Շնողի մշակույթի տունը` ոչ միայն մշակույթի համար
Էմմա Պետրոսյան
Շնողի մշակույթի տանը մոտ երկու տարի առաջ երեխաների համար մի քանի խմբակներ էին գործում, այժմ միայն շախմատի խմբակն է պահպանվել: Խմբակների փակվելու պատճառն, ինչպես նշում է Շնողի համայնքապետ Հովիկ Սահակյանը, ֆինանսական միջոցների սղությունն է: Շնողի տարեկան բյուջեն կազմում է շուրջ 69 մլն դրամ, որի մեծ մասն աշխատավարձերի, մնացածն էլ` համայնքի առաջնային խնդիրների լուծման համար է ծախսվում: « Համայնքային ենթակայությամբ է գործում 3 խմբանոց մանկապարտեզը, արվեստի դպրոցը, մշակույթի տունը: Բացի նշվածներից աշխատավարձ է վճարվում գյուղապետարանի աշխատակազմին եւ այսպես ծախսվում է բյուջեի առյուծի բաժինը»:
Համայնքային բյուջեի 48 մլն դրամը, որպես աշխատավարձ, հատկացվում է թվարկված հիմնարկների 65 աշխատողին: Մշակույթի տան համար 4 հաստիք է հատկացվել: Ու թեեւ շենքում 5 սենյակ կա, բայց դրանցից միայն 4-ն են օգտագործվում, մեկը մշակույթի տան տնօրենի` Գայանե Ղորխմազյանի համար, մյուսը ծառայեցվում է` շախմատի խմբակին, երկուսն էլ`մշակույթից բավականին հեռու նպատակների համար: Շնողի մշակույթի տան տնօրեն Գ. Ղորխմազյանը նշում է, որ այդ երկու սենյակները վարձակալությամբ տրվել են անհատ ձեռներեցների: «Սենյակներից մեկում դիմահարդարն է աշխատում, մյուսում` վարսավիրը: Ստացված գումարներն էլ ոչ թե ես եմ վերցնում, այլ գնում է գյուղի բյուջեին»,- տեղեկացրեց մշակույթի տան տնօրենը:
Գյուղի բյուջեն այս երկու անհատ ձեռներցների շնորհիվ համալրվում է ամսական 10,000-ական դրամով: Շնողի համայնքաապետ Հովիկ Սահակյանը վստահեցնում է, որ այն ծախսվում է համայնքի համար: «Ես կարծում եմ, որ մշակույթի տունը պիտի ծառայի որպես մշակույթի տուն: Բայց, էս պահին գործող խմբակ չկա, էդ սենյակներն էլ ազատ են, իսկ Շնողում էլ մինչեւ այդ կանանց համար վարսավիրանոց չի գործել, դրա համար էլ էդ տարածքը դեռեւս նախորդ գյուղապետի օրոք տրամադրել ենք նրանց: Ամեն դեպքում դա ժամանակավոր բնույթ է կրում, առաջիկայում կփորձենք պայմաններ ստեղծենք` էդ տարածքը ազատենք»,- ասաց համայնքի ղեկավարը:
Մշակույթի տան տնօրենն էլ նշում է, որ եթե սենյակներն ազատ լինեն, նոր խմբակներ բացելու քայլեր կձեռնարկեն: «Եթե ուրիշ ազատ ու հարմար տարածք լիներ գյուղում, էդ աշխատողները համաձայնեն տեղափոխվել, բայց տարածք չկա: Մի ուրիշ սենյակ էլ կա շենքում, որ ինչ-որ հ/կ է վերցրել, չի օգտագործում, բայց հրաժարվում է վերադարձնել: Ամեն դեպքում, մոտ ապագայում այդ սենյակն էլ ազատել կտանք անպայման ու եթե ազատ սենյակներ լինեն, համապատասխան խմբակներ, իհարկե, կբացվենկա»,- հայտնեց Գ. Ղորխմազյանը:
Սակայն, բացի խմբակների բացակայությունից, այստեղ եւս մեկ խոչընդոտ կա մշակութային կյանքին վերադառնալու հարցում. թեեւ շենքը մոտ 2 տարի առաջ է վերանորոգվել է, սակայն այժմ էլ այն վերանորոգման ու գույքի համալրման կարիք ունի: Շնողում որեւէ ցուցադրության, հրավերքի դեպքում համայնքապետն ու մշակույթի տան տնօրենը հաճախ են մերժում ստանում` համապատասխան պայմաններ չունենալու պատճառով:
Մեկնաբանություններ (5)
Մեկնաբանել