«Պատերազմի ժամանակ իշխանության հետ վեճերն անընդունելի են»
Այսօր «Արցախ» ակումբում Հայ ազգային կոնգրեսի համակարգող Լեւոն Զուրաբյանը պատասխանել է «Հետք»-ի եւ մյուս լրատվամիջոցների հարցերին.
Եթե պատերազմ սկսվի, դուք կոչ կանե՞ք ժողովրդին մասնակցել պատերազմին, թե՞ կշարունակեք ձեր պահանջները ներկայացնել իշխանություններին:
Մենք պատասխանատու ուժ ենք, մեզ համար առաջնային ազգային շահերն են, մենք ինքներս էլ կլծվենք պատերազմական ջանքերին: Նման դեպքում ինչ հանցագործ էլ լինի ռեժիմի ղեկավարը, վեճերը պատերազմի ընթացքում անընդունելի են, բայց բնականաբար, պատերազմից հետո այդ հարցերը կդրվեն:
Հնարավոր համարո՞ւմ եք, որ ղարաբաղյան խնդրի լուծումը դուրս կգա Մինսկի խմբի վերահսկողությունից:
Սա կարելի է համարել հավանական սցենարներից մեկը. իսկապես ռազմաքաղաքական հավասարակշռությունը փոխվում է հօգուտ Ադրբեջանի, եւ ռազմական լուծման հնարավորության հետ կապված` լարվածությունն աճում է, եւ բացառել դա ոչ մի դեպքում չի կարելի: Սա նորից համարում եմ այս ռեժիմի գործունեության հետեւանքը:
Դուք մշտապես նշում եք, որ ժողովրդի մեծամասնությունը աջակցում է Կոնգրեսին, սակայն թիվ 10 ընտրատարածքի ընտրություններին մասնակցությունը հակառակն է ցույց տալիս:
Իմ կարծիքով` լրիվ հակառակն է. եկեք վերլուծենք: Պաշտոնապես 24 տոկոս մասնակցութուն է գրանցվել ընտրություններում: Մեր ակտիվիստները, որոնք դռնեդուռ այցելել են բոլոր տները, հայտնաբերել են, որ այդ ընտրատարածքի բնակչության 30-40 տոկոսը բացակայում է Հայաստանից: Եթե հաշվարկենք Հայաստանում առկա բնակչության թվով, ապա 35 տոկոս մասնակցություն է գրանցվել: Մի վիճակում, երբ ապօրինաբար ընտրությունները տեղափոխվել էին հունվարի 10-ին, որպեսզի ընտրարշավի վերջին 15 օրերը ընկնեին տոնական օրերի վրա, մի վիճակում, երբ մամուլը չէր գործում, երբ հեռուստաընկերությունները բոյկոտել էին ընտրությունների լուսաբանումը, այդ վիճակում եթե ապահովվել է 35 տոկոսանոց մասնակցություն, ես դա համարում եմ հրաշք:
Բայց Ձեր ասելով` այդ 35 տոկոսի կեսին բերել էր հաղթող թեկնածուն:
Կապ չունի, մենք խոսում ենք մասնակցության մասին, չէ՞: Եթե միայն Փաշինյանին ընտրողներին հաշվենք, դարձյալ համարում եմ, որ դա բարձր մասնակցություն է` հաշվի առնելով այն ահաբեկման մթնոլորտը, որ ստեղծվել էր ընտրությունների շուրջ: Մենք ունենք ակտիվիստներ, որոնք պատրաստ են կյանքը տալ հանուն ժողովրդավարության հաստատման, սակայն համակիրներ ունենք, որոնք իրենց խոհանոցից դուրս չեն գա, եթե տեսնեն, որ իրենց բակում կամ ընտրական տեղամասում պրոբլեմ կա:
Հավանակա՞ն եք համարում Ռոբերտ Քոչարյանի վերադարձը քաղաքականություն:
Հավանական չեմ համարում, որովհետեւ այդ մարդու վրա այնքան հանցագործություն կա, եւ նրա նկատմամբ այնքան ատելություն կա, որ դա հնարավոր չէ:
Ո՞վ է Հայ ազգային կոնգեսի 2-րդ դեմքը:
Կոնգրեսում բոլորը զինվորներ են` սկսած Լեւոն Տեր-Պետրոսյանից, վերջացրած թռուցիկ փակցնող երիտասարդից: Մենք գտնվում ենք բռնապետության մեջ, որտեղ իշխանությունը պատերազմում է ժողովրդի եւ ընդդիմության դեմ: Այդ պատերազմում մենք բոլորս պետք է զինվոր լինենք:
Մինչեւ ե՞րբ է ՀԱԿ-ը մի կողմ քաշված մնալու, եւ ո՞վ պետք է պայքարի` ձախողված հայ-թուրքական գործընթացի կասեցման դեմ:
Նախ` կարծես թե ինքնաբերաբար կասեցվում է: Առաջացել էր մի իրավիճակ, որտեղ միջազգային հանրությանը պետք է ցուցադրեին, որ ազգայնական ուժերը դուրս են եկել հայ-թուրքական արձանագրությունների դեմ, եւ հենց այդ բեմականացումը նրանք իրագործեցին: Կոնգրեսը մի կողմ քաշված չէ, Կոնգրեսը կատարում է ընդդիմության իր առաքելությունը, այն է` այս ռեժիմի բոլոր արատները բացել, քննադատել բոլոր ուղղություններով:
Դաշտն ազատ թողնելով` արդյոք Կոնգրեսը չտվե՞ց Դաշնակցությանը կեղծ ընդդիմություն դառնալու հնարավորություն, որի արդյունքում Արմեն Ռուստամյանն այժմ ԵԽԽՎ-ում փոխարինում է Զարուհի Փոստանջյանին` որպես ընդդիմադիր պատգամավոր:
Այդ մի հանցագործության մեջ պետք չէ մեղադրել Կոնգրեսին: Մենք ստեղծել ենք հնարավորություն` ալտերնատիվ ընդդիմադիր դաշտի ակտիվացման եւ նրանց որակների եւ իրական նպատակների բացահայտման համար: Դաշնակցությունը դուրս չի՞ եկել կոալիցիայից եւ իրեն հայտարարել ընդդիմություն: Էդ է՞լ ենք մենք արել:
Մեկնաբանել