Հրանտ Բագրատյան. ««ՀայՌուսգազարդը» քաղաքական դեպրեսիվ ապարատ է պետության ձեռքին»
Մատենադարանին հարող տարածքում շարունակվող հանրահավաքին ելույթ ունեցավ նաև ՀՀ նախկին վարչապետ Հրանտ Բարգրատյանը: Նա անդրադարձավ, իր իսկ բնութագրմամբ` մի «զարհուրելի» երևույթի. երբ «ՀայՌուսգազարդի» ղեկավարը հայտարարել է, որ գազի գինը պետք է թանկանա 103 դոլարով` 256-ից դառնալով 359, դա զարմացրել է տնտեսագետներին, որովհետև ՌԴ-ն, ում պատկանում է բաժնետոմսերի 80 տոկոսը, Հայաստան մտնող գազի գինը բարձրացրել է 26 դոլարով:
«Ինձ համար պարզ դարձավ, որ պրոբլեմը ՌԴ-ի կողմից գազի գնի թանկացումը չէ, որովհետև այդ դեպքում սպառողների համար գազը պետք է թանկանար ընդամենը 7 %-ով»,- ասաց Հ. Բագրատյանը` նշելով, որ երբ ասվածի մասին բարձրաձայնել են, «ՀայՌուսգազարդի» ղեկավարը թանկացումը պայմանավորել է անցյալ տարի դոլար-դրամ փոխարժեքի փոփոխությամբ:
«Նորից լկտի սուտ, որովհետև դա վերաբերում է ՌԴ-ից եկող գազի բաղադրիչին»,- նշեց Հ. Բագրատյանը` մանրամասնելով, որ այս դեպքում, ըստ տնտեսական հաշվարկների, գազի գինը կարող էր բարձրանալ մոտ 10 հազար դրամով:
Ըստ նախկին վարչապետի` այս ընթացքում անընդհատ շարունակել են «լո-լո»-ներ կարդալ, և ի վերջո, օրերս գազի սակագինը 93 դոլարով բարձրացրին ժողովրդի համար, իսկ հարուստների, Հ. Բագրատյանի բնորոշմամբ` օլիգարխների համար` ընդամենը 26 դոլարով:
Ավելին, այն ընդամենը 8 դոլարով է բարձրացել նաև գազալցակայանների դեպքում, որը նույնպես, ինչպես Հրանտ Բագրատյանն է նշում, պատկանում է հարուստներին` հաշված թվով մարդկանց:
«ՀայՌուսգազարդի» պարզաբանումը սովորական և խոշոր ծավալով սպառողներին մատակարարվող գազի գնի տարբերության վերաբերյալ Բագրատյանը նույնպես անհեթեթություն է համարում:
Ըստ նրա` իրականում գազի գնի բարձրացմամբ իշխանությունը, որը «ՀայՌուզգազարդը» քաղաքական դեպրեսիվ ապարատ է դարձել պետության ձեռքին, լրացուցիչ հարկ է դրել ժողովրդի վրա` միաժամանակ սուբսիդավորելով հարուստներին:
Մինչդեռ եթե «ՀայՌուսգազարդի» ղեկավարությունը 25 հազար ֆունտ ստերլինգ արժողության համերգների չգնա և մի քանի հազար դոլար աշխատավարձ չստանա, այդ աշխատավարձը եթե չմտցնեն գազի սակագնի մեջ, ապա այն այդքան բարձր չէր լինի: Հ. Բագրատյանի խոսքերով, որքան էլ պտտվենք, ելքը մեկն է`պետք է փոխել իշխանությունը` «ինչ գին էլ այն ունենա, որովհետև ավելի լավ է իշխանափոխություն լինի, քան կորցնենք Հայաստանը»: Հ. Բագրատյանը ժողովրդին կոչ արեց այդ հարցում միասին պայքարել մինչև վերջ: ՀԱԿ-ը ևս տարածել է թեմային առնչվող հայտարարություն, որը հրապարակեց հանրահավաքը վարող Արամ Մանուկյանը:
Մեկնաբանել