Մի քանի բարձրաստիճան պաշտոնյաներ իրար ամբողջովին հակասող տեղեկություններ են տարածել

«Պատկերացրեք ՀՀ ամենալավ օրենքը` կապված մարդու իրավունքների հետ, մի հոյակապ տեքստ, մի 100 կետ, որտեղ մանրամասն ճշտվում է, թե ինչ է նշանակում մարդու իրավունքներ, այդ մարդու իրավունքները ինչպես պիտի պաշտպանվեն, Հայաստանի քաղաքացին ինչ իրավունք ունի, և ընդամենը մի փոքր կետ կա, որտեղ ասվում է, որ այս օրենքը գործում է Հայաստանի քաղաքներից մեկում, ասենք` Ապարանում, տոնական օրերին` ժ. 19:00-21:00:

Այսինքն` արհեստականորեն կարելի է լավագույն օրենքի գործունեության ծավալը և ոլորտը փոքրացնել և դարձնել այն անիմաստ»,- այսօրվա մամուլի ասուլիսին ասաց «Մենք դեմ ենք օտարալեզու դպրոցների վերաբացմանը» քաղաքացիական շարժման նախաձեռնող խմբի անդամ Արմեն Հովհաննիսյանը: Քաղաքացիական շարժման համոզմամբ` հենց վերը նկարագրվածն է տեղի ունեցել «Լեզվի մասին» օրենքի հետ: Այս օրենքով սահմանվում է, որ ՀՀ պետական լեզուն հայերենն է, ուսուցման լեզուն գրական հայերենն է, օրենքում կան հայերենը` որպես պետական լեզու պաշտպանող այլ դրույթներ ևս: Եվ հանկարծ «Լեզվի մասին» օրենքում հղում է արվում «Հանրակրթության մասին» օրենքին ու նշվում, որ մնացած հարցերը կարգավորվում են «Հանրակրթության մասին» օրենքով: Իսկ այդ օրենքը նախատեսում է 11 օտարալեզու դպրոց, 7-րդ դասարանից սկսած` օտարալեզու կրթություն և այլն: «Այսինքն` ամբողջ այն փաթեթը, որ կար դեռ ամռանը, անցնում է «Հանրակրթության մասին» օրենք: Այսպիսի փոփոխություններ ընդունելուց հետո «Լեզվի մասին» օրենքը, որը մեր հիմնարար օրենքներից մեկն է, որը սահմանադրական նշանակություն ունեցող օրենք է, և որը մեր պետական գոյության ամենակարևոր ոլորտներից մեկն է կարգավորում, փաստորեն, արժեզրկվելու է: Այսինքն` այնքան է նեղացվում նրա գործածությունը, որ ինչ-որ երկրորդական օրենքներով պիտի կարգավորվի մեր հանրակրթության ուսուցման լեզուն»,- ասաց Արմեն Հովհաննիսյանը: Նրա խոսքերով` փոփոխություններից հետո լուրջ հակասություններ կան նաև օրենդրական փաթեթի բուն տեքստում: Փաթեթը հակասության մեջ է մտնում բազմաթիվ այլ օրենսդրական ակտերի և առհասարակ ՀՀ սահմանդրական կարգի հետ, որն ապահովում է ՀՀ օրենդրության միասնականությունը` որպես համակարգ: «Այսինքն` ՀՀ-ում չի կարող գործել մեկ օրենք, որն այդ սահամանդրական համակարգից դուրս է և մնացած օրինագծերի հետ մի օրգանական ամբողջականություն չի կազմում, ինչը մենք ունենք այս դեպքում»,- ասաց Արմեն Հովհաննիսյանը: Շարժման նախաձեռնող խմբի մեկ այլ անդամ` Արայիկ Հարությունյանն, ասաց, որ հակառակ իշխանության հավաստիացումներին` «Լեզվի մասին» օրենքը չի հանվել օրենսդրական փաթեթից: Նախկինում «Լեզվի մասին» օրենքի 2-րդ կետում ստորակետ էին դնում և գրում «բացառությամբ օրենքով սահմանված կարգի»: Իսկ հիմա «Լեզվի մասին» օրենքում հղում են անում «Հանրակրթության մասին» օրենքին, որն էլ հենց սահմանում է այդ «բացառությամբ սահմանված կարգը»: «Այս ամենի գագաթնակետը եղավ այս վերջին դարակազմիկ սուտը, խայտառակությունը կամ Գալուստ Սահակյանին ավելի հոգեհարազատ բառով` անգամ հարամը, երբ մարդիկ հայտարարեցին ամբողջ ազգին, որ «Լեզվի մասին» օրենքին չեն դիպչելու: Սովորաբար ասում են` «Ստի կյանքը 40 օր է», բայց ընդամենը 20-22 օր հետո հանկարծ հետ կանգնեցին իրենց այդ հայտարարությունից: Իրենք իրենց փաստորեն ծուղակի մեջ են գցել սրանով. դրժել են խոստումը, ըստ էության, ստախոսի պահվածք են դրսևորել, և մենք 1-ին փուլում նախատեսում ենք դրա մասին հնարավորինս շատ մարդու տեղյակ պահել»,- ասաց շարժման նախաձեռնող խմբի անդամ Էդգար Առաքելյանը: «Ստերի, ոչ կոմպետենտ մարդկանց հայտարարությունների մի շարան է եղել, որին պետք է ուշադրություն դարձնեիք»,- ասաց Արայիկ Հարությունյանը: Նա մանրամասնեց, որ ՀՀ Ազգային ժողովի նախագահ Հովիկ Աբրահամյանը, Կրթության և գիտության նախարար Արմեն Աշոտյանը, ԱԺ կրթության և գիտության հարցերի մշտական հանձնաժողովի նախագահ Արտակ Դավթյանը հայտարարել են, որ «Լեզվի մասին» օրենքը հանված է օտարալեզու դպրոցների գործունեություն ենթադրող փաթեթից: Մինչդեռ այդպես չէ: Արմեն Հովհաննիսյանը նշեց, որ մեկ շաբաթ առաջ նմանատիպ տեղեկություններ է տարածել նաև Սփյուռքի նախարար Հրանուշ Հակոբյանը. երբ Արցախում անցկացվող Լրագրողների համահայկական համագումարում «Մենք դեմ ենք օտարալեզու դպրոցների վերաբացմանը» շարժման անդամը փորձել է հարցը բարձրացնել, Հրանուշ Հակոբյանը ողջ աշխարհում հայկական ԶԼՄ-ներից մոտ 250 լրագրողի առջև հայտարարել է, որ «Լեզվի մասին» օրենքը հանվել է փաթեթից, ամեն ինչ նորմալ է, և հարցը քննարկելու կարիք չկա: «Այսինքն` սուտը, կեղծիքը հասարակության հետ շփվելու գլխավոր միջոց է դառել արդեն անթաքույց: Եվ ընդհանրապես հանրության հետ հարաբերությունների որակը պետք է շատ լուրջ քննել: Այսպե~ս վերաբերվել հասարակությանը` փաստորեն խաբելով»,- ասաց Արմեն Հովհաննիսյանը: Իր հերթին Արայիկ Հարությունյանը նշեց, որ Արմեն Աշոտյանի խոսքերից կարելի է ենթադրել, որ օտարալեզու դպրոցների գործունեության դեպքում հայերենը կվերածվի կենցաղային լեզվի, քանի որ նախարարն ասում է, որ մտահոգվելու կարիք չկա, որովհետև երեխաները հայերեն կխոսեն փողոցում և տանը: «Երբ իր առջև ասում ես. «Դու դրանով հայոց լեզուն վերածում ես կենցաղային լեզվի», ասում է. «Ես այդպիսի բան չեմ ասել»»,- ասաց Արայիկ Հարությունյանը: Այսքանով հայաստանյան տարբեր պաշտոնյաների հայտարարություններում առկա հակասությունները չեն ավարտվում: Էդգար Առաքելյանի խոսքերով` հունիսին վարչապետ Տիգրան Սարգսյանը, պատասխանելով իրենց խմբի հարցերին, հայտարարեց, թե Հայաստանում օտարալեզու դպրոցներ բացելու (անգամ ոչ թե առիթը, այլ) պատճառն այն է, որ իրեն` վարչապետին այցելել է 2 նախաձեռնող խումբ` Թայլանդի ռեգենտների դպրոցը և հայտնի ռուսահայ գործարար Ռուբեն Վարդանյանի խումբը: Այդ 2 խումբն առաջարկել է Հայաստանում բացել դպրոցներ, որտեղ ուսուցումը կանցկացվի անգլերենով: «Ռեգենտների դպրոցը պաշտոնապես հայտարարեց, որ երբևիցե այդպիսի մտադրություն չի ունեցել, այսինքն` վարչապետին խաբեբա հանեց»,- ասաց Էդգար Առաքելյանը: Անգամ եթե Ռեգենտների դպրոցը նման մտադրություն ունեցել է, ապա հակասություն է առաջանում Արմեն Աշոտյանի` նախկինում հնչեցրած հայտարարությունների հետ: Նախարարը հայտարարել էր, թե Հայաստանում օտարալեզու, մասնավորապես ռուսական դպրոցների պահանջարկ կա, դա բացառապես իր` Արմեն Աշոտյանի ծրագիրն է, մեզ բիլինգվալ հասարակություն է անհրաժեշտ, օտարալեզու դպրոցները կնպաստեն կրթության որակի բարձրացմանը: «Կարծես թե ուրեմն հայոց լեզուն խոչընդոտ էր որակյալ կրթություն ստանալու համար»,- ասաց Էդգար Առաքելյանը: Ռուբեն Վարդանյանը ծավալուն նամակ հղեց Հանրային խորհրդին, և խնդրեց վերջնական իրեն պատասխանել` այո կամ ոչ, թեև Հանրային խորհուրդը նախկինում մի քանի անգամ դեմ էր արտահայտվել օտարալեզու դպրոցների գաղափարին: Այս անգամ ևս Հանրային խորհուրդը պատասխանեց` ոչ: Ակնկալվում է, որ առաջիկա քառօրյայի ընթացքում Ազգային ժողովը երկրորդ ընթերցմամբ կքվեարկի օտարալեզու դպրոցների գործունեություն նախատեսող օրինագիծը: «Մենք դեմ ենք օտարալեզու դպրոցների վերաբացմանը նախաձեռնությունը» պատրաստվում է բողոքի ակցիաներ անցկանցնել: Արայիկ Հարությունյանի խոսքերով` սկզբնապես օրինագծով նախատեսվում էր օտարալեզու կրթությունը սկսել 1-ին դասարանից, հետո առաջարկվեց սկսել 6-րդ դասարանից, հետո` ավագ դպրոցից, և սա իրենց պայքարի արդյունքն է: «Մենք անելու ենք այն, ինչ արել ենք 6 ամիս շարունակ. ստեղծելու ենք պայման, հասարակական մի շարժում, որը ստիպելու է այս իշխանություններին ի վերջո մի կողմ դնել այդ օրինագծերը»,- ասաց Արայիկ Հարությունյանը: Իսկ Արմեն Հովհաննիսյանը համոզված է, որ Հայաստանում այդ 11 օտարալեզու դպրոցները չեն բացվելու: «Այս օրենքի փոփոխությունները պարզապես մի հարված են մեր լեզվին սուր գործիքով: Թե ինչ գործիք է, ես անգամ չեմ ուզում մտածել, որովհետև այն նպատակի համար պայքարը, որ 21-րդ դարը լինի նաև հայերենի դար, այսօր Հայաստանում է տեղի ունենում»,- ասաց նա: