Լուսինե Փարսադանյան

Ալավերդի քաղաքում փողոցները լուսավորող շուրջ 420 լուսակետ կա, բայց բոլորը չէ, որ անխափան աշխատում են: Քաղաքապետի հավաստմամբ` վերջին անգամ քաղաքում անսարք լուսատուները վերանորոգել են փետրվարի սկզբին: Այս պահին սակայն, լուսավորության ցանց ունեցող փողոցներում մութ անկյունները շատ են: Օրինակ, Թումանյան փողոցի` քարե կամրջից մինչեւ Էնգելս թաղամաս տանող ճանապարհահատվածում 6-7 անսարք լուսակետ կա: Այս հանգամանքը, եթե տղամարդ անցորդներին նեղություն չի պատճառում, ապա կանայք գիշերային ժամերին խուսափում են այդ հատվածներով անցնել:

«Քաղաքապետարանը, եթե համապատասխան տեխնիկա ունենար, լուսակետերի վերանորոգման աշխատանքներ կկատարվեին ամեն օր»,- ասում է քաղաքապետ Արտավազդ Վարոսյանը,- ամեն անգամ լուսակետերի վերանորոգում իրականացնելիս քաղաքապետարանն անհրաժեշտ տեխնիկան այլ ընկերություններից է խնդրում, իսկ ամեն օր դա հնարավոր չէ»: Քաղաքապետը տեղեկացրեց, որ համապատասխան դետալներն արդեն ձեռք են բերել եւ այս շաբաթվա մեջ անսարք լուսատուները կվերականգնվեն: Քաղաքապետ Արտավազդ Վարոսյանը նշում է, որ քաղաքի լուսավորության հետ կապված այս տարի մի քանի ծրագիր ունեն: Օրինակ, Բաղրամյան թաղամաս տանող ճանապահի լուսակետերը կփոխվեն նորերով, որի համար համայնքային բյուջեի ֆոնդային մասից կտրամադրվի 1 մլն 700 հազար դրամ:

Առաջիկայում քաղաքապետարանը, համագործակցելով «Գլոբալ էկոլոգիական հիմնադրամ» կազմակերպության հետ, նախատեսում է քաղաքում իրականացնել նաեւ էներգախնայողության ծրագիր: Խնայված էներգիան կօգտագործվի այլ փողոցների լուսավորության ժամաքանակն ավելացնելու նպատակով: Առաջին փուլում նախատեսվում է շուրջ 70 նոր լուսակետ տեղադրել, որոնք այժմյան շահագործվող լամպերից 30-40%-ով պակաս էներգիա կծախսեն: Նոր լուսակետերը կտեղադրվեն Զորավար Անդրանիկի փողոցում եւ Սանահին-Սարահարթ թաղամասի Շահումյան փողոցում: