Վարսահարդարում` բարեգործական նպատակներով
Կենսաթոշակառու, 65-ամյա Ժորա Խաչատրյանը 23 հազար դրամ թոշակ է ստանում: Ընտանիքը 5 անձից է բաղկացած, ոչ մեկը չի աշխատում: Փետրվարի 11-ին Ալավերդի քաղաքում վարսահարդար Տիգրան Հախինյանը սոցիալապես անապահով մարդկանց մազերը հարդարելու նպատակով իր 8 աշակերտների հետ այցելել էր բարեգործական ճաշարանում կերակրվող անապահովներին: Ժորա Խաչատրյանն էլ կարողացավ հարդարվել այս ծրագրի շրջանակներում: «Մազերս մեկ ամիս առաջ էի կտրել, բայց ոչ վարսավիրանոցում: Գոհ եմ այս ջահելներից, շատ գոհ եմ»,- ասաց Ժորա Խաչատրյանը:
«Առաքելություն Հայաստան» բարեգործական կազմակերպությանը պատկանող Ալավերդի քաղաքի ճաշարանը գտնվում է քաղաքի Ս./Սարահարթ թաղամասի թիվ 5 մանկապարտեզի շենքի մասնաճյուղերից մեկում: Ինչպես տեղեկացրեց բարեգործական ճաշարանի տնօրեն Այծեմիկ Մկրտումյանը` ճաշարանում սնվում են քաղաքի Ս./Սարահարթ թաղամասի շուրջ 110 սոցիալապես անապահով ծերեր և հաշմանդամներ: Թե որքան գումար է ամսեկան հատկացվում սոցիալապես անապահով այս մարդկանց սննդի համար, տնօրենը չկարողացավ հայտնել` պատճառաբանելով, որ իրենք գումարով չեն աշխատում:
Սոցիալապես անապահովների սնվելուց հետ վարսահարդարն ու իր աշակերտները ճաշարանի ղեկավարության կողմից տրամադրված առանձին սրահում 3 ժամվա ընթացքում հարդարեցին 40 սոցիալապես անապահով մարդկանց մազերը:
Ճաշարանի տնօրեն Այծեմնիկ Մկրտումյանը հայտնեց իր գոհունակությունը Տիգրան Հախինյանի նախաձեռնության համար. «Շատ ճիշտ է որոշել Տիգրանը, որովհետև այս մարդիկ դրա կարիքը շատ էին զգում: Այստեղ սնվողները դժբախտաբար այնքան են անապահով, որ ի վիճակի չեն այցելել վճարովի վարսավիրանոցներ: Հիմա այս մարդիկ տեսքի են եկել»:
«Վարսահարդարների այս խմբի ուսուցումը պետական ծրագրով է, նրանց ինձ մոտ մասնագիտանալու է ուղարկել Ալավերդու զբաղվածության կենտրոնը, ուսուցումը ավարտված է և խմբի անդամները լիարժեք տիրապետում են վարսահարդարի մասնագիտությանը: Մենք հրաժեշտից առաջ որոշեցինք այցելել սոցիալապես անապահով այս մարդկանց և հարդարել նրանց մազերը: Մեզ շատ լավ ընդունեցին այս մարդիկ»,- ասաց Տիգրան Հախինյանը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել