Այսօր կառավարության շենքի առջև բողոքի ակցիա անցկացրին բանակում զոհված զինծառայողների ծնողները: Նրանք պահանջում էին արդար դատաքննություն անցկացնել և պատժել իրենց որդիների սպանության մեջ մեղավորներին:

Մայրերից ոմանք լաց էին լինում: 2007 թ. օգոստոսի 30-ին Վարդենիսի զորամասում մահացած Տիգրան Օհանջանյանի մայրը` Գոհար Սարգսյանը, ասաց, որ իրականում իր որդուն սպանել են, թեև ըստ պաշտոնական վարկածի` Տիգրանն էլեկտրահարվել է: Ընտանիքը աշխատանք չգտնելու պատճառով Ռուսաստան էր տեղափոխվել: Տիգրանը լսել էր 2006 թ. Սերժ Սարգսյանի ուղերձը և որոշել վերադառնալ Հայաստան, որպեսզի ծառայի հայրենիքին, ոչ թե ռուսներին:

«Ես հանդիպման ժամանակ ասեցի. «Ձեր ուղերձը լսելով` իմ երեխեն Ռուսաստանից եկավ հայրենիքին ծառայելու: Դիակը տվեցիք, գոնե մահվան պատճառը ասեք»: Ես ծնող եմ, ոնց ապրեմ մյուս երեխուս համար»,- ասաց Գոհար Սարգսյանը:

Բոլոր ատյաններով անցած դատական ակտով հերքվել է պաշտոնական վարկածը, թե Տիգրանի մահվան պատճառը էլեկտրահարումն է, սակայն նորից սկսված նախաքննությունը պաշտպանում է էլեկտրահարման հին վարկածը: Տիգրան Օհանջանյանի ծնողները էլեկտրահարման վարկածը հերքող փաստեր էին ներկայացրել նորանշանակ զինդատախազ Գևորգ Կոստանյանին: Սերժ Սարգսյանը ևս խոստացել էր, որ նորանշանակ զինդատախազը նոր ձևով լուծում կտա խնդրին: Սակայն ծնողները դժգոհ են նախաքննության ընթացքից: «Նորից նույնն է: Հիմա նույն տեղում որոշում են դատաէլեկտրատեխնիկական փորձաքննություն անել: Բայց չէ՞ որ հայտնաբերվել է, որ էդտեղ հոսանք չկա: Արդարացվել են էդ մեղադրյալները: Հենց ռազմական ոստիկանությունում, հենց հրամանատարությունում գործը կասեցվում է ու շպրտվում մի կողմ: Ով իմացավ, որ Կարախչյան Ստյոպան էդ երեխեքին ծեծել է, ոչ մեկը»,- ասաց Գոհար Սարգսյանը:

2001 թ. հոկտեմբերի 30-ին Վայքի զորամասում զոհված Արայիկ Ավետիսյանի մայրը` Անահիտ Մկրտչյանը, ևս չի հավատում որդու մահվան պաշտոնական վարկածին: Նա ասաց, որ սպանություն կատարողը հայտնաբերված չէ, թեև այս աշնանը լրանում է սպանության 10 տարին: «Հստակ գիտեմ` մարդասպանը ով է: Մի զինվորի անզգույշ սպանության մեջ մեղադրում էին: Նա արդարացվել է: 9 քառ. մետր սենյակում` դեպքի վայրում, 4 ականատես վկայի ներկայությամբ չգիտեն` ով է սպանել տղայիս` էն պարագայում, որ քրեական գործում կան բավարար ապացույցներ սպանություն կատարող անձին մեղադրանք առաջադրելու, ձերբակալելու»,- նշեց Անահիտ Մկրտչյանը: Նրան ևս ընդունել է զինդատախազը, ում կինը ներկայացրել է քրեական գործում առկա բոլոր հակասությունները: Արայիկ Ավետիսյանի մայրը վստահ է, որ եթե այդ հակասություններին իրավական գնահատական տրվի, ապա սպանություն կատարողը կբացահայտվի ու կձերբակալվի: Կնոջն առաջարկել են հակասությունները ներկայացնել քննիչին, ինչից հետո քննիչն առաջարկել է արտաշիրիմում անել:

«Ես չեմ գնա արտաշիրիմման, չեմ թողնի` պղծեն իմ երեխու շիրիմը` էն պարագայում, երբ կան բազմաթիվ հակասություններ, որոնք իրավական գնահատական չեն ստացել»,- ասաց Անահիտ Մկրտչյանը:

Ակցիային մասնակցում էր նաև Մեհրաբ զորամասում զոհված սպա Արտակ Նազարյանի մայրը` Հասմիկ Հովհաննիսյանը: Արտակը, ով պայմանագրային զինծառայության էր անցել այլ աշխատանք չգտնելու պատճառով, ըստ պաշտոնական վարկածի, ինքնասպան է եղել: Հասմիկ Հովհաննիսյանն ասում էր, որ պայմանագրային զինծառայողների աշխատանքի հրավիրելուց առաջ պետք է հստակ հայտարարել, որ այդ զինծառայողները պետք է լինեն փող աշխատող սպաներ, որպեսզի մարդն ինքը որոշի` անցնո՞ւմ է պայմանագրային զինծառայության, թե՞ ոչ:

Կառավարության շենքից դուրս եկավ պաշտպանության նախարար Սեյրան Օհանյանը: Սակայն զոհված զինծառայողների ծնողները չմոտեցան նրան: Նախարարին մոտեցան այլ զինծառայողների ծնողներ և դիմեցին իրենց որդիների ծառայության հետ կապված տարբեր խնդրանքներով: Սեյրան Օհանյանը խոստացավ արձագանքել: