Արմեն Աշոտյան. «Ավելի լավ է բժիշկ դառնայի, քան թե զբաղվեի նման տեսակի անշնորհակալ աշխատանքով»
ԿԳ նախարարը պայմանավորվեց օտարալեզու դպրոցների դեմ հանդես եկող ցուցարարի հետ հանդիպել 3 տարի հետո
Այսօր ՀՀ Ազգային ժողովը քննարկեց «Լեզվի մասին» և «Հանրակրթության մասին» ՀՀ օրենքներում փոփոխություններ կատարելու մասին նախագիծը, որը քվեարկվելու է վաղը: Երբ Կրթության և գիտության նախարար Արմեն Աշոտյանը դուրս եկավ ԱԺ-ից, ընդդեմ օտարալեզու դպրոցների բողոքի ակցիայի մասնակիցները նրան դիմավորեցին սուլոցներով և տարբեր վանկարկումներով: Որոշ ցուցարարներ և լրագրողներ մոտեցան նախարարին: Արմեն Աշոտյանը պատասխանեց նրանց հարցերին:
Ի՞նչ եք կարծում, պրն նախարար, օրինագիծը կընդունվի՞ առաջին ընթերցմամբ:
Կարծում եմ` վաղը Ազգային ժողովը քվեարկության կդնի, և վստահ եմ, որ կընդունվի, որովհետև այսօր արդեն 3 կոալիցիոն խմբակցությունները հայտնեցին իրենց տեսակետները: Այդ տեսակետները մեզ համար ընդունելի էին, ներգրավված են օրինագծի այն տեսքի մեջ, որի մասին ես խոսեցի քվեարկությունից առաջ, և այդ դեպքում քաղաքական մեծամասնությունը հավանություն է տալիս այս օրինագծին:
Դուք կոնկրետ այս օրինագծի վերաբերյալ Ձեր գործունեության ժամանակ հաշվի առնո՞ւմ եք ընդդիմախոսների կարծիքը:
Անպայման հաշվի եմ առնում: Ես նաև հանդիպել եմ շատ-շատերի հետ և այս սոցիալական խմբի ներկայացուցիչների հետ, և բլոգերների հետ, և առանձին մտավորականների հետ: Տարբեր քննարկումներ եղել են, նույն գործողություններն արել է նաև վարչապետը` հանդիելով երիտասարդների հետ, քննարկելով խնդիրը և այլն:
Հոգեպես ճնշված չեք զգու՞մ. անընդհատ բողոքում են, վանկարկում:
Հոգեպես, իհարկե, պետք է ասեմ, որ այնքան էլ հաճելի չէ երբեմն, բայց թողնում եմ այդ մարդկանց խղճին, որովհետև քար նետելուց բացի նաև երբեմն գալիս է քար հավաքելու ժամանակը:
Պրն Աշոտյան, հայագիտության, հայապահպանության ոլորտում երկարամյա շատ մասնագետներ ասում են, և սա ազգի մի հատվածի ձուլման է բերելու:
Ոչ մի ազգի դա ձուլման չի բերել: Առավել ևս մի ազգի, որի 2/3-ը սփյուռքում է բնակվում, որի 2/3-ը չի բնակվում իր հայրենիքում, չի սովորում իր դպրոցում, և ձուլման հետ կապված խնդիրներն այսօրվա աշխարհում կանգնած են շատ ավելի սուր մշակութային դաշտում, շատ ավելի սուր կանգնած են քաղաքակրթական էքսպանսիայի դեպքում, որ այսօր մենք ունենք, քան այս նախաձեռնության հետ կապված:
Մի՞թե հնարավոր չէ առանց այդ «բացառությամբ» բառը հանելու` այդ դպրոցներին կարգավիճակ տալ:
Մեր ունեցած իրավական գնահատականներով, ցավոք սրտի, դա հնարավոր չէ: Բայց ես առաջարկեցի «Ժառանգությանն» ու Դաշնակցությանը, որ եթե իրենք գտնեն այդ իրավական լուծումը կամ դուք, եթե գտնեք այդ լուծումը, խնդրեմ, լուծումը գտեք և ներկայացրեք:
Դուք ինչպե՞ս եք պատկերացնում: Օտարալեզու դպրոցներ բացվելու պարագայում մեր չափորոշիչների փոփոխություն է լինում, այսինքն` եթե իրենք անցնում են 8 ժամ հայերեն հայկական դպրոցում, 3 ժամ` օտար լեզու, օտարալեզու դպրոցում պետք է անցնեն 8 ժամ անգլերեն կամ ռուսերեն կամ ֆրանսերեն և 3 ժամ հայերեն:
Ձեզ ո՞վ է նման բան ասել: Դուք օրինագիծը կարդացե՞լ եք: Օրինագծում ի՞նչ է գրած:
Եթե օտարալեզու դպրոց բացվի, քանի՞ ժամ պետք է օտար լեզու անցնեն:
Օտար լեզու կանցնեն ավել, իսկ հայերենը կանցնեն այնքան, ինչքան պետք է անցնեն հայկական դպրոցում: Տարբեր դասարաններում տարբեր է: Մոտավորապես հայագիտական առարկների դասավանդման ծավալը օրենքով` հայոց լեզու, գրականություն, հայ ժողովրդի պատմություն և կրոնի պատմություն, երաշխավորված է օրինագծով, նույնը, ինչ հայկական դպրոցում: Դա նշանակում է, որ մոտավորապես ուսումնական ծրագրերի 33-37 %-ը լինելու են հայագիտական առարկաներ հայերեն լեզվով:
Ուրեմն մենք ունենում ենք հայագիտական առարկաների նույն ծավալը, բայց օտար լեզուն ավելանալու է: Իսկ շաբաթական 32 ժամ ծանրաբեռնվածությունը ինչպե՞ս կբացատրեք:
Մենք չենք զբաղեցրել բոլոր ժամերը: Մենք մեր բաղադրիչը պարտադրում ենք բոլոր դպրոցներին: Մնացած դպրոցները այսօր էլ կարող են որոշում կայացնել` տարբեր տեսակի առարկաներ ներմուծելու:
Դա չի՞ լինում օտարալեզու դպրոց:
Դա լինում է երկլեզու դպրոց: Իսկ ո՞վ է ասում օտարալեզու: Օրենքում գրված է օտարալեզո՞ւ դպրոց:
Ամբողջ մամուլում կոչվում է օտարալեզու դպրոց: Այսինքն` Դուք երաշխավորում եք, որ 32 ժամը չի չարաշահվի:
Ես երաշխավորում եմ, որ հայոց լեզվի, հայ գրականության, հայ ժողովրդի պատմության, կրոնի պատմության դասաժամերը մնալու են նույնը, ինչպես կա ցանկացած հայկական դպրոցում: Դա օրենքով սևով սպիտակի վրա գրված է, օրենքն էլ, արդեն մի ամիս է, այդ տեսքով հրապարակված է:
Հնարավո՞ր է, որ թուրքական դպրոց բացվի:
Իհարկե, հնարավոր չէ: Մենք խոսում ենք միջազգային ստանդարտների, միջազգային դպրոցների մասին: Թուրքական մի դպրոցական ցանց կա, որը աշխատում է Միջին Ասիայի, արաբական, ԱՊՀ որոշ երկրներում, բնականաբար, նախարարությունը թույլ չի տա այդ դպրոցի մուտքը Հայաստան: Ինչի՞ մասին է խոսքը: Ինչո՞ւ եք հորինում պրոբլեմ, հետո էդ պրոբլեմի դեմ սկսում ջղայնանալ ու պայքարել:
Պրն Աշոտյան, ավելի ճիշտ չի՞ լինի, որ հանդիպում կազմակերպվի մարդկանց հետ:
Դուք տեսել եք, եթերում քանի անգամ եմ ես ասել, որ ով ցանկություն ունի գալու, ինձ հետ քննարկելու, խնդրեմ: Այդ առաջարկին արձագանքել են մտավորականներ, facebook-ից մի 2 հոգի, բլոգերներ, դասախոսներ են եկել: Ուզում եք` քննարկենք, խնդիր չեմ տեսնում: Մի ամիս է` օրինագիծը այդ տեսքով դրված է, չեք կարդացել, և պարզ է, որ ինչքան էլ ես ասեմ, մինչև դուք ձեր աչքով չտեսնեք, չեք հավատա, ճի՞շտ է:
Մի բան խնդրեմ` 10 րոպեով ինտերնետ ակումբ մտեք, տեսեք Ազգային ժողով, «Նախագծեր» բաժնում ինչ օրինագիծ է դրված քվեարկության և կտեսնեք, որ օտարալեզու դպրոց հասկացություն չկա: Կա օտար լեզվով դասավանդում: Կտեսնեք, որ հայագիտական առարկաների երաշխավորված չափաքանակները հատուկ ես եմ ավելացրել` հանրակրթական պետական չափորոշիչին համապատասխան: Նշանակում է` նույն ծավալով: Ես վստահ եմ, որ հավաքվածների կեսը առնվազն խորությամբ խնդիրը չի ուսումնասիրել և զգացմունքային դաշտում է:
Այսինքն` մեծ պատի՞վ եք համարում, որ հայագիտական առարկաները հայերեն պիտի դասավանդվեն:
Ես երաշխիք եմ համարում դա, որ հայկական կրթությունը լինելու է: Ես պատվի մասին չեմ խոսում:
Մե՞ծ պատիվ է, որ հայկական դպրոցները լինելու են:
Ես պատվի մասին չեմ խոսում:
Դուք այնպես եք ասում, կարծես մեծ պատիվ է մեզ համար, որ Հայաստանում հայկական դպրոցներ են լինելու:
Դուք էիք խոսում հայագիտական առարկաների դասավանդման երաշխիքների մասին: Ես գրեցի, չէ՞, դա: Զուգահեռաբար հայկական դպրոցները պետք է զարգանան: Մերն է, ուրեմն հայկական է:
Արդյունքը չկա, պրն Աշոտյան:
Ես մի քանի անգամ ասել եմ` արդյունքը չկա տարբեր պատճառներով: Արդյունքը կա, բայց շոշափելի չի և տեսանելի չի, որովհետև հասարակության ներսում գիտելիքի նկատմամբ պահանջարկը վերջնական ձևավորված չի:
Եթե օտարալեզու դպրոցներ լինեն, հասարակության պահանջարկը գիտելիքի նկատմամբ կբարձրանա՞:
1995 թ.-ին «Լեզվի մասին» օրենքը փոխվեց: Դուք 1995 թ.-ի օրենքի փոփոխությունը հիշո՞ւմ եք:
Իհարկե, հիշում եմ:
Պայքարո՞ւմ էիք այն ժամանակ:
Իհարկե, պայքարում էի:
Ինչի՞ մասին էր այդ օրենքի փոփոխությունը` որ բացառություն արվի բուհերի համար:
Ոչ, որ այսօրվա համար Դուք ավելի մեծ հող ստեղծեք, որ վաղը իջնեք ներքև` մանկապարտեզից սկսեք:
Ես 1995 թ.-ին բժշկականի 3-րդ կուրսի ուսանող էի:
Երանի մնայիք բժշկականում, չգայիք էս դաշտ, էնտեղ ավելի օգուտ կտայիք:
Ես Ձեզ ասեմ` ես էլ եմ կարծում էդպես: Ես էլ եմ համաձայն էդ կարծիքի հետ: Ավելի լավ է բժիշկ դառնայի, քան թե զբաղվեի նման տեսակի անշնորհակալ աշխատանքով:
Դեռ ուշ չէ, կարող եք վերադառնալ:
1995 թ.-ին «Լեզվի մասին» օրենքը փոխվեց, որպեզի թույլատրվի 3 միջպետական բուհի գործունեություն: Անցավ 15 տարի: Ֆրանսիական համալսարանի շրջանավարտը վա՞տ շրջանավարտ է, սլավոնական համալսարանի շրջանավարտը վա՞տն է, Ամերիկյան համալսարանինը վա՞տն է: Նույնը մենք առաջարկում ենք դպրոցական մակարդակով:
Դուք ստեղծեք լավագույն հիմքերով հայկական դպրոց:
Եթե այդքան հեշտ լիներ, նորանկախ պետության ինձանից առաջ աշխատած 16 կրթության նախարարները կանեին:
Ի՞նչն է խանգարում Հայաստանում ունենալ լավագույն հայկական դպրոց: Մայրենիի հիման վրա դուք դպրոցներում սովորեցրեք տասնյակ լեզուներ: Մենք շնորհակալ կլինենք:
Ենթադրում եմ, որ Դուք ինձանից լավ եք հասկանում կրթության ոլորտից, չէ՞: Ես Ձեզ խնդրում եմ` 2 էջի վրա բանաձևեք Ձեր առաջարկները, որ Դուք կարծում եք` միանգամից ու հեշտ կարող ենք անել, ուղարկեք նախարարություն: Խոստանում եմ բոլորին, մեր ընկերներին կհրավիրենք միասնական քննարկման:
1600 տարի այդ դպրոցները եղել են: Վերջին 20 տարի եղածին չգիտեմ ինչ ավելացրիք: Դուք տեղյա՞կ եք, որ համալսարանում հայոց լեզվի քննությունը ուսանողները ծնկների վրա են գրում:
Էդ բուհերում և դպրոցներում ովքե՞ր են աշխատում: Հասատատ Ձեր և իմ բարեկամները, ծանոթները:
Այսինքն` հասարակությո՞ւնը պիտի կարգավորի: Դուք ինչի՞ համար եք նախարար:
Հարկավոր է բացառել կոռուպցիան: Էդ օրենքները ընդունված են, էդ ակտերը գործում են: Ընդամենը մեր բոլորի գիտակցության մեջ է, որ դա չի գործում:
Դուք սովորո՞ղ եք:
Ես ավարտել եմ:
Տարիների ընթացքում կաշառքի հետ առնչվե՞լ եք բուհում:
Ես չեմ տվել:
Դուք չեք տվել, բայց գիտեք, չէ՞, ով է տվել: Բա ինչի՞ եք ինֆորմացիա իմացել ու թաքցրել: Դիմեիք դեկանատ, ոստիկանություն: Մենակ ե՞ս պետք է բոլորի դեմ պայքարեմ:
Կաշառակեր դասախոսների նկարները փակցրին, բայց ի՞նչ եղավ այդ դասախոսներին:
Մի խոսքով, զրույցը անցավ ջերմ մթնոլորտում:
Սա, փաստորեն, բերելու է ռուսական դպրոցների բացմանը:
Չկա էդպիսի բան: Չեք հավատու՞մ, որ ասում եմ: Դուք կարդացե՞լ եք օրինագիծը: Էնտեղ ի՞նչ է գրած: Գրած է, որ միևնույն լեզվով դասավանդվող դպրոցների թիվը 4-ից ավելի չի լինելու:
Այդ կետը շրջանցելը շատ հեշտ է` օրենքում փոփոխություն մտցնելով: Մի նիստով կորոշեք:
Օրենսդրական գործունեությունը թույլ չի տալիս:
Թույլ է տալիս:
Ես մազոխի՞ստ եմ, ըստ Ձեզ, հա՞: Օրենքը թույլ է տալիս, 2 ամիս է` ընկել եմ հասարակական քննարկումների հորձանուտի մեջ, հա՞:
Դուք մազոխիստ եք, թե չէ` դա չի մեր խնդրը:
Իսկ իմ խնդիրը էն է, որ քննադատությունը գոնե կոնստրուկտիվ լինի և բանիմաց: Կարդացեք, նոր ասեք` խնդրում եմ:
Հայոց լեզուն մեր միակ զենքն է այս գլոբալիզացված աշխարհում:
Իսկ ո՞վ ասաց` չէ:
Եթե Դուք օրենքը հանեցիք, մեր լեզուն դնում եք շատ անշահեկան վիճակում:
Ո՞վ է օրենքը հանում: Ցավոք, քննադատության 90 %-ը կոմպետենտ չէ: Հիմա որ ես լավ անգլերեն եմ խոսում, ես հայ չե՞մ: Հիմա որ լավ ռուսերեն եմ խոսում, կամ որ Դուք լավ ռուսերեն եք խոսում, Դուք հայ չե՞ք: Դիցուք, չկա այս օրենքը: Դուք գո՞հ եք մեր հասարակության հայրենասիրության մակարդակից: Ուզում եմ ասել, որ կապ չունի մեկը մյուսի հետ: Այսօր ավելի վտանգավոր են ազգային անվտանգության տեսակետից չկարգավորվող տեղեկատվական հոսքերը, ինտերնետը, մշակութային էքսպանսիան:
Այս օրինագիծը արմատականորեն ազդելո՞ւ է մեր կրթական համակարգի վրա:
Արմատականորեն չի ազդելու, որովհետև ոչ մի համադարման` պանացեա, մի 2-3 դպրոցով չի կարող լինել:
Մեր հասարակությունը օտարամոլ է, ազդելու է:
Մենք միակ ժողովուրդն ենք, որն ունի «Կիկոսի մահի» նման հեքիաթ:
Դա բացարձակապես «Կիկոսի մահ» չէ: Օտարամոլության կայծ եք գցում:
Օտարամոլություն չունե՞նք այսօր:
Ունենք: Ձեր որոշումն ավելի է խորացնում:
Դուք վախենում եք, որ մեր հասարակությունը չի՞ կարող համապատասխան ուժ գտնել իր մեջ դիմադրելու:
Ես վախենում եմ, որ այս օրինագծի անցնելու դեպքում ավելի կխորանա օտարամոլությունը:
Իսկ եթե օրինագիծը անցնելուց մի 3 տարի հետո մենք հանդիպենք, 20 տարի հետո, Դուք կասե՞ք, որ այդպես չի:
3 տարի հետո:
3 տարի հետո: Պայմանավորվեցինք:
Մենք 80 թվին հանդիպել ենք արդեն: Ռուսական դպրոցները մեզ կերան 80 թվին արդեն: Մենք նորից նույն կինոն նայելու կարիք չունենք: Մենք դա տեսել ենք արդեն:
Սա ուրիշ բան է:
Լեզուն հանեցիք` մենք կորանք:
Իսկ ճի՞շտ էր 88 թվին արմատախիլ անել այդ ամենը:
Թարախակալած վերքը լանցետով կիսում են:
Մենք հեռացրինք, մենք չկիսեցինք: Մենք թացը չորի հետ խառնեցինք 88-89-ին, նկատի ունեմ ռուսական դպրոցները:
Մենք ճիշտ արեցինք, մենք ճար չունեինք, դա այն քաղցկեղն էր, որ մեր մեջից մեզ ուտում էր:
Էնտեղ վա՞տ ուսուցիչներ կային, վա՞տ դասավանդման մեթոդներ:
Դա կապ չունի. քո երեխան ռուսական մտածողություն էր ձեռք բերում: Կապ չունի` բարձր մտածողություն, թե՞ ցածր մտածողություն:
Իսկ հայկական դպրոց ավարտած ստահակներ (կներեք բառի համար) քի՞չ գիտեք Ձեր կյանքում:
Ես հայկական դպրոց եմ ավարտել, բերեք Ձեր ռուսականներին, թող ինձ հետ մրցեն: Հայոց լեզուն չէ կրթության մակարդակի մեղավորը:
Իսկ ո՞վ է ասում:
Հայկական դպրոցը մեր միակ հույսն է այս աշխարհում: Պրն Աշոտյան, Դուք Ձեզ լա՞վ եք զգացել, երբ ռուսական դպրոց եք գնացել:
Ես լավ եմ զգում ինձ, երբ գիտելիք ունեմ էս աշխարհում:
Գիտելիքի մասին չէ խոսքը: Երբ դպրոց եք գնացել, լա՞վ էր, որ հայերեն տառերի փոխարեն ռուսերեն տառեր էիք անցնում:
Իսկ ո՞վ ասաց, թե ես հայերեն չգիտեի` ըստ Ձեզ:
Ես առաջին դասարանի մասին եմ ասում:
Ես գերազանցությամբ սովորել եմ բոլոր դպրոցներում, որտեղ սովորել եմ:
Ընդհանուր պատասխան եք տալիս:
Որովհետև ընդհանուր հարց եք տալիս, և տա Աստված, հայկական կրթությամբ շատ ու շատ մարդիկ, որոնք ինձ այսօր քննադատում են, իմ կեսի չափ հայերեն իմանային: Եղա՞վ:
Սերունդները Ձեզ չեն ների:
Հ.Գ. Զրույցի ժամանակ նախարարին մոտեցավ «Պառլամենտ» ամսագրի ներկայացուցիչը և նախարարին ամսագրի մի համար նվիրեց: Արմեն Աշոյանն էլ ասաց, որ պառլամենտ բառը օտարալեզու է և այն պետք է խորհրդարան դարձնել:
1600 տարի այդ դպրոցները եղել են: Վերջին 20 տարի եղածին չգիտեմ ինչ ավելացրիք:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել