Իսկ Սասուն Միքայելյանին վաղաժամկետ ազատելու միջնորդություն չի ներկայացվել Մարդու իրավունքների պաշտպան Արմեն Հարությունյանը վերջերս հայտարարել է, որ «Հայկական ժամանակ» օրաթերթի գլխավոր խմբագիր Նիկոլ Փաշինյանի նկատմամբ համաներում կիրառել-չկիրառելու հարցի կապակցությամբ կատարվել են ուսումնասիրություններ, և կարծիքները կիսվել են: «Այսինքն, այնուամենայնիվ, կան կասկածներ, ինչի պարագայում խնդրիը պետք է լուծվի հօգուտ մեղադրյալի: Որպես գլխավոր դատախազ` ի՞նչ դիրքորոշում ունեք այս խնդրի վերաբերյալ»,- այսօրվա ասուլիսում հարցրին Աղվան Հովսեփյանին: «Համաներում կիրառելու հարցը, որ բարձրացվել է զանգվածային լրատվամիջոցներով և ընդհանրապես, պետք է ասեմ, որ շատ արհեստական է: Որովհետև բոլորը շատ լավ գիտակցում են, որ համաներումը տարածվում է պատժի չկրած մասի վերաբերյալ: Օրենքում գրված է` պատժի չկրած մասը կրճատել կեսով: Մենք ունենք ևս 2 դատական ատյան` վերաքննիչ և վճռաբեկ: Այն ժամանակ, երբ վերջնական պատիժ կնշանակվի Նիկոլ Փաշինյանի նկատմամբ, կորոշվի նրա նկատմամբ համաներում կիրառելու հարցը»,- ասաց Աղվան Հովսեփյանը: Վերջինս նկատեց, որ համաներման կիրառելիությունը օրենքի պահանջ է, հետևաբար ենթակա է պարտադիր կատարման: «Երբ կունենանք վերջնական ուժի մեջ մտած դատավճիռ և պատժաչափ, այդ ժամանակ կկիրառվի համաներման ակտը: Եթե չկիրառվի, դատախազությունը կբողոքարկի այդ հանգամանքը»,- խոստացավ գլխավոր դատախազը: Հիշեցնենք, որ Կենտրոն և ՆորքՄարաշ վարչական շրջանների առաջին ատյանի դատարանը Նիկոլ Փաշինյանին, մարտիմեկյան իրադարձություններով պայմանավորված, դատապարտել է 8 տարվա ազատազրկման: Ասուլիսի ընթացքում, որին գլխավոր դատախազից բացի մասնակցում էին նաև վերջինիս տեղակալները, լրագրողները հարցրին, թե արդյոք քննարկվե՞լ է ընդդիմության կողմից քաղբանտարկյալ համարվող Սասուն Միքայելյանի վաղաժամկետ ազատ արձակման հարցը, և ինչքանո՞վ է օրինական նրան անազատության մեջ պահելը, եթե հաշվի առնենք Միքայելյանի ունեցած առողջական լուրջ խնդիրներ: Գլխավոր դատախազի տեղակալ Մնացական Սարգսյանը նկատեց, որ 2009 թ. ընթացքում քրեակատարողական հիմնարկներից պայմանական վաղաժամկետ ազատվել են 520 դատապարտյալներ: Իսկ Սասուն Միքայելյանին պայմանական վաղաժամկետ ազատման ներկայացնելու վերաբերյալ միջնորդություն քրեակատարողական ծառայության կողմից չի ներկայացվել: