Օրենքի առաջ բոլորն էլ հավասա՞ր են
Այսօր ««Զենքի մասին» ՀՀ օրենքի կիրարկման կարգը» թեմայով ոստիկանությունում ասուլիս էր տալիս Հասարակական կարգի ապահովման վարչության պետի տեղակալ Կարեն Մեհրաբյանը: Նա մանրամասնում էր, օրինակ, թե զենք կրելու իրավունքի համար ինչ պարտադիր պայմաններ են գործում կամ ովքեր իրավունք ունենք զենք նվիրել կամ պարգեւատրել:
Լրագրողները բանախոսին հիշեցրին մի քանի աղմկահարույց դեպքերի մասին, մասնավորապես Ստեփանավանի քաղաքապետի կողմից զենքի կիրառման հայտնի դեպքը կամ Գյումրու քաղաքապետի ասածը, որ ինքը «գժի թուղթ» ունի: Բայց, այդքանով հանդերձ, վարչապետը վերջինիս պարգեւատրել է զենքով:
«Զենք տալուց առաջ քաղաքացին պետք է ներկայացնի համապատասխան փաստաթղթեր, որոնցից մեկն առողջության մասին եզրակացությունն է եւ դատվածության մասին տեղեկանքը, որը մենք ենք ստուգում: Եթե քաղաքացին չի ներկայացնում փաստաթղթերը, եթե նա հոգեկան հիվանդության կամ թմրամոլության հետ կապված խնդիրներ ունի, բնականաբար, նա զենք չի կրի: Իսկ հիմա, թե ձեր ասած անձինք ինչպես են թուղթ ներկայացրել կամ այդ որտեղից նրանց, ես իրավասու չեմ պատասխանել: Բայց, ամեն դեպքում, զենքը մինչեւ չստուգվի, անձը մինչեւ չստուգվի, ոստիկանությունը երբեք զենք չի տրամադրում»,- արձագանքեց Կարեն Մեհրաբյանը:
«Իսկ Ձեզ չե՞ն անհանգստացնում այդ դեպքերը: Ասենք, Վահան Հարությունյանը «Առագաստում» զենքով Գյումրվա պար էր պարում: Չե՞ք փորձում հակափաստարկներ ներկայացնել, որ այդ մարդկանց մոտից զենքերն առգրավվեն»,- հակադարձեց լրագրողներից մեկը:
«Օրենսդրությունը սահմանում է, իհարկե, կանխարգելիչ միջոցներ, որ եթե զենքն օգտագործվել է ոչ նպատակային կամ ոչ դրա համար նախատեսված վայրում, դա նախատեսում է պատասխանատվություն: Ինչի՞ մասին է խոսքը, միանշանակ»,- հնչեց պատասխանը: Գնդապետ Մեհրաբյանն իր խոսքում նաեւ նշեց, թե օրենքի առաջ բոլորն էլ հավասար են, ու եթե որեւէ մեկը զենքն օգտագործում է օրենքի նախանշած սահմանների խախտմամբ, հարուցվում է քրեական գործ, ինչի շրջանակներում էլ վերջինիցս զենքն առգրավվում է:
«Այդ դեպքում ինչո՞ւ են հիշյալ անձինք շարունակում զենք կրել, արդյոք դա չի՞ նշանակում, որ ոստիկանությունն իր պայքարում թերանում է»,- շարունակեցին համառել լրագրողները:
«Իսկ դուք համոզվա՞ծ եք, որ նախաքննության ընթացքում նրանց մեղքն ապացուցվել է կամ նրանք դատապարտվել են»,- նկատեց Կարեն Մեհրաբյանը: Հարցերից մեկին ի պատասխան էլ նա տեղեկացրեց, որ ԱԺ պատգամավորներն իրենց պաշտոնավարման ընթացքում ոստիկանությունից ժամանակավոր ստանում են հրազեն: Նրանց թիկանապահներն էլ, եթե Պետական պահպանության վարչության աշխատակիցներ են, այսինքն` ոստիկաններ, կրում են օրինական զենք. «Իսկ ոչ ոստիկան թիկնապահները կրում են միմիայն քաղաքացիական զենք` գազային ատրճանակ, որոնք միանշանակ հաշվառվում են»:
Մեհրաբյանի ներկայացմամբ` ներկայումս Հայաստանում հաշվառված է քաղաքացիներին պատկանող 45 հազար 822 միավոր զենք, որից 3 հազար 683-ը` որսորդական ակոսափող, 33 հազար 648-ը` որսորդական ողորկափող, 2011 պարգեւատրական, 6231 գազային եւ 72 հավաքածու` 247 զենքով: Այս տարվա ընթացքում քաղաքացիներին տրվել է 2812 միավոր զենք:
«2010թ. 8 ամսվա ընթացքում գրանցվել է 10 հազար 279 հանցագործության դեպք, որոնցից 35-ն է կատարվել հրազենով: Դրանցից շուրջ 10 տոկոսն է կատարվել հաշվառված, օրինական զենքով` 3-4 դեպք»,- նշեց բանախոսը: Իսկ թե հանրապետությունում չհաշվառված քանի զենք կա, որստիանությունը չգիտի:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել