Նոր ձեռնարկ. «Միտք սերմանիր, ծառ տնկիր»
Այսօր Հայաստանի Ամերիկյան համալսարանում «Միտք սերմանիր, ծառ տնկիր» բնապահպանական կրթության ձեռնարկի շնորհանդեսն էր: Գիրքը ստեղծվել է «Էյ Թի Փի» բարեգործական հիմնադրամի կողմից` կրթության ազգային ինստիտուտի (ԿԱԻ) փորձագետների, ինչպես նա Երևանի տարբեր դպրոցների ուսուցիչների մասնակցությամբ:
«Այն, ինչ կատարվում է այսօր մեր երեխաների հետ, վաղը կբերի այնպիսի հետևանքների, որոնց հետ չենք կարողանա պայքարել»,- միջոցառման ժամանակ ասաց բնապահպանության Հակոբյան կենտրոնի տնօրեն Կարեն Աղաբաբյանը և գրքի հրատարակումը կարևորեց այն տեսանկյունից, որ այն «ևս մեկ աղբյուր է, որը կօգնի երեխաներին հասկանալ իրենց տեղն աշխարհում, գուցե և կօգնի հեղաշրջել բնության հանդեպ ձևավորած սպառողական մոտեցումը»:
ԿԱԻ ներկայացուցիչ Վարդան Ղանդիլյանը նկատեց, որ մեր պատմիչների գործերը լի են բնության և գեղեցիկի նկատմամբ պաշտամունքով, ինչը տեղ է գտել նաև հրատարակված ձեռնարկում. «Մենք վերադառնում ենք մեր ակունքներին, զարգացնում մեր ավանդույթները»:
Գրքի տպագրությանն օժանդակել է ԵԱՀԿ երևանյան գրասենյակը, որի ներկայացուցիչ Քարել Հոֆթրան ձեռնարկի լույս ընծայումը կարևորեց հատկապես նրանով, որ աշխատանքն ուղղված է ապագա սերունդներին. «Գիրքը կարևոր է նաև նրանով, որ դրանում խոսվում է ոչ միայն բնության պահպանության մասին, այլև ընդգծում յուրաքանչյուրի պատասխանտվությունը բնության պահպանության հանդեպ»,-ասում է նա` մեջբերելով հայտնի ասույթը` «Փոխենք աշխարհը` սկսելով մեզնից»:
Նա նշում է, որ ինչպես արևմտյան Եվրոպայի երկրներում, այնպես էլ Հայաստանում մարդիկ ամեն ինչ սպասում են կառավարությունից և ամենի համար պատասխանատու համարում նրան: Մինչդեռ պետք է ամեն ոք գործի և կրի պատասխանատվության իր բաժինը:
«Էյ Թի Փի» բարեգործական հիմնադրամը դեռ 2004 թվականին տպագրել է բնապահպանական կրթության ձեռնարկ «Միտք սերմանես` նույնն է, թե ծառ տնկես» վերնագրով, որն այժմ վերանվանվել է «Միտք սերմանիր, ծառ տնկիր», ավելացել նոր դասերով և թեմաներով:
Դասերի ուղեցույցը բաժանված է 3 մասի. բացահայտում, դիտարկում և վերլուծություն: Ինչպես հիմնադրամի կրթության բաժնի պետ Ալլա Բերբերյանն է ասում, առաջին դեպքում երեխաները կսովորեն բացահայտել Հայաստանի բնությունը, իսկ մյուս երկու բաժինները հնարավորություն է տալիս նրանց կատարել հետազոտություններ. «Այսինքն` այս գրքի մյուս մեծ առավելությունն այն է, որ երեխաները կարողանալու են գործնականորեն օգտագործել իրենց գիտելիքները, այլ ոչ թե միայն լինեն պասիվ դասի ընկալողներ: Յուրաքանչյուր բաժինն ունի գործնական առաջադրանքներով կոնկրետ դասեր»:
Շնորհանդեսին ներկա էին նաև գրքի ստեղծմանը մասնակցած ուսուցիչները, որոնք թվարկեցին ձեռնարկի առավելությունները: Գիրքը նախատեսված է տարրական, միջին և ավագ դպրոցների ուսուցիչների համար` ամենօրյա կրթական ծրագրով բնապահպանական խնդիրներ քննարկելու համար: Դասերում ներառված են ինչպես Հայաստանի, այնպես էլ մոլորակային բնապահպանական խնդիրներ:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել