Ձերբակալված անձանց պահելու վայրերում վերահսկողություն իրականացնող հասարակական դիտորդ խմբի 2009 թ. հաշվետվության ժամանակ խմբի նախագահ Սուրեն Իսկանդարյանը, անդրադառնալով ՁՊՎ-ներում պահվող անձանց տեսակցության, զանգահարելու, բուժօգնություն ստանալու եւ զբոսնելու իրավունքներիր խախտումներին, առանձնացրեց նաեւ վերջիններիս սնվելու եւ հանձնուքի խնդրին: ՁՊՎ-ում պահվող յուրաքանչյուր անձի համար պետությունը հատկացնում է 450 դրամ, ինչով, ըստ Ս. Իսկանդարյանի, հնարավոր չէ մարդուն օրական 3-անգամյա սնունդով ապահովել: Խնդիրը մինչ օրս բաց է եւ խմբի նախագահի խոսքերով` անհապաղ լուծում է պահանջում: Ինչ վերաբերում է հանձնուքին, Սուրեն Իսկանդարյանը նշում է, որ Հայաստանում չկա գոնե մեկ ՁՊՎ, որ ունենա հանձնուքի ընդունման առանձին սենյակ: Բացի այդ, ՁՊՎ-երի ներքին կանոնակարգով` «հանձնուքը պետք է փոխանցվի հասցեատիրոջը այն ստանալուց մեկ ժամից ոչ ուշ»: Բայց ոստիկանները ոչ միայն ձերբակալվածներին թույլ չեն տալիս հանձնուքները պահել իրենց խցերում, այլեւ որոշ դեպքերում դրանք ուղղակի չեն հասնում հասցեատիրոջը: «Հանձնուքը ո՞նց թողնենք ձերբակալվածի մոտ: Ամռան այս շոգի հետեւանքով քանի՞ րոպե հետո այն կփչանա: Խցում պահելու պայմաններ չկան, եւ դա միայն ձերբակալվածի ցանկությունով չէ, բա որ թունավորվե՞ց»,- հակադարձեց Ոստիկանության ՀԿԱ վարչության պետի տեղակալ Կարեն Մեհրաբյանը` ընգծելով, որ այստեղ նաեւ անվտանգության խնդիր կա: Վերջինս նշեց, թե ձերբակալվածների հանձնուքները պահվում են սառնարաններում, մինչդեռ Սուրեն Իսկանդայանը նկատեց, որ բոլոր ՁՊՎ-ներում չէ, որ կան սառնարաններ: