HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Շարբաթյանի սպանության գործով հարցաքննվեց բուժքույրը

Երեկ՝ մարտի 25-ին, Վանաձորի ընդհանուր իրավասության դատարանում փաստաբան Սամվել Շարբաթյանի սպանության քրգործով ժամը 11-ին նշանակված դատական նիստը սկսվեց ժամը 11:50-ին՝ դատարանի դահլիճների զբաղվածության պատճառով: Դատակոչված 8 վկաներից նիստին այս անգամ էլ ներկայացել էր և հարցաքննվեց միայն 2012 թ.-ի նոյեմբերի 18-ին ուշ երեկոյան «Մուշ» ռեստորան մեկնած շտապ օգության բուժքույր, վկա Էլա Կոստանյանը:

Վերջինս իր ցուցմունքի սկզբում ասաց, որ կանչը ստանալուց հետո, երբ բժիշկ Մկրտչյանի հետ շտապ օգնության մեքենայով մեկնել են «Մուշ» ռեստորան, արդեն տեսել են դիակ: Դատավոր Նարինե Հովակիմյանը վկայից պահանջեց ավելի մանրամասն ներկայացնել իր տեսադաշտում կատարվածը: «Ես ընդհանրապես չեմ հիշում, եթե կարող եք գրածս հիմք ընդունեք»,- պահանջեց վկան: Դատավոր Հովակիմյանը վկայից պահանջեց ներկայացնել տուժողի արտաքին նկարագիրը: «Քննիչը, երբ հարցաքննում էր, ես ասացի՝ ահագին ժամանակ է անցել, ոչինչ չեմ հիշում: Ակնհայտ էր, վնասվածքների հետքեր կային դեմքին»,- պատասխանեց վկան: Տուժողի իրավահաջորդ Հասմիկ Մանուչարյանը բուժքրոջից պահանջեց դատարանին ներկայացնել, թե առաջին ինչ օգնություն են ցուցաբերել իր եղբորը դեպքի վայրում: Վկան կրկնեց, որ բժշկի ստուգման արդյունքներով տուժողը պուլսացիա չի ունեցել և այլևս օգնության կարիք չի եղել:

«Վռազ որակել են դիակ էր, ո՞նց կարող ես ապացուցել, որ դիակ էր, երբ ոստիկանների ժամանելուց 20 րոպե հետո ոստիկաններից մեկը գոռաց, որ պուլս կա: Ինչու չփորձեցիք մոտենալ»,- զայրացած հարցրեց Հասմիկ Մանուչարյանը: Մեղադրող Պետրոս Մարտիրոսյանին հետաքրքրեց, թե վկան քննիչին ցուցմունքներ տալիս արդյոք նույնպես չի հիշել դեպքի մանրամասները: Վկան ասաց, որ որոշ բաներ հիշել է, որոշ բաներ ոչ. «Քննիչը հարցաքննության ժամանակ կարծեմ նկարը ցույց տվեց, թե ոնց էր պառկած, ասենք չէի հիշում»: Ամբաստանյալներ Սամվել Դիլոյանի և Արեն Վերանյանի շահերի պաշտպան Ռուբեն Հակոբյանը վկային խնդրեց նկարագրել, թե քննիչը ինչպես է իրեն ցույց տվել նկարը: «Համակարգիչով մահացածի նկարը ցույց տվեց»,- պատասխանեց նա:

Քննիչի կողմից նկարը ցույց տալուց հետո վկան ասաց, որ որոշ բաներ հիշել է: «Այ, որ քննիչին ասում էիք, որ չեմ հիշում, Ձեր ասած բառերն եմ ասում, բացի նկարը ցույց տալը, քննիչը Ձեզ ուրիշ բան ասա՞վ, հիշեցրե՞ց»,- վկային հարցրեց պաշտպան Մհեր Դավթյանը: Վկան փաստեց, որ քննիչը իրեն միայն հարցեր էր տալիս: Հասմիկ Մանուչարյանը Էլա Կոստանյանին հիշեցրեց, որ դեպքի վայրում երկու անգամ վալերիանայի հաբեր է տվել դեպքին ականատես վկա իր քրոջ որդուն՝ Հայկ Ասլիկյանին: «Կարող էիք այդ պահին օգնել նաև տուժածին»,- կրկին ասաց տուժողի իրավահաջորդը: Վկան պատասխանեց, որ իր հետ բժիշկ է եղել, եթե օգնության կարիք լիներ բժիշկը անպայման կօգներ:

Այսուհանդերձ, Էլա Կոստանյանը դատարանին հայտնեց, որ «Մուշ» ռեստորանում իրենց դիմավորել է մի երեխա: Նա բուժքրոջն ասել է, որ տուժողը իր քեռին է: Ի պատասխան դատավոր Հովակիմյանի հարցին՝ վկան հայտնեց, որ իր հիշելով՝ տուժողի կոպերը այտուցված էին, երևի հարվածներից հետո, որոնք արտացոլվում էին դեմքին: Ասաց նաև, որ տուժողի մարմնի այլ հատվածներում հարվածների հետքեր չի տեսել: Նախաքննական և դատաքննական ցուցմունքներում առկա հակասությունների պատճառով դատարանը որոշեց հրապարկել վկայի նախաքննական ցուցմունքների առանձին հատվածներ: «Հայտնում եմ, որ այդ սենյակի մոտ կային կանգնած ինձ անծանոթ 3-4 հոգի, որոնք լուռ կանգնած ծխում էին»,- վկայի նախաքննական ցուցմունքից ընթերցեց դատավոր Հովակիմյանը: Վկան հաստատեց իր նախաքննական այս ցուցմունքը: «Ես մնացի դիակի կողքին, իսկ բժիշկը դուրս եկավ սենյակից: Գտնվելով տուժածի կողքին՝ ես առանց շոշափելու հասկացա, որ նա որոշակի տրավմաներ ունի: Նկատելի էր, որ ձախ աչքը վնասված էր: Քթից արյան հոսքեր կային: Առավել մանրամասն չեմ կարող նկարագրել այդ վնասվածքները, դրանց բնույթից ակնհայտ էր, որ այդ մարդը ծեծված էր: Դրա մասին էին վկայում նրա ձեռքերի քերծվածքները: Այնտեղ ես նկատեցի, որ հավաքված մարդիկ կային, ովքեր ինձ անծանոթ էին»,- մեղադրող Պետրոս Մարտիրոսյանի կողմից հրապարակված իր այլ ցուցմունքները վկան նույնպես հաստատեց: «Ինչ գրել եմ այդտեղ, ճիշտ է»,- հայտարարեց նա: «Նշեմ, որ մինչև Հասմիկի գալը դիակի գտնվելու սենյակ եկան Էդվարդ Խլղաթյանը, որը շատ զայրացած տեսք ուներ»,- վկայի նախաքննական այս ցուցմունքի հրապարակումից հետո պաշտպան Մհեր Դավթյանը հայտնեց իր ենթադրությունը. «Վկան դատարանում հայտարարեց, որ Էդվարդ Խլղաթյանին չի ճանաչում: Ազատ Խլղաթյանն ասաց հետո, եթե չի ճանաչել, քննիչի մոտ ինչպե՞ս է նման բան գրել: Սա չի՞ նշանակում, որ իրեն ուղղորդել են»:

Նախաքննական իր այս ցուցմունքն էլ Էլա Կոստանյանը պարզաբանեց. «Չէ, միջին տարիքի տղամարդ էր: Ուրեմն դա Էդվարդ Խլղաթյանն էր»: Վկան ասաց, որ Էդվարդ Խլղաթյանին ճանաչում է: Նրան դատարանի կողմից տրվեցին նաև այլ հարցեր: Սրանով ավարտվեց հերթական դատական նիստը: 

Մեկնաբանություններ (1)

Lena
Spanoxnery nstac en mexadroxi atorin, Artak Veranyany inqn e nerkayacel, Aren ev Samvel masnakicnery paxel ein heto en berman entarkvel, amen inch parz e, uxxaki vaxecnum en vkanerin, nranq el poxum en irenc cucmunqnery, normal pastaban e petq mexadrox koxmin, Tikin Hasmik es karekcum em dzez bayc himnveq nra vra vor bolor vkanaeri naxnakn cucmunqnery nuynn en exel, iraric ankanx bayc nuyny, u nranq tvel en nuyn anunnery, datarany ho erexa che heqiatnerin havata, dzez hajoxutyun em maxtum ta Astvac voor haxteq. Etenuynisk nranq azatven el, meka Astco datastanic chen azatvelu

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter