Արամ Կարապետյանի խորհուրդը Սերժ Սարգսյանին

Մոսկվայի արդեն նախկին քաղաքապետ Յուրի Լուժկովի պաշտոնանկությունն այդքան մեծ արձագանք ստացավ Հայաստանում, քանի որ Լուժկովը համարվում էր Ռոբերտ Քոչարյանի և Սերժ Սարգսյանի լուրջ բիզնես գործընկեր, և հայկական, հատկապես ղարաբաղյան թևի ակնառու ներկայացուցիչներ, որոնք մեծ բիզնեսներ ունեն Մոսկվայում, ևս համարվում են այդ կլանի մաս: Այս մասին ասաց «Նոր ժամանակներ» կուսակցության նախագահ Արամ Կարապետյանը:

«Կարծում եմ` մոտակա ամսվա մեջ էլի կտեսնեք որոշակի նմանատիպ խնդիրներ` թե Լուժկովի գործի հետ կապված, թե այլ գործերի, որն իր ազդեցութունը կունենա նաև Հայաստանի դաշտի վրա»,- ասաց Արամ Կարապետյանը: Մոտ 20 օր առաջ արդեն Լուժկովի կլանի հետ կապ ունեցող հայ գործարարները սկսել էին վաճառել Մոսկվայի կենտրոնում իրենց ունեցած օբյեկտները: «Բացահայտ ցուցակով ինձ տալիս էին, այսինքն` այս օրը այսքան մարդ է վաճառել, դրանց մեջ` այսքան հայ: Եվ այս մարդիկ ցանկություն ունեին իրենց սեփականությունից ազատվելու: Ուրեմն միանշանակ գիտեին, որ մի 20 օր հետո ինչ-որ բան լինելու է»,- ասաց Արամ Կարապետյանը: Նրա խոսքերով` երբ Լուժկովը Ավստրիայում էր, այնտեղ հավաքվել էին նաև բավականին խոշոր գործարարներ Ռուսաստանից և այլ երկրներից ու քննարկել, թե ինչ անել իրենց ունեցածը: «Եթե այդպես է լինելու, և սեփականությունը վերցնելու են, ուրեմն պարզ է, որ սեփականության վերցնելը գալու հասնելու է Հյուսիսային պողոտա, Նորագյուղ, Մոսկվայի տուն, որը երևի պիտի ստուգվի»,- ասաց ՆԺԿ նախագահը: Նա նշեց, որ դեռ Ելցինի իշխանության որոշմամբ Լուժկովին տրվել է Կովկասի տնտեսական կուրատորի դեր: Լուժկովը տնտեսական շահեր ուներ ոչ միայն Հայաստանում, այլև Վրաստանում, Ադրբեջանում` Ալիևների կլանի հետ և այլն: «Ես, օրինակ, հիմա մի քիչ դժվար եմ հասկանում` Ռոբերտ Քոչարյանը ինչ է անելու: Ռոբերտ Քոչարյանին մի բան է մնում` մի ստատուս ձեռք բերել, որովհետև ոչինչ չունի (բացի փողից), չունի լոբբինգի այդ մեխանիզմը Մոսկվայում: Իմ կարծիքով` ամեն ինչ պիտի անի, որ վարչապետ դառնա, այսինքն` ստատուս ձեռք բերի»,- ասաց Արամ Կարապետյանը: Լուժկովի պաշտոնանկությունից հետո 17 քրեական գործ է հարուցված: Եթե հաշվի առնենք, որ նրա կինը` Ելենա Բատուրինան, 58 օբյեկտ ունի Մոսկվայում, մոտ 100 քրեական գործ էլ դեռ կարող է հարուցվել, և սեփականության վերաձևում կլինի: ՆԺԿ նախագահի համոզմամբ` Մեդվեդևի վերջին այցից հետո և Հայաստանում, և դրում Հայաստանն ընկալվում է որպես Ռուսաստանի մարզ, որտեղ ռուսները գալիս, խնդիրներ լուծում ու գնում են, և սա է պատճառը, որ Յուրի Լուժկովի պաշտոնակությունն այդպիսի մեծ արձագանք ստացավ Հայաստանում: «Բոլոր խնդիրների լուծման ճանապարհը հիմա ավելի շատ կապված է Մոսկվայի հետ, քան Երևանի: Դա հայ ազգի ցանկությունը չի եղել և ոչ էլ ռուս ազգի: Չգիտեմ` Մեդվեդևինը եղե՞լ է, թե՞ չէ, բայց իշխանությունն ինքն է այստեղ ներկայացրել, որ տեսեք` սա այնպիսի մեծ գործ է, և կարելի է համարել, որ Սերժ Սարգսյանը շատ ուժեղացավ նրանից, որ Մեդվեդևը եկավ և պայմանագիր ստորագրեց»,- ասաց Արամ Կարապետյանը: Քանի որ Սերժ Սարգսյանի հետ կապվելու այլ ճանապարհ չունի, ՆԺԿ նախագահը լրագրողների միջոցով ՀՀ նախագահին խորհուրդ տվեց չմոռանալ Բելառուսի նախագահ Լուկաշենկոյի դեպքը: Լուկաշենկոն Ելցինի, Պուտինի, իսկ հետո նաև Մեդվեդևի ամենամոտ ընկերն ու բարեկամն էր: Բայց հիմա այդ ջերմ հարաբերություններն այլևս չկան: «Ֆիլմ էին նկարահանել, կոչվում էր «Дураки на дорогах»: Շատ հետաքրքիր է, որ Լուկաշենկոն ինքը հենց ասաց, որ սատարել է այդ ֆիլմին: Եվ ցույց էին տալիս` Պուտինը ոնց է գնում Ալթայով: Հետո ասացին, որ ուզում էին սպանել Լուկաշենկոյին և այլն: Այսինքն` երեկվա ամենամոտ ընկերները դարձել են այսօր ամենալուրջ թշնամիներ: Դրա համար ուզում եմ Սերժ Սարգսյանին մի անգամից ասել, որ այսպիսի քաղաքական ենթատեքստով, մանավանդ մեր տարածաշրջանում, երբ արագ է ամեն ինչ փոխվում, անձնական-ընկերական հարաբերությունները որևէ բան չեն նշանակում, վաղը կարող են դառնալ թշնամական, Աստված չանի: Այսինքն` շահերով պիտի շարժվել»,- ասաց Արամ Կարապետյանը: