Լ. Սարգսյան. «Եթե ԲՀԿ-ն նախագահի հրաժարականի մասին դեռ չի հայտարարում, չի նշանակում, որ չի հասկանում դրա կարևորությունը»
«Հետք»-ի հարցերին պատասխանում է ԱԺ ՀԱԿ խմբակցության պատգամավոր, Վերակազմյալ ՍԴՀԿ ատենապետ Լյուդմիլա Սարգսյանը
- Ոչ իշխանական չորս կուսակցություններից որևէ մեկը չհամաձայնեց մաս կազմել իշխող կոալիցիային, թեև շատերը հակառակն էին պնդում` վստահեցնելով, որ քառյակը կպառակտվի: Ինչո՞ւ ԲՀԿ-ն ու ՀՅԴ-ն, Ձեր կարծիքով, մաս չկազմեցին կոալիցիային:
- Շատերի երազանքն էր, որ քառյակը պառակտվի, որովհետև այն իրենից միավոր է ներկայացնում: Բայց ինչպես տեսնում եք` երազանքները այդպես էլ չիրականացան: Քառյակի յուրաքանչյուր անդամ շատ լավ գիտակցում է` միասին բամաթիվ խնդիրներ կարող ենք լուծել: Ի պատիվ մեր գործընկերների, որոնց տրամադրությունների մեջ մասամբ կար կոալիցիոն կառավարության մեջ մտնելու մտադրությունը, որը պայմանավորված էր որոշակի ճշտումներով, ի սկզբանե, իմ կարծիքով, իրականանալի չէր: Այդ ուժերը շարունակեցին առաջնահերթ համարել քառյակում համագործակցությունը ու մաս չկազմեցին իշխանությանը: Խորտակվող նավի մեջ մտնելն այդ ուժերի կողմից քաղաքական կարճատեսություն կլիներ, իսկ ես համարում եմ, որ ներկայիս իշխանություններն ու գործող համակարգը խորտակվող նավ են: Կարելի է միայն ուրախանալ, որ քառյակում համախմբման պրոցեսը շարունակվում է, չի նահանջում: Վաղ թե ուշ, բոլոր նրանք, ովքեր մտահոգ են երկրի ապագայով, խոսքս վերաբերում է նաև քաղաքացիական շարժումներին, տեսնում են, որ երկրում առկա խնդիրների լուծման միակ ճանապարհը իշխանափոխությունն է, ի վերջո պետք է համախմբվեն այդ գաղափարի շուրջ:
- Բայց քառյակի մյուս ուժերը, ում հետ դուք համագործակցում եք, արդյոք գիտակցո՞ւմ են, որ երկրում առկա խնդիրների լուծման միակ ճանապարհը Սերժ Սարգսյանի հրաժարականն է: Կարծում եք, որ ՀՅԴ-ն ու ԲՀԿ-ն Ս. Սարգսյանի հրաժարականի պահանջի շուրջ կմիավորվե՞ն, երբ մինչև այս պահը հայտարարում են, թե իրենց օրակարգում նման հարց դրված չէ:
- Ամեն մեկն իր ճանապարհն է տեսնում, ամեն մեկն իր մոտեցումն ունի դեպի իշխանափոխություն: Մեր (նկատի ունի ՀԱԿ խմբակցության-հեղինակ) դիրքորոշումը շատ հստակ է, մենք գիտակցում ենք, որ կառավարության փոփոխությամբ երկրում բարեփոխումներ իրականացնել հնարավոր չէ, և եթե նույնիսկ վարչապետը աս լինի, նա, մինույն է, կաշկանդված է երկրի նախագահի հետ պայմանավորվածություններով: Հետևաբար, կառավարության փոփոխությամբ համակարգային փոփոխություն հնարավոր չէ իրականացնել: Կարծում եմ, որ մեր մոտեցումը շատ հստակ է` հասնել Սերժ Սարգսյանի հրաժարականին, արդար ու թափանցիկ ընտրությունների միջոցով նոր իշխանություն ձևավորել:
Ինչ վերաբերում է մեր գործընկերներին, ապա հույս ունեմ, որ Սերժ Սարգսյանի հրաժարականը պահանջելու հարցում մենք ևս միասնական կարծիք կունենանք:
- Այսինքն հիմա չունե՞ք միասնական կարծիք:
- Ես ասացի` հույս ունեմ, որ մենք կունենանք միասնական կարծիք:
- ՀԱԿ-ը վերջերս հայտարարությամբ հանդես եկավ` նշելով, որ քառյակը պետք է գնա Սերժ Սարգսյանի հրաժարականը պահանջելու ճանապարհով: Հավատո՞ւմ եք, որ ԲՀԿ-ն ու ՀՅԴ-ն կդիմեն այդ քայլին:
- Եթե մեր խմբակցությունը` ՀԱԿ-ը, նման հայտարարությամբ հանդես է գալիս, և քառյակի մյուս անդամ-խմբակցությունները այդ հայտարարության նկատմամբ իրենց դժգոհությունը չեն արտահայտում, ուրեմն ունեն նաև նման մոտեցում: Եվ դա ցույց է տալիս, որ, վերջիվերջո, մեր մոտեցումները ընդհանուր են լինելու:
- Դժգոհություն չեն արտահայտում, բայց գոհունակություն էլ չեն հայտնում:
- Ժամանակ է պետք, ժամանակի ընթացքում, կարծում եմ, կհասնենք նաև դրան:
- Կարծիքներ կան, որ ԲՀԿ-ն չի պահանջի Սերժ Սարգսյանի հրաժարականը, որովհետև կուսակցության գործարար թևը չի դիմի ունեցվածքը կորցնելու ռիսկին: Դուք համաձա՞յն եք այս դիտարկումներին:
- Ես շատ բարձր եմ գնահատում ԲՀԿ-ի այսօրվա քաղաքական դիրքորոշումը: Այո, ոչ մեկ չի կարող հերքել, որ Գագիկ Ծառուկյանը բավական հաջողակ գործարար է, մենք էլ բոլորս շատ լավ հասկանում ենք, որ այս երկրում գործարար լինելն անվտանգ չէ: Եթե ԲՀԿ-ն այդ մասին դեռ չի հայտարարում, դա չի նշանակում, որ չեն հասկանում Սերժ Սարգսյանի հրաժարականի կարևորությունը: Վերջին հաշվով, պարտադիր չէ, որ Ս. Սարգսյանի հրաժարականը պահանջելու մասին հայտարարություն արվի ամիսներ առաջ, ոչ, կարևորը գործողություններն են: ԲՀԿ-ն այսօր իրեն շատ բարոյական է պահում, շատ կառուցողական, և այն խնդիրները, որոնք վեր է հանել Գագիկ Ծառուկյանը, որոնք նաև մեր կողմից մշտապես շեշտված խնդիրներ են եղել, խոսում է այն մասին, որ ԲՀԿ-ն հասկանում ու տեսնում է երկրի խնդիրները, լուծումներ է փորձում գտնել մեզ հետ միասին:
- Ձեզ հետ միասին գնում են Սերժ Սարգսյանի հրաժարականը պահանջելու ճանապարհով, բայց այդ մասին չեն բարձրաձայնո՞ւմ, լռո՞ւմ են:
- Չէ, ես նման բան չասացի: Ես պարզապես չբացառեցի, որ մի օր կհասնենք դրան: Իսկ այն, որ մեզ հաջողվում է համագործակցել միմյանց հետ, հույս է ներշնչում, որ մեր աշխատանքը կառուցողական է, փոխըմբռնման մթնոլորտը բավական բարձր է:
- Օրերս իշխող կոալիցիայից դուրս եկավ «Օրինաց երկիր» կուսակցությունը: Պատրա՞ստ եք ՕԵԿ-ին ընդունել ձեր շարքերը, ընդլայնել քառյակի կազմը:
- Այս հարցում ես կարող եմ միայն իմ անձնական կարծիքը հայտնել` որպես ՎՍԴՀԿ ատենապետ, որովհետև քառյակը պետք է որոշի` ընդունե՞լ ՕԵԿ-ին, թե՞ ոչ: Բնականաբար, եթե ՕԵԿ-ը իշխանություն չէ, ընդդիմություն է, բայց եթե քաղաքական ուժն իրեն ընդդիմադիր է հայտարարում, դա դեռ չի նշանակում, որ համապատասխանում է ընդդիմադիր լինելու բոլոր չափորոշիչներին. ընդդիմությունը փողոցներում է, ընդդիմությունը տարիներ շարունակ վեր է հանել խնդիրներ, որոնց ժամանակ ՕԵԿ-ը կոալիցիայի կազմում էր, որոշումներ էր կայացնում ՀՀԿ-ի հետ համատեղ: Շատ շուտ է ՕԵԿ-ին դիտարկել որպես ընդդիմադիր: Մեզ համար ՕԵԿ-ն այն քաղաքական ուժն է, որի հանդեպ չկա վստահություն, հանրային դրական վերաբերմունք: 2008թ. ՕԵԿ-ը գցեց ժողովրդին` վերցնելով ընդդիմադիր հատվածի ձայներն ու մտնելով իշխող կոալիցիա, իսկ արդյունքում տեղի ունեցավ Մարտի 1-ի սպանդը` 10 անմեղ զոհերով:
- Մտավախություն չունե՞ք, որ կկրկնվի նույնը, 2017-18 թթ. ընտրություններից առաջ ՕԵԿ-ը դուրս եկավ` նորից վերադառնալու ակնկալիքով:
- Չեմ բացառում, որովհետև նման փորձ մենք ՕԵԿ-ի հետ կապված ունենք: Անվստահելի գործընկեր է…
Մեկնաբանություններ (1)
Մեկնաբանել