Այսօր կազմակերպված մամուլի ասուլիսին լրագրողները Արցախը ճանաչելու մասին օրենքի նախագծի վերաբերյալ հարցեր ուղղեցին Ազգային ժողովի Սոցիալական հարցերի մշտական հանձնաժողովի նախագահ, ՀՀԿ խմբակցության պատգամավոր Հակոբ Հակոբյանին:

Հոկտեմբերի 5-ին ԱԺ-ում քննարկվելու է ԼՂ անկախության ճանաչման մասին օրինագիծը: Խնդրում եմ կոնկրետ պատասխանել` անձամբ Դուք և Հանրապետական կուսակցությունը կո՞ղմ եք քվեարկելու, թե՞ դեմ եք քվեարկելու:

-Հանրապետական կուսակցությունը այսօր իշխող կուսակցություն է, և Հանրապետական կուսակցությունը Ազգային ժողովում հայ ժողովրդի` Հայաստանի Հանրապետության և Լեռնային Ղարաբաղի Հանրապեության ճակատագրին, պատմությանը վերաբերվող խնդիրները ինքը կքննարկի և լուծումը կտա:

Այսինքն` դեռ որոշված չէ՞` կո՞ղմ է քվեարկելու, թե՞ դեմ:

-Այսօր որոշված չէ:

Իսկ անձամբ Դուք կո՞ղմ եք քվեարկելու, թե՞ դեմ:

-Չեմ կարծում, որ կա որևէ հայ, որը դեմ լինի Լեռնային Ղարաբաղի անկախությանը: Եվ կարծում եմ` կլինեն պատգամավորներ, որովհետև քաղաքական մեծամասնությունը հանրապետական է, և եթե քաղաքական մեծամասնությունը հիմնավորեց, որ այսօր պետք չէ ճանաչել Լեռնային Ղարաբաղի անկախությունը, մենք չենք ճանաչի, որովհետև սա ոչ թե մենք անում ենք մեր անձի համար, որոշումը քաղաքական է, և խնդիրը միայն ու միայն Լեռնային Ղարաբաղի անկախությունը ճիշտ և ժամանակին ճանաչելն է:

Այսինքն` կուսակցությունը Ձեր փոխարեն պետք է որոշի` ինչպես քվեարկեք:

-Կուսակցությունը մենք ենք, մենք ենք որոշելու:

Կոնկրետ Ձեր փոխարեն:

-Մենք ենք որոշելու:

Դուք ի՞նչ եք որոշելու:

-Դա պետք է քննարկել:

Դուք անձամբ:

-Լավ էլի:

Ի՞նչ եք ուզում Դուք:

-Կա՞ որևէ մեկը, որ դեմ է Լեռնային Ղարաբաղի անկախությանը: Էդպիսի մեկը կա՞:

Օրինակ` ես դեմ եմ. ես ուզում եմ` Ղարաբաղը միացած լինի ՀՀ-ին: Շատերը կողմ են միացմանը, ոչ թե անկախությանը:

-Դա ուրիշ խնդիր է:

Դուք ասում եք` «կա՞ որևէ մեկը, որ դեմ է անկախությանը», բայց շատերը կողմ են միացմանը:

-Էստեղ խնդիրը ոչ թե` ինչ օրինագիծ քննարկեց, ով առաջարկեց, ով բերեց, այլ խնդիրը նա է, թե որն է ճիշտ Լեռնային Ղարաբաղի հարցի լուծմանը: Սա ուրիշ խնդիր է: Դուք թողել եք հիմնականը, ընկել եք չգիտեմ ինչի հետևից: