ՀՀԿ-ն ՀԱԿ-ից չի վախենում
Որովհետեւ ՀԱԿ-ն ունի սերնդափոխության խնդիր
Ինչո՞ւ իշխանությունները Հայ ազգային կոնգրեսին չեն թույլատրում հանրահավաքներն անցկացնել Ազատության հրապարակում: Արդյոք դա չի՞ նշանակում, որ ՀԱԿ-ից վախենում են: Հարցն այսօր «Հենարան» ակումբում տեղի ունեցած ասուլիսի ժամանակ ուղղվեց ՀՀԿ-ական պատգամավոր Կարեն Ավագյանին:
«Ասենք` ի՞նչ տարբերություն, եթե այդ մարդն ասելիք ունի եւ այդ մարդկանց հետեւից շատ մարդ ա գնում, ի՞նչ նշանակություն ունի դրա (հանրահավաքի անցկացման) տեղը»,- հարցին հարցով պատասխանեց հանրապետական Ավագյանը:
«Եթե տարբերություն չկա, էլ ինչո՞ւ եք մերժում»,- շարունակեց լրագրողներից մեկը:
«Մեզ համար չի տարբերությունը, քաղաքապետարանի համար է, եւ իրենք իրենց բացատրություններում հստակ նշում եմ` ինչի համար է այդպես արվում: Ժամանակ առ ժամանակ այնտեղ թե միջոցառումներ են լինում, թե ուղղակի նպատակահարմարության խնդիր է լինում»,- պատասխանեց պատգամավորը:
Լրագրողները նախ նկատեցին, որ քաղաքապետարանը ղեկավարում է ՀՀԿ վարչության անդամը, հետո հարցրին, թե արդյոք իշխանությունները չե՞ն վախենում, որ մի օր Լեւոն Տեր-Պետրոսյանի համբերության բաժակը կլցվի, եւ ընդդիմությունը կվերադառնա Ազատության հրապարակ` առանց քաղաքապետարանի թույլտվության:
«Իրականում չենք վախենում, որովհետեւ նույն ՀԱԿ-ն այսօր ունի սերնդափոխության խնդիր եւ նույն ՀԱԿ-ում այսօր դեռ չի ձեւավորվել այն երկրորդ անձը, որը փոխարինելու է Լեւոն Տեր-Պետրոսյանին, որը եւ ներքաղաքական դաշտում խանգարում է ՀԱԿ-ի գործունեությանը, ակտիվությանը»,- ասաց Կարեն Ավագյանը եւ հավելեց, թե վախենալու բան չկա, քանի որ ոչ մի տարբերություն չկա, թե Օպերայից քանի մետր հեռավորության վրա է անցկացվում հանրահավաքը:
«Իսկ կատակով` Օպերան ուժի մեջ է, կարող են օպերա գրել եւ սպասել: Կհայտնվեն մի օր»,- եզրափակեց Ավագյանը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել