ՈՒրբաթ, 21 սեպտեմբերի

Դատարանի հարմարավետ շենքը կա, դատավորը չկա



Ալավերդին ժամանակակից պահանջներին համապատասխան վերանորոգված դատարանի շենք, կարգադրիչների ու  քարտուղարության  բավարար անձնակազմ ունի, սակայն արդեն մեկ տարի է՝ քաղաքացիական գործերով դատավոր չունի:

Վերջինիս պատճառով ոչ միայն Ալավերդու, այլև  Թումանյանի տարածաշրջանի 30 համայնքների բնակիչներն իրենց քաղաքացիական հայցերի դատական լուծումները ստանալու համար դեգերում են Լոռու մարզի  ընդհանուր իրավասության դատարանի Վանաձորի, Ստեփանավանի, Սպիտակի և  Տաշիրի նստավայրերի դատարաններում:

Ալավերդու նստավայրի քրեական գործերի մեծ մասի դատքննությունն էլ  տեղի է ունենում Վանաձորում: Դրա հետևանքով նստավայրի դատարանի  աշխատակազմը գրեթե անգործության է մատնված:

2013թ. մայիսի 13-ին 6 ամսով՝ մինչև 2013թ նոյեմբերի 13-ը, Ալավերդու  նստավայրի քաղաքացիական  գործերով նախկին  դատավոր Արթուր Աթաբեկյանին գործուղել են Երևան: Դատավոր Արթուր Աթաբեկյանն իր  գործուղումն ավարտելուց հետո այդպես էլ Ալավերդու նստավայրի դատարան չի վերադարձել, նոր դատավոր էլ չեն ուղարկել:

Սկզբում  քաղհայցերը քննելու համար Ալավերդու նստավայրի դատարան են եկել Սպիտակի, Ստեփանավանի, Տաշիրի կամ Վանաձորի նստավայրերի դատավորները: «Մենք մտածեցինք, թե մեզ համար ինչ տարբերություն,  կարևորը այն է, որ   դատերն ընթանում էին: Հետո դա էլ վերացավ»,-ասում է   փաստաբան Ռոման Կոնինյանը:

«Ներկայումս տարածաշրջանի շատ քաղաքացիներ դատարան քաղաքացիական հայցեր չեն ներկայացնում, որովհետև բացի փաստաբանական ծառայության գումարը, նրանք պետք է կրեն նաև բազմաթիվ ծախսեր, այդ թվում նաև ճանապարհածախս`գործի քննությունը այլ քաղաքում ընթանալու  պատճառով»,-ասում է  փաստաբան Ալեքսանդր Ծատինյանը:

 Փաստաբան Ռոման Կոնինյանը հիշում է, որ  Ալավերդու նստավայրի  դատարանը, երբ քաղաքացիական գործերով զբաղվող դատավոր ուներ, օրվա ընթացքում 7-8  քաղհայցով դատական նիստ էր լինում: «Հիմա իմ վարույթում  մոտ 40 քաղաքացիական  գործեր կան, որոնք լսվում են  Տաշիրի, Սպիտակի և մարզի մյուս քաղաքների նստավայրերի դատարաններում»,-բացատրում է փաստաբանը:

Ալեքսանդր Ծատինյանն էլ հիշում  է, որ նախկինում շաբաթվա ընթացքում իր փաստաբանական ծառայությունից օգտվել է 7 քաղաքացի, հիմա դիմում է 1-2 քաղաքացի: Ըստ վերջինիս՝ ալավերդցիների մեկ ամուսնալուծության կամ ալիմենտի բռնագանձման գործի քննությունը Լոռու մարզի ընդհանուր իրավասության դատարանի այլ նստավայրերում տևում է  շուրջ մեկ տարի: Քաղհայցերը մարզի մյուս  նստավայրերի դատարանների դատավորների վրա բաշխելը լուրջ դժվարություններ է ստեղծում նաև փաստաբանների աշխատանքում: Վերջիններիս համար ֆիզիկապես անհնարին է լինում նույն օրը մասնակցել Վանաձորի, Սպիտակի և Տաշիրի նստավայրերում  նշանակված նիստին: «Ամբողջ օրը ճանապարհներին ենք լինում»,- դժգոհում է Ռ.Կոնինյանը:

Ռոման Կոնինյան Ալեքսանդր Ծատինյան

Վերջինս ապրիլի 25-ին երկու գործ է ունեցել Սպիտակում եւ Տաշիրում: Փաստաբանը պատմեց, որ հայցվորներից մեկը 80 տարեկան մի  կին` ծննդյան թվի գրանցման գործով, պաշտպանին ասել է, որ  5 հազար դրամ չունի  փաստաբանի Տաշիր գնալու ճանապարհածախսը վճարելու համար և վերջ: Երկրորդը` երկու երեխաների հայրության ճանաչման գործ է եղել:  Երեխաների մայրը`5 հազար դրամ ճանապարհածախս է տվել փաստաբանին և  խնդրել է այնպես անել, որ գործը մեկ դատական նիստով ավարտվի, որովհետև այլևս հնարավորություն չունի ճանապարհածախս վճարելու:

Ռ Կոնինյանը նաև նկատել է, որ մյուս նստավայրերի դատավորները ծանրաբեռնվածության պատճառով չեն կարողանում ապահովել քաղհայցերի բազմակողմանի և օբյեկտիվ քննություններ, այդ թվում՝ պատշաճ հետազոտել ապացույցները: Դատական դեպարտամենտի միջազգային համագործակցության և հասարակայնության հետ կապերի ծառայության պետ Արսեն Բաբայանը հայտնեց, որ Լոռու մարզի ընդհանուր իրավասության դատարանի Ալավերդու նստավայրում քաղաքացիական գործերով դատավորի հաստիք կա, սակայն նստավայրում դատավոր կնշանակվի 2015թ.-ի հունվար կամ փետրվար ամիսներին:

«Դիմորդները, ովքեր ուզում են դատավոր դառնալ մրցույթից հետո, արդեն հայտնի են, նրանք ներկայումս 10-ամսյա վերապատրաստում են անցնում ակադեմիայում: Վերապատրաստումն ավարտելուց հետո Ալավերդու նստավայրում կնշանակվի քաղաքացիական գործերով դատավոր»,- ասաց Արսեն Բաբայանը:

«Այդ դեպքում գոնե մեր քաղհայցերը քննող դատավորները թող գան Ալավերդու նստավայրի դատարան, ոչ թե սոցիալապես անապահով բնակիչներն ու փաստաբանները 80 կմ ճանապարհ հատեն դատավորներին հասնելու համար»,- ասում է Փաստաբան Ռոման Կոնինյանը:


Գլխավոր էջ



Մեկնաբանել
Շնորհակալություն մեկնաբանելու համար: Ձեր մեկնաբանությունը պետք է հաստատվի խմբագրության կողմից:

Լատինատառ հայերենով գրված մեկնաբանությունները չեն հրապարակվի խմբագրության կողմից։

Լրահոս

Բոլոր նորությունները

Արխիվ