Տեսանյութեր
Լուսանկարներ
Հրայր Կարապետյան. «Այն իրավիճակը, ինչ այսօր զինված ուժերում է, մեզ չի գոհացնում»
Ներկայումս Ազգային ժողովի օրակարգում ընդգրկված է զինված ուժերին վերաբերող 3 կարգապահական կանոնագիրք: «ՀՀ զինված ուժերի ներքին ծառայության կանոնագիրքը» արդեն քառօրյա նիստերի օրակարգում է: «ՀՀ զինված ուժերի կայազորային ու պահակային ծառայությունների կանոնագիրքը» ևս քննարկման ընթացքի մեջ է: «ՀՀ զինված ուժերի կարգապահական կանոնագիրքը» ԱԺ-ի մեծ օրակարգում է:
«Այժմ մեր ռազմավարությունը այն է, որ զինված ուժերի վերաբերյալ բոլոր խնդիրները կարգավորվեն ոչ միայն կառավարության որոշումներով կամ նախարարի հրահանգ-հրամաններով, այլ օրենսդրությամբ, օրենքներով»,- այսօր կազմակերպված կլոր սեղանի ժամանակ ասաց ԱԺ պաշտպանության, ազգային անվտանգության և ներքին գործերի մշտական հանձնաժողովի նախագահ Հրայր Կարապետյանը:
«ՀՀ զինված ուժերի կարգապահական կանոնագիրքն» ուղարկվել է միջազգային փորձաքննության: Արդեն ստացվել են փորձագետների կարծիքները: Փորձագետները կմասնակցեն կանոնագրքին նվիրված ԱԺ լսումներին, որոնք նախատեսված է անցկացնել մարտին: Հրայր Կարապետյանը խոհրդարանական լսումներին մասնակցելու հրավիրեց բոլոր նրանց, ովքեր ուզում են, որ ի վերջո օրենքով, ՀՀ Սահմանադրությանը և միջազգային նորմերին համապատասխան, ամրագրվեն զինված ուժերում հրամանատարների ու զինվորների իրավունքներն ու պարտականությունները:
«Զինված ուժերը ունեն յուրահատուկ բնույթ, և այնտեղ որոշակի սահմանափակումներ պետք է լինեն մարդու իրավունքների պաշտպանության հարցում, բայց այն իրավիճակը, ինչ այսօր զինված ուժերում է, պարզ է` մեզ չի գոհացնում, այլապես թե պաշտպանության նախարարը, թե օրենսդիր մարմինը, թե բոլորս այս քննարկումների ընթացքում չենք շեշտադրի այն հանգամանքը, որ պետք է օրենք լինի զինված ուժերում բոլոր կարգապահական տիպի փոխհարաբերությունները կարգավորելու համար»,- ասաց Հրայր Կարապետյանը:
Նա ներկայացված առաջարկների մի զգալի մաս ընդունելի և քննարկելի է համարում: Սակայն կան առաջարկներ, այդ թվում նաև միջազգային փորձագետների ներկայացրած, որոնք քննարկելի չեն, քանի որ չեն կարող տեղայնացվել` ելնելով Հայաստանում առկա օբյեկտիվ պատճառներից:
Հրայր Կարապետյանը ողջունելի է համարում պաշտպանության նախարարին առընթեր հասարակական խորհրդի ստեղծումն ու գործունեությունը: Բայց արդեն կարելի է քննարկել նաև Հայաստանում զինվորական օմբուդսմենի ինստիտուտ ստեղծելու հարցը:
«Իհարկե, օմբուդսմենի ինստիտուտը զբաղվում է այս խնդիրներով, իհարկե, խնդիրը անտեսված չէր զինված ուժերում մարդու իրավունքների պաշտպանության առումով: Բայց, իմ կարծիքով, հասունացել է առանձին զինվորական օմբուդսմենի ինստիտուտով հետապնդելու այս խնդիրները»,- ասաց Հրայր Կարապետյանը:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել