HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Էդիկ Բաղդասարյան

Պատգամավորական այց «Հետքի» խմբագրություն

Անցած շաբաթ ԱԺ պատգամավոր Կարո Կարապետյանը երկու այլ պատգամավորների հետ այցելեց «Հետքի» խմբագրություն: Առիթը «Հետքի» նախորդ համարներից մեկում նրա մասին տպագրված հոդվածն էր, որում մեջբերված էր նաեւ իր եւ Արմեն Զադոյանի առերես հարցաքննությունից մի հատված: Նորից մեջբերենք այդ հատվածը.

«2009 թ. սեպտեմբերի 28-ին` ժամը 10:30-ին, դուք եկաք իմ գինու գործարան եւ առաջարկեցիք գումարի դիմաց վճարել գողացված «Մերսեդես», «Տուարեգ» եւ «Պորշ» մակնիշի ավտոմեքենաներ: Ես չառարկեցի, եւ պայմանավորվեցինք նայել մեքենաները...»: Այնուհետեւ գրել էինք, որ նա գողացված մեքենաներ է իրացրել:

Ինչ եք կարծում` որո՞նք էին խմբագրություն այցելած պատգամավորի առաջին բառերը. «Էս կաբինետ չունե՞ս»: Ասացի` ոչ: «Կաբինետ» չունենալը, իհարկե, մեծ ազդեցություն ունեցավ պատգամավորի տրամադրության վրա: Նա ստիպված էր, մի կերպ զսպելով իրեն, խոսել «Հետքի» լրագրողների ներկայությամբ:

Բայց մեր զրույցից ամենատարօրինակն այն է, որ իր երկու գործընկերների ներկայությամբ ասաց, թե ինքն առերես հարցաքննության ժամանակ գողացված մեքենաները «տեսնելու» մասին բան չի ասել: Նրան միանգամից ներկայացրի առերես հարցաքննության այդ հատվածը եւ հետո բարձրաձայն կարդացի, որ նրա գործընկերներն էլ լսեն: Նա հանկարծ ասաց, որ ինքն այդպիսի բան չի ասել:

«Դա Արիսն է ավելացրել»,- ասաց Կ. Կարապետյանը: Արիսը Հատուկ քննչական ծառայության քննիչ Արիստակես Երեմյանն է: Զարմացած ասացի` իսկապե՞ս: Ասաց. «Հա, դեռ մի մեքենայի անուն էլ էի տվել, չի գրել»:

Պատգամավորը, մի խոսքով, խճճվեց, եւ հասկանալի էր, որ ասել էր այն, ինչ գրված էր առերես հարցաքննության արձանագրությունում: Հետո ասաց, որ մենք իրար չենք ճանաչում, դրա համար եմ այդ հոդվածը գրել: Ասաց, որ ինքը լրիվ ուրիշ մարդ է` ճիշտ տղա, եւ ես սխալ պատկերացում ունեմ իր մասին:

Ու ես հասկացա, որ իսկապես սխալ պատկերացում ունեմ հայ պատգամավորների մասին, նրանց այնքան էլ լավ չեմ ճանաչում, քանի որ նրանց հետ չեմ շփվում շատ վաղուց: Նրանք իսկապես ուսումնասիրության ենթակա արարածներ են, զարմանալի, անբացատրելի, աներեւակայելի էակներ, եւ նրանց ըմբռնելու համար արժե երբեմն շփվել:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter