Ազգային ժողովը «Հեռուստատեսության եւ ռադիոյի մասին» օրենքում նախատեսվող փոփոխությունների մասին օրինագիծը երկրորդ ընթերցմամբ արդեն ընդունել է: Միջազգային կառույցներն առաջարկվող փոփոխություններին վերաբերում են խիստ քննադատաբար: Սակայն Հանրային հեռուստառադիոընկերության խորհրդի նախագահ Ալեքսան Հարությունյանն այդ քննադատությունները համարում է անտեղի: «Օրինակ` ասում են, թե թվայնացման գործընթացի պատճառով սահմանափակվում է ալիքների քանակը, ինչը կարող է բերել նրան, որ «Ա1+»-ը չունենա հաճախություն: Հիմա, եթե «Ա1+»-ը չպետք է ունենա հաճախություն, կլինի 18, 25, թե 50, բայց ինքը չպիտի ունենա, ի՞նչ տարբերություն: Չէ՞ որ նախկինում հաճախություններն ավելի շատ էին եւ «Ա1+»-ը չունեցավ իր հաճախությունը: Այսինքն` խնդիրն այլ բանի մասին է, եւ օրենքի հետ կապ չունի»,- ասում է նա: Ա. Հարությունյանի խոսքերով` այն, որ թվայնացման գործընթացի ընթացքում ինչ-որ մի շրջան հեռուստաալիքների թվաքանակը պակասելու է, շատ բնական է, սակայն տարօրինակ է, որ դա չեն հասկանում միջազգային կառույցները: «Մինչեւ 2015 թ. ունենալու են երկու հեռարձակում` անալոգային եւ թվային: Բնականաբար, այսօր առկա հաճախությունների թիվը թույլ չի տալիս, որպեսզի այն կրկնապատկվի: Բայց 2015 թ. հետո, երբ անալոգային հեռարձակումը կանջատվի, բնականաբար, կառաջանան բազմաթիվ նոր հաճախություններ եւ դրանց վրա կառաջանան բազմաթիվ նոր թվային հեռարձակվող ալիքներ: Այսինքն` մինչեւ 2015 թ. այդ հաճախությունների, ալիքների թիվը մի փոքր կպակասի, բայց 2015 թ. հետո կտրուկ կաճի: Ես սա հասկանալու համար շատ մեծ գիտելիքներ պետք չեն: Ովքեր քննադատում են այդ օրենքը, պետք է նաեւ հասկանան ամբողջ գործընթացը, եւ դա մենք օդից չենք հորինել, բոլոր երկրներում այդ նույն գործընթացն է ընթանում»,- ասում է Ալեքսան Հարությունյանը: Ըստ նրա` միջազգային կազմակերպությունների քննադատությունը պետք է դիտարկել բոկորովին այլ համատեքստում. «Նրանց մոտ միշտ առկա է եղել մի թեմա` «Ա1+», եւ ցանկացած օրենք, եթե այն  նույնիսկ վերաբերվի, ասենք, մարկապարտեզներին եւ այնտեղ իրենք տեսնեն մի բան, որ կարող է վտանգել «Ա1+»-ի եթեր վերադառնալը, ապա այդ քննադատությունը կլինի»: