Քննարկվել են Երևանում առաջնային կանոնակարգման կարիք ունեցող խնդիրները
Այսօր Երևանի քաղաքապետ Կարեն Կարապետյանը և Գերմանական KfW ֆինանսական համագործակցություն կազմակերպության մունիցիպալ զարգացման բաժնի պետ Արնե Գուզը քննարկել են մայրաքաղաքային տնտեսության տարբեր ոլորտներում հնարավոր համագործակցության հարցեր:
Կարեն Կարապետյանը հյուրին ներկայացրել է մայրաքաղաքի կառավարման արդյունավետությանը վերաբերող իր մոտեցումները, ինչպես նաև բոլոր այն ծրագրերը, որոնք մայրաքաղաքում առաջնային կանոնակարգման խնդիր ունեն: Քաղաքային տնտեսության տարբեր ոլորտներում կառավարման արդյունավետության բարձրացման հարցում քաղաքապետը կարևորել է միջազգային կառույցների հետ համագործակցությունը:
Արնե Գուզը հավաստիացրել է, որ իրենց ընկերությունը պատրաստակամ է քաղաքապետարանի հետ փոխշահավետ համագործակցության, մասնավորապես` քաղաքաշինության զարգացման, աղբահանության, կոշտ թափոնների կառավարման, բնապահպանության և մի շարք այլ ոլորտներում:
Կարեն Կարապետյանը կարևորել է պետություն-մասնավոր հատված համագործակցության մոդելի ձևավորումը: «Ներդրումային ծրագրերի իրականացման մասով կարելի է առանձնացնել մասնավորապես աղբահանության, տրանսպորտի և առողջապահության բնագավառները»,- նշել է Կարեն Կարապետյանը` ավելացնելով, որ այդպիսով քաղաքային բյուջեի հիմնական մասն արդեն կուղղվի սոցիալական և բարեկարգման ծրագրերին:
Վարկային և ներդրումային ծրագրեր ներգրավելու շրջանակում քաղաքապետը ուշադրություն է հրավիրել մայրաքաղաքի վերելակային տնտեսության բարելավման հարցին:
Երևանի քաղաքապետարանի տեղեկատվության և հասարակայնության հետ կապերի վարչությունը հայտնում է, որ իր հերթին Արնե Գուզը նշել է, որ առաջիկայում KfW ֆինանսական համագործակցություն կազմակերպությունը կներկայացնի համագործակցության վերաբերյալ հստակ առաջարկներ:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել