչակագիրը, որտեղ հստակ խոսվում է Արևմտյան Հայաստանի և ՀՀ կողմից Ցեղասպանության ճանաչման գործընթացին սատարելու մասին: Այսինքն` «Հայաստանի և ոչ մի ատյան չի կարող որևէ տեսակի հանձնաժողովում կամ ենթահանձնաժողովում քննարկման առարկա դարձնել Ցեղասպանության խնդիրը»:
Ինչ վերաբերում է երկու երկրների միջև սահմանների ճանաչմանը, ՍԴ-ն նախ ասել է, որ սահմանի ճանաչումը տեղի է ունենում ոչ թե արձանագրություններով, այլ միայն միջազգային ուժ ունեցող երկկողմ պայմանագրերով, ապա հիշեցրել է, որ ՀՀ-ի համար պարտադիր ուժ ունեն միայն այն միջազգային պայմանագրերը, որոնք վավերացված են անկախ Հայաստանի կողմից: «Իսկ նման պայմանագրեր, որոնք վերաբերում են հայ-թուրքական սահմանին, գոյություն չունեն: Այսինքն` սահմանի հարցը մնում է բաց»,- ասում է պատգամավորը:
Բացասական գնահատելով այն, որ ՍԴ-ն արձանագրությունները գոնե մասնակիորեն հակասահմանադրական չճանաչեց, Վահան Հովհաննիսյանը նշում է, թե շատ լավ հասկանում են մեր երկրի պայմանները ու «եթե ՍԴ-ն կամաց-կամաց նվաճում է մեր քաղաքական, հասարակական միջավայրում իր անկախ դիրքը, սա կարելի է միայն ողջունել»:
Այդուհանդերձ, ՀՅԴ Բյուրոյի անդամը շեշտում է, թե լավագույն լուծումը կլինի այն, որ Ազգային ժողովը, հիմնվելով ՍԴ որոշման վրա, չվավերացնի հայ-թուրքական արձանագրությունները: Իսկ վավերացնելու դեպքում, ըստ նրա, ԱԺ-ն դա պետք է անի միայն վերապահումներով` իր որոշման բաղկացուցիչ մասը դարձնելով ՍԴ որոշումը` իր կետերով, տրամաբանությամբ ու բովանդակությամբ հանդերձ: Հակառակ դեպքում, Հովհաննիսյանի վստահեցմամբ, ՍԴ որոշումը կկորցնի իմաստը, քանի որ այն ներպետական փաստաթուղթ է և իրավական ուժ ունի միայն Հայաստանի համար: Իսկ ԱԺ որոշման մեջ ներառվելով` կստանա միջազգային ուժ:
«Մենք նկատում ենք, որ արդեն որոշակի թելադրանք կա, որ ԱԺ-ն ընդհարապես այլևս կարող է ոչինչ չանել, քանի որ ՍԴ-ն ամեն ինչ արեց և կարելի է, այսպես ասած` ձեռքերը լվալ: Մենք թույլ չենք տա ձեռքերը լվալ, որովհետև ԱԺ-ն պարտավոր է լրջությամբ անդրադառնալ այս փաստաթղթին և իր որոշման բաղկացուցիչ մաս դարձնել: Ինչպե՞ս, դա արդեն տեխնիկայի հարց է»,- ասում է պատգամավոր Վ. Հովհաննիսյանը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել