Ցավալի վնասվածքի պատճառով մեր մարզիկը դուրս մնաց հետագա պայքարից Երեկ Թուրքիայում անցկացվող ծանրամարտի աշխարհի առաջնությունում իր ելույթը հրաշալի սկսեց Արա Խաչատրյանը: 85 կգ քաշային կարգում հանդես եկող ծանրորդը պոկում վարժությունում բարձրացրեց 175 կգ-անոց ծանրաձողը և նվաճեց փոքր ոսկե մեդալ` անգերազանցելի դառնալով մյուս բոլոր մրցակիցների համար: Հրում վարժությունում Արա Խաչատրյանը պատվիրել էր 201 կգ: Սակայն վարժության հենց առաջին մոտեցման ժամանակ դժբախտաբար Արան այնքան ծանր վնասվածք ստացավ, որ սկսեց գալարվել ցավից: Հայազգի մարզիկը, ով չեմպիոնի տիտղոսի գլխավոր հավակնորդն էր, չկարողացավ շարունակել ելույթները: Արա Խաչատրյանը տեղափոխվեց հիվանդանոց: Նա կոտրվածքներ չունի, սակայն մկանային ծանր վնասվածք է ստացել: Պարգևատրման ժամանակ Արայի նվաճած փոքր ոսկին ստացավ մարզիչը: Երեկ ծանրամարտի աշխարհի առաջնությունում անհաջող հանդես եկավ Հայաստանը ներկայացնող մեկ այլ ծանրորդ` Տիգրան Վ. Մարտիրոսյանը: Նա զրո ստացավ պոկում վարժությունում և այլևս չմասնակցեց հրում վարժությանը: 85 կգ քաշային կարգում երեկ չեմպիոն դարձավ Լեհաստանի ներկայացուցիչ Ադրիան Ժելինսկին, ով հրում վարժությունում բարձրացրեց 211 կգ-անոց ծանրաձողը և ցույց տվեց երկամարտի 383 կգ արդյունք: Հիշեցնենք, որ սեպտեմբերի 23-ին 77 կգ քաշային կարգում Տիգրան Գ. Մարտիրոսյանը նվաճեց ոսկե մեդալ, իսկ նախորդ օրը բրոնզե մեդալի էր արժանացել Մելինե Դալուզյանը: Լուսանկարը` armsport.am կայքից