Էլեկտրահարման վարկածը չհաստատվեց
Նախաքննությունը պետք է պարզի զինվորի մահվան իրական պատճառը
Այսօր Վերաքննիչ դատարանը, Արշակ Խաչատրյանի նախագահությամբ, մերժեց դատախազ Հարություն Հարությունյանի բողոքը, որով վերջինս միջնորդել էր բեկանել առաջին ատյանի դատավճիռը և որպես ժամկետային զինծառայող Տիգրան Օհանջանյանի մահվան պատասխանատու` ազատազրկման դատապարտել կապիտան Ռուստամ Ասատրյանին եւ ենթասպա Կարեն Թովմասյանին:
Հիշեցնենք, որ Տ. Օհանջանյանը մահացել է կասկածելի հանգամանքներում` 2007 թ. օգոստոսի 30-ին Գեղարքունիքի մարզի զորամասերից մեկում:
Նախաքննական մարմինը հիմնավորված է համարել, որ Տիգրանը մահացել է էլեկտրահարումից` պարանոցով և ձախ ձեռքի դաստակով հպվելով զորամասի մոտ գտնվող ռադիոռելեային կայանի ձգալարին: Ամբաստանյալները հենց այդ կայանի շահագործման պատասխանատուներն են, որոնց անփույթ վերաբերմունքի պատճառով էլ, ըստ նախաքննական մարմնի, տեղի է ունեցել դժբախտությունը:
Սակայն Գեղարքունիքի մարզի ընդհանուր իրավասության դատարանն այս տարվա հունվարին ամբաստանյալներին լիովին արդարացրեց, նրանց ճանաչեց անպարտ, իսկ քրեական գործը վերադարձնեց Զինվորական դատախազություն` նոր քննություն կատարելու հանձնարարությամբ: Վերաքննիչն այսօրվա որոշմամբ այս դատավճիռը թողել է ուժի մեջ:
Լուս` Գ. Շամշյանի
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել