Ո՞ւր են Հայաստանի հոգեկան հիվանդները
Հոգեբույժ, հոգեթերապեւտ Հարություն Մինասյան, հենվելով համաշխարհային վիճակագրության վրա, նշում է, որ յուրաքնաչյուր երկրում բնակչության մոտ 10 տոկոսն ունի հոգեկան խնդիրներ: Հետեւաբար, ստացվում է, որ Հայաստանում նման մարդկանց թիվը մոտ 350 հազար է, մինչդեռ, պաշտոնական տվյալներով, հոգեբուժական դիսպանսերներում գրանցված է 34 հազար հիվանդ: «Իսկ ո՞ւր են մյուսները»,- հարցնում է հոգեբույժը եւ ինքն էլ պատասխանում.
«Մնացածը կամ քայլող հոգեկան հիվանդներն են, այսինքն` բժիշկների չդիմող, կամ բուժվում են մասնավոր կարգով, կամ բուժվում են ոչ հոգեբույժների մոտ, ասենք` թուղթ ու գիր անողների, վախ չափողների, նաեւ թերապեւտների, նեվրոպատոլոգների... : Կամ էլ ուղղակի նրանք չեն գիտակցում իրենց հիվանդ լինելը»:
Հ. Մինասյանի խոսքերով` «սարսափելի հիվանդությամբ»` ծխախոտամոլությամբ տառապողների շատ փոքր մասն է դիմում բժշկի` 1 մլն-ից միայն մեկը է, այնինչ այն համարվում է թմրամոլության տարատեսակներից մեկը: «Մեզ մոտ ամենատարածված հիվանդությունը ծխախոտամոլությունն է, որն ունի հոգեբուժական օգնության կարիք»,- ասում է հոգեբույժը եւ առանձնացնում նաեւ սրճամոլությունը, որը նույնպես հոգեբուժական կատալոգներում դասվում է թմրամոլության շարքին:
Հոգեբույժ Մինասյանի ներկայացմամբ` ամբողջ աշխարհում հոգեկան խնդիրներ ունեցողների թիվը համարյա նույնն է, ուղղակի զարգացած երկրներում, քանի որ այդ հիվանդությունները վաղաժամ են ախտորոշվում, գրանցված հիվանդների թիվը բարձր է: Իսկ հետամնաց երկրներում, որտեղ չեն ճանաչում հոգեկան հիվանդությունները, վաղաժամ չեն ախտորոշում, չեն գնահատվում` իբրեւ հոգեկան խնդիրներ ունեցողներ, հոգեկան հիվանդների թիվը, ըստ վիճակագրության, մեծ չէ:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել