Ըստ Հրայր Թովմասյանի՝ Հայաստանում քաղբանտարկյալներ չկան
Այսօր արդարադատության նորանշանակ նախարար Հրայր Թովմասյանը հրավիրել էր իր առաջին մամուլի ասուլիսը, որի ընթացքում լրագրողները նրան խնդրեցին գնահատական տալ նաեւ Մարտի 1-ի իրադարձություններին: «Որպես մարդ` ես ցավում եմ, որ իմ երկրում նման դեպք պատահեց»,- ասաց Թովմասյանը` ընդգծելով, թե իբրեւ նախարար` փորձելու է այնպես անել, «որ այսուհետեւ մեզանում հետընտրական նման զարգացումներ չլինեն»:
Իսկ Հայաստանում քաղբանտարկյալներ կա՞ն: Հարցի կապակցությամբ նախարար Թովմասյանը նախ նշեց, որ քաղբանտարկյալ հասկացությունը քաղաքական է. «Դա կար սովետական տարիներին, այսօր դա գոյություն չունի: Հետեւաբար, որպես իրավաբան` ասում եմ, որ նման հասկացություն մենք չունենք: Եվ կարիք չկա, որ նման հասկացություն սահմանվի. դա քաղաքական տերմինալոգիա է եւ քաղաքական գործիչների կողմից օգտագործվող»:
Այնուամենայնիվ, նորանշանակ նախարարի կարծիքով` Հայաստանում չկան այնպիսի անձինք, ովքեր դատապարտվել են իրենց քաղաքական հայացքների համար: Ավելին, մեր մամուլը նույնիսկ կավատության համար դատապարտվածին ներկայացնում է իբրեւ քաղբանտարկյալ:
Վաղը Երեւան կժամանի Եվրոպայի խորհրդի մարդու իրավունքների հարցերով գլխավոր հանձնակատար Թոմաս Համարբերգը, ինչի առնչությամբ լրագրողները Հրայր Թովմասյանին խնդրեցին պարզաբանել, թե իր ստանձնած պարտավորություններից որոնք Հայաստանը դեռ չի կատարել:
«Հանդիպում եմ ունենալու նաեւ Համարբերգի հետ, եւ, թերեւս, ինքը կամփոփի, թե պարտավորություններից որոնք չեն կատարվել: Եվ ես հարցադրումները կգնահատեմ այն տեսանկյունից, թե որոնք կարող էին կատարվել եւ թերացել են,- ասաց արդարադատության նախարարը:- Համեմատության համար ներող եղեք, բայց ամուսնությունից 3 ամիս հետո երեխա մի սպասեք, այլ եկեք հետեւենք` հղիությունը նորմա՞լ է ընթանում, թե՞ ոչ»:
Այս տեսակետից Թովմասյանը կարեւորում է այն հարցի դիտարկումը, թե արդյոք մենք ճի՞շտ ուղղությամբ ենք շարժվում, եւ ինչքանո՞վ են բավարար ձեռնարկվող քայլերը. «Ոչ ոք չի ասելու, որ այդ խնդիրները չկան: Ցանկացած ոլորտում ես ինքս այդ խնդիրները տեսնում եմ: Իսկապես այստեղ պետք է գնահատվի` կա՞ն մարդիկ, կա՞ քաղաքական իշխանություն, որը պատրաստ է քննարկել եւ ցանկություն ունի այդ խնդիրները լուծել: Ես ձեզ վստահեցնում եմ, որ կա այդ կամքը, կա այդ ուժը, եւ ինքներդ առաջիկայում կտեսնեք ու կհամոզվեք»:
«Ի՞նչ է, մեզանից 3 ամսում երեխա՞ են սպասում. պահանջներն այդքան անհնարի՞ն են»,- շարունակեցին լրագրողները: «Դուք ասացիք»,- եզրափակեց նորանշանակ նախարարը:
Մեկնաբանել