Անցյալ տարի «Հետքը» հոդված էր հրապարակել այն մասին, թե ինչպես է Արագածոտնի մարզի Սասունիկ գյուղում մի գյուղացի հարեւանի տան նկուղից ալյուր գողանալու համար ազատազրկման դատապարտվել: Նա ալյուրը գողացել էր, որովհետեւ ընտանիքի չորս անչափահաս երեխաները սոված էին:

Ալյուր գողացող գյուղացուն դատապարտել են, նա մի քանի ամիս անցկացրել է կալանավայրում, հետո համաներմամբ ազատ է արձակվել: Ի՞նչ արժե մեկ, երկու կամ երեք պարկ ալյուրը. մի քանի տասնյակ հազար դրամ: Իսկ հիմա պատմենք, թե ինչպես են պաշտոնյաները յուրացրել 100 մլն դրամից ավելի գումար եւ առայսօր չեն պատժվել ու չեն էլ պատժվելու:

Մի պարկ ալյուր գողացող գյուղացին Հայաստանում շատ արագ կարող է հայտնվել բանտում, իսկ պետական բյուջեից միլիոններ գողացող պաշտոնյաների հետ ոչինչ չի պատահի: Սա Հայաստանում ընդունված խաղի կանոններն են, հանրապետությունում գործող իրական օրենքները: Եթե այդպես չլիներ, ապա այսօր առնվազն մի քանի պաշտոնյաներ պետք է գտնվեին բանտում:

«Հայպետհիդրոմետ» ՊՈԱԿ-ի տնօրենի եւ ՀՀ բնապահպանության նախարարության վարչատնտեսական բաժնի պետի կողմից պաշտոնեական դիրքը չարաշահելու դեպքի առթիվ ՀՀ գլխավոր դատախազության պետական շահերի պաշտպանության վարչությունում 2010 թ. մայիսին հարուցվել է քրեական գործ:

«Հայպետհիդրոմետ» ՊՈԱԿ-ը «Սեւանա լճում եւ նրա ավազանում կատարվող հիդրոօդերեւութաբանական մոնիտորինգ» ծրագրի շրջանակներում պետք է ձեռք բերեր հիդրոլոգիական հատուկ նշանակության նավ: Նավի մատակարարման համար ՀՀ պետական բյուջեով 2006 թ. նախատեսվել եւ հետագայում «Կամար» ՓԲ ընկերությանը վճարվել է 153 մլն դրամ:

«Կամար» ՓԲԸ-ն այդ նավը ձեռք է բերել 47 մլն դրամով: «ԲՊՄ-74 Մ-ԺԴ» տեսակի ձկնորսական նավը գնվել է ՌԴ «Ախտարսկայա Սուդովերֆ» ՓԲ ընկերությունից: Գլխավոր դատախազության մամուլի քարտուղար Սոնա Տռուզյանը մեր հարցմանը պատասխանել է, որ այս գործով քննությունը դեռ ավարտված չէ: Նախաքննությունը ոստիկանության քննչական գլխավոր վարչության վարույթում շարունակվում է:

«ՀՀ բնապահպանության նախարարության վարչատնտեսական բաժնի պետը, նույն նախարարության աշխատակազմի ղեկավարի հրամանով օժտված լինելով պատվիրատուի ղեկավարի լիազորություններով, չնայած որ «Կամար» ՓԲԸ-ի ձեռք բերած «ԲՊՄ-74 Մ-ԺԴ» տեսակի ձկնորսական նավը չի համապատասխանել տեխնիկական բնութագրին, այսինքն` ցածր է եղել հայտում ու գնման պայմանագրում նշված տեխնիկական չափորոշիչներից, չի կատարել ծառայողական պարտականությունները եւ ՊՈԱԿ-ի տնօրենի ցուցումով, առանց առարկայական եւ փաստաթղթային ուսումնասիրության, հաստատել է վերջինիս ներկայացրած 2007 թ. մարտի 16-ի թիվ 06/88-1-Ե եզրակացությունը, թե 153,0 մլն դրամ արժեքով «Կամար» ՓԲ ընկերության մատակարարած նավը համապատասխանում է պայմանագրի տեխնիկական բնութագրի պահանջներին:

Արդյունքում թիվ 1 հանձնման-ընդունման արձանագրությամբ նավն ընդունվել է ՀՀ բնապահպանության նախարարության կողմից, որպիսի գործողությունների հետեւանքով պետության օրինական շահերին պատճառվել է էական գույքային վնաս:

Նկատի ունենալով, որ ստուգման նյութերով «Կամար» ՓԲԸ ընկերության տնօրենի, գլխավոր հաշվապահի եւ «Հայպետհիդրոմետ» ՊՈԱԿ-ի տնօրենի, բնապահպանության նախարարության վարչատնտեսական բաժնի պետի գործողություններում կան ՀՀ քրեական օրենսգրքով նախատեսված հանցագործությունների հատկանիշներ, ՀՀ գլխավոր դատախազության պետական շահերի պաշտպանության վարչությունում հարուցվել է քրեական գործ ՀՀ Քրեական օրենսգրքի 178-րդ հոդվածի 3-րդ մասի 1-ին կետի եւ 308-րդ հոդվածի 2-րդ մասի հատկանիշներով: Քրեական գործն ուղարկվել է ՀՀ ոստիկանության քննչական գլխավոր վարչություն` նախաքննություն կատարելու:

Նախաքննության ընթացքում մեղադրյալ Հ. Վարդանյանը մասամբ վերականգնել է պետությանը պատճառված վնասը՝ ՀՀ գլխավոր դատախազության դեպոզիտ հաշվին վճարելով 33 մլն դրամ»,- գրաված է գլխավոր դատախազության պատասխան գրության մեջ:

Ոստիկանության հասարակայնության հետ կապի եւ լրատվության վարչությունից էլ հայտնեցին, որ այս գործի շրջանակներում ՀՀ Քրեական օրենսգրքի 178 հոդվածի 3-րդ մասի հատկանիշներով մեղադրանք է առաջադրվել «Կամար» ՓԲԸ-ի տնօրեն Հայկ Վարդանյանի նկատմամբ:

Հիշեցնենք, որ այս փաստաթղթերի տակ ստորագրել են բնապահպանության նախարարության մի շարք աշխատակիցներ: Նրանցից որեւէ մեկին մեղադրանք չի առաջադրվել: Ավելին, նրանք շարունակում են աշխատել նույն կամ այլ պաշտոններում` նոր յուրացումներ կատարելով: