«Լիդիան ինթերնեյշնլ լիմիթեդ» ԲԲ ընկերության փոխտնօրեն Դիդիե Ֆոլենը Հայաստանում պատասխանատու հանքարդյունաբերության թեմայով համաժողովին նշեց, որ ընկերությունը դեռևս որոշում չի կայացրել Ամուլսարում ներդրումներ անելու մասին: Ըստ նրան` մինչ որոշում կայացնելը իրենք պետք է քննարկումներ ունենան շահագրգիռ բոլոր կողմերի` կառավարության, տեղի համայնքների հետ: «Երբ մենք Ամուլսարում ներդրումներ արեցինք 2007 թ., դա որոնողահետախուզական ծրագիր էր վաղ փուլում: Հավատում էինք և մինչ օրս էլ հավատում ենք, որ այդ տեխնիկական ծրագիրն ունի բնապահպանական և սոցիալական արժանիքներ, եթե, իհարկե, թույլտվություններով լիովին ապահովված լինի»,- ասաց նա:

Այս ընկերությունը «Գեոթիմ» ՓԲԸ-ի բաժնետոմսերի 100-տոկոսանոց սեփականատերն է: «Լիդիանը» գրանցված է օֆշորում` բրիտանական տիրապետության տակ գտնվող Նորմանդյան կղզիներում: Հիշեցնենք, որ «Գեոթիմ» ընկերությունը դեռևս նախորդ տարվա մարտին տարածած մամլո հաղորդագրությաբ նշել էր, որ ընկերությունը Ամուլսարի ոսկու հանքավայրի ծրագիրն իրականացնելու համար ներդնելու է ավելի քան 400 մլն դոլար: Այդ գումարի մոտավորապես 240 մլն-ը ներդրվելու է հանքի շինարարության փուլում:

Ամուլսարում ոսկու հանքավայրի շահագործումը բնապահպանները համարում են անթույլատրելի ոչ միայն այն պատճառով, որ Վայոց ձորում են գտնվում Կարմիր գրքում գրանված մի շարք կենդանատեսակներ ու բուսատեսակներ, այլև Ամուլսարի մոտ են գտնվում 2 ջրամբարներ` Կեչուտն ու Սպանդարյանը: Վերջինս երկրորդ խոշոր ջրամբարն է Հայաստանում, այն ունի  257 միլիոն խորանարդ մետր տարողություն: Սպանդարյանի ջրամբարից Արփա-Որոտան թունելով ջուրը հոսում է Կեչուտի ջրամբար, որտեղից էլ` Արփա-Սևան թունելով` Սևանա լիճ: