HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Էդիկ Բաղդասարյան

Ռոբերտ Քոչարյանի որոշմանը սպասելիս

 Ներիշխանական եւ ներքաղաքական խմորումները շարունակվելու են այնքան ժամանակ, քանի դեռ երկրորդ նախագահ Ռոբերտ Քոչարյանը չի կայացրել իր որոշումը` վերադառնալո՞ւ է «թոշակից» մեծ քաղաքականություն, թե՞ իրականացնելու է միայն բիզնես պրոյեկտներ` դրանք զուգորդելով իր սիրելի որսով:

Եթե Քոչարյանը որոշի վերադառնալ, ապա դա անելու է ԲՀԿ-ի եւ ՀՅԴ-ի միջոցով: Ընթացքում հնարավոր է միանան նաեւ այլ մանր-մունր կուսակցություններ: Չի բացառվում նոր ուժի ստեղծումը: Հայտնի է, որ ինչ-որ մարդիկ պատրաստվում են ստեղծել նման ուժ: Նրանք սպասում են Քոչարյանի հրահանգին: ԲՀԿ-ն եւ ՀՅԴ-ն հավասարազոր ուժեր չեն:

ՀՅԴ-ն հրաժարվեց կոալիցիայից, բայց շարունակում է իր թեւերին կրել իշխանության ստվերը եւ դրանից ազատվելու ցանկություն, կարծես, չունի: ԲՀԿ-ի դեպքում իրավիճակն այլ է. այն լուրջ վարկանիշ ունի, եւ եթե նրա նկատմամբ որոշակի ճնշումներ սկսվեն, ԲՀԿ-ի վարկանիշն էլ ավելի կբարձրանա: Չնայած մամուլի տեղեկություններին, ԲՀԿ-ի նկատմամբ իրականում դեռ ճնշումներ չեն եղել:

Հանրապետական Հովիկ Աբրահամյանը դեռեւս ԲՀԿ չէ, թեեւ Գագիկ Ծառուկյանի խնամին է: Նույնը կարելի է ասել նաեւ Ծառուկյանի մյուս խնամու` Ուկրաինայում Հայաստանի դեսպան Անդրանիկ Մանուկյանի մասին: Ընդհանրապես, Հայաստանում այս կամ այն կուսակցության անդամ լինելը ոչինչ չի նշանակում: Որեւէ մեկը կարո՞ղ է ասել, թե իրականում ո՞ւմ մարդն է Հարություն Քուշկյանը:

Գագիկ Ծառուկյանի՞, թե՞ Սերժ Սարգսյանի, եւ եթե Քուշկյանը ընտրության առջեւ կանգնի, ապա կմնա Ծառուկյանի՞, թե՞ Սերժ Սարգսյանի կողքին: Քուշկյանին ճանաչողները համոզված են, որ նա Սերժ Սարգսյանի հետ է: Բոլորին էլ հայտնի է, որ, ասենք, հանրապետական Կարեն Ճշմարիտյանը, որքան էլ հանրապետական խաղա, միեւնույն է` Ռոբերտ Քոչարյանի թիմից է:

Առաջիկա ընտրությունները դժվար են լինելու պատգամավորների մեծ մասի համար: Ճիշտ է, նախկին «առնետավազքերի» ժամանակ նրանք կարողանում էին ժամանակին այս թիմից այն թիմ անցնել, բայց Սերժ Սարգսյանը կրկնակի թակարդներ է լարել նրանց «բռնելը» հեշտացնելու համար: Այդ պատգամավորներն այնքան «մեղքեր» են գործել իրենց կարողությունները դիզելիս, որ հարյուր տարի էլ անցնի` չեն կարողանալու «մաքրվել»:

Այս անգամ խաղադաշտը շատ նեղ է, մանեւրելու տեղ գրեթե չկա: Հենց սա է լինելու խաղի նոր կանոնների հիմնական առանձնահատկությունը` նեղ խաղադաշտում արագ մանեւրելու կարողությունը: Սա բավական դժվար է լինելու, քանի որ Ռ. Քոչարյանն ուշացնում է իր որոշումը: Այն կարող է հիմնովին փոխել Հայաստանի քաղաքական դաշտը:

Դժվար է կանխատեսել արդյունքները, եթե նախընտրական փուլն ընթանա երեք նախկին նախագահ-թեկնածուներով: Քոչարյանի համար դժվար է նաեւ վերադառնալու որոշում կայացնելը` դուրս գալ մի մարդու դեմ, ով տասը տարի սատարել է իրեն:

Քոչարյանն իր շրջապատով ներքաշված է բազմաթիվ բիզնես ծրագրերի մեջ: Ինչքան էլ տարօրինակ լինի շատերի համար, սակայն Ռոբերտ Քոչարյանն ու Սերժ Սարգսյանը համատեղ բիզնես չունեն: Վերադառնալու որոշումը Քոչարյանի համար նախ նշանակում է վտանգել իր հիմնական բիզնես ծրագրերը: Բայց այն նաեւ նշանակում է ստանալ դրանք բազմապատկելու հնարավորություն: Իհարկե, որոշիչ է լինելու ռուսական գործոնը: Ի՞նչ դիրքորոշում ունեն Դ. Մեդվեդեւն ու Վ. Պուտինը:

Ո՞ւմ են նրանք ուզում 2013 թ. տեսնել Հայաստանի նախագահի պաշտոնում` հայտնի չէ, քանի որ կանխատեսելի չէ նաեւ Ռուսաստանի հաջորդ նախագահի անունը: Ամենատխուրն այն է, որ նման հաշվարկներում հաշվի չի առնվում ժողովրդի գործոնը: Եւ դա այդպես է ոչ միայն Հայաստանում, այլեւ բոլոր ավտորիտար երկրներում:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter