Իրականությո՞ւն, թե՞ անեկդոտի տեղիք տվող վիճակագրություն

Ըստ Հանրային ծառայությունները կարգավորող հանձնաժողովի վերջին տվյալների` Հայաստանում բնակչության 47%-ը` 1,5 մլն մարդ, օգտվում է ինտերնետից: Այս վիճակագրության վերաբերյալ իր կարծիքը Հանրային խորհրդի անդամ Հովիկ Մուսայելյանն արտահայտեց` անեկդոտ պատմելով:

«Հայկական ռադիոյին ինտերնետ հարցման միջոցով հարցնում են` «Հայաստանում քանի՞ հոգի է ինտերնետից օգտվում», և ինտերնետ հարցման արդյունքում պատասխանը ցույց է տալիս 100%»,- այսօրվա մամուլի ասուլիսին ասաց Հովիկ Մուսայելյանը: Երկար ժամանակ Հայաստանում ինտերնետ օգտագործողների թիվը չէր թարմացվում, և համարվում էր, որ երկրի բնակչության 6%-ն է օգտվում ինտերնետից: Ասուլիսի մյուս բանախոսը` «Ի-վի քոնսալթինգ» խորհրդատվական ընկերության տնօրեն, «Տնտեսություն և արժեքներ» հետազոտական կենտրոնի նախագահ Մանուկ Հերգնյանը, չբացառեց, որ Հայաստանում իսկապես ինտերնետ օգտագործողները կարող են 47% կազմել: Բջջային հեռախոսակապի ծառայություն մատուցողների «էքսպանսիան» հանգեցրել է նրան, որ ինտերնետի տարածվածությունը Հայաստանում էականորեն մեծացել է: Մանուկ Հերգնյանի կարծիքով` տեղեկատվական և հաղորդակցական տեխնոլոգիաների (ՏՀՏ) ոլորտում Հայաստանն արձանագրում է առաջընթաց: Պարզապես այդ առաջընթացը չափազանց դանդաղ է տեղի ունենում, և Հայաստանը հետ է մնում մյուս, այդ թվում նաև տարածաշրջանի երկրներից: Արդեն 2002 թ. ողջ աշխարհում բջջային հեռախոսակապը բաժանորդների քանակով գերազանցել է ֆիքսված հեռախոսակապին: Իսկ ինտերներտը բաժանորդների քանակով ֆիքսված հեռախոսակապին գերազանցել է արդեն 2007-ին: Այժմ ինֆորմացիան և գիտելիքը աշխարհում կրկնապատկվում են ամեն տարի, այսինքն` ամեն տարի ստեղծվում է այնքան գիտելիք, որքան եղել է մինչ այդ: Կանխատեսվում է, որ շուտով ինֆերմացիան և գիտելիքը կկրկնապատկվեն ամեն շաբաթ: «Տոտալ հեղափոխություն է տեղի ունենում: Ես կարծում եմ` այդ հեղափոխությունը մեր կողքով է դեռևս անցնում: Հիմա դուք պատկերացրեք` էս տիպի միջավայրում ինչպես պետք է մրցակցել: Սա նշանակում է լրիվ այլ տեսակի մտածելակերպ, այնքան ինտենսիվ փոխազդեցություն աշխարհի հետ, որը դեռևս չլսված է: Իսկ մեզ մոտ երբ 6-ից 47 է դառնում, էական ձեռքբերում ենք համարում: Բայց իրականում դա ընդամենը բաց թողնվածի լրացում է դեռևս: Մենք ուղղակի մի փոքրիկ առաջընթացը, որ մարդիկ հիմա կարող են բջջային հեռախոսով խոսել, մեծ առաջընթաց ենք համարում: Դա ընդամենը անհրաժեշտություն է: Դրանով մենք չենք հասնի մրցակցային առավելության»,- ասաց Մանուկ Հերգնյանը: Նրա համոզմամբ` մրցակցային առավելության հասնելու համար Հայաստանը պետք է առաջ անցնի ոչ միայն անմիջական հարևաններից, այլև ավելի մեծ թվով երկրներից, քանի որ զրկված է այլ տեսակի ռեսուրսներից ու այլընտրանքային հնարավորություններից: «Այս ոլորտը իսկապես բացառիկ հնարավորություն է մեզ ընձեռում: Եվ իսկապես պարադոքսալ է, որ Հայաստանը չօգտվեց դրանից մինչև այսօր»,- ասաց Մանուկ Հերգնյանը: Հովիկ Մուսայելյանի խոսքերով` ՏՀՏ-ն հիմնականում զարգանում է Երևանում, և մարզերում պետք է լուրջ քայլեր ձեռնարկվեն: Առաջին քայլը Գյումրիում տեխնոպարկ ստեղծելու նախաձեռությունն է: Դրական տեղաշարժ է նկատվում նաև Արցախում: «Մենք մոտ 2 շաբաթ առաջ ոլորտի լիդերներով` 40 հոգի, Արցախ էինք այցելել մի քանի օրով և բավական ոգևորված եկել ենք, որովհետև և կառավարության, և տեղական համայնքի ցանկությունները, պատրաստակամությունն ուղղակի այնքան բուռն և մեծ էին, որ մեր գործընկերներից շատերը մեր այցելությունից հետո` արդեն իսկ այսօր վերադարձել են Արցախ, որպեսզի արդեն ռեալ, գործնական պայմանավորվածություններ ձեռք բերեն»,- ասաց Հովիկ Մուսայելյանը: