HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Ինչո՞ւ են անհետացել 19-ամյա աղջնակի ներքնաշորերը (մաս 2)

Սկիզբը

Վթար՝ մահվան ելքով, մեղավորը մեկ օր չի ազատազրկվել

7 տարի է՝ Մասիսի բնակչուհի Սաթենիկ Գևորգյանը տարբեր դռներ է բախում, որպեսզի պարզի, թե 2007թ.-ի մարտի 9-ին ինչ է տեղի ունեցել իր միակ դստեր, 19-ամյա Սուսաննա (Սյուզի) Գևորգյանի հետ: Այդ օրը Սյուզին աշխատանքից տուն չի վերադարձել, իսկ հետո մորը հայտնել են, թե աղջիկը վթարի է ենթարկվել ու մահացել: Նախաքննության այս վարկածն ու դատավարությունը չեն փարատել մոր կասկածները: Նրա համոզմունքով` աղջկա նկատմամբ բռնություն է կիրառվել մահվանից առաջ:

«Եթե նույնիսկ հավատամ իրենց վարկածին, ապա ի՞նչ է ստացվում: Ստացվում է, որ վթարից մարդ է մահացել, իսկ մեղավորը՝ Արարատ Կաֆյանը, մեկ օր նույնիսկ չի ազատազրկվել: Որպես խափանման միջոց դատարանն ընտրել էր ոչ թե կալանքը, այլ գրավը: Դեպքից 3 ամիս հետո էլ դատավոր Ելենա Քոչարյանի թեթև ձեռքով (առաջին լուսանկարում՝ ձախից-հեղ.) մեղավորը դատարանից գնաց տուն: Ապրիլի 20-ին Սյուզին կդառնար 27 տարեկան, իսկ 7 տարի առաջ՝ իր ծննդյան օրը, ես իր մահվան քառասունքն եմ արել»,-ասաց «Հետքի» խմբագրությունը այցելած Սաթենիկը՝ ներկայացնելով քրեական գործի նյութերը:

Սաթենիկ Գևորգյանը` Սյուզիի մայրը

 Ըստ մեղադրյալ, 1975 թ-ին Մասիսում ծնված, հետագայում ՌԴ քաղաքացի դարձած Արարատ Կաֆյանի ցուցմունքի` ինքն ընտանիքով դեպքից երեք ամիս առաջ Օմսկից վերադարձել է հայրենի Մասիս: Երեխաներին տարել է դպրոց՝ օգտվելով «Սիգմա» տաքսի ծառայությունից: Այնտեղ էլ ծանոթացել է հեռախոսավարուհի Սյուզիի հետ:

Դեպքի օրը Սաթենիկի դուստրը՝ Սյուզի Գևորգյանը, աշխատանքից հետո հանդիպել է իր դասղեկին՝ Թ. Բաբայանին: Նրան ասել է, որ շուտ տուն պիտի գնա, քանի որ մայրը սպասում է: Իսկ ըստ մեղադրյալ Արարատ Կաֆյանի ցուցմունքի` Սյուզին երեկոյան 9-ի մոտ զանգել է իրեն ու խնդրել տանել հարևան գյուղ ինչ-որ մեկին տեսնելու: Մինչդեռ տուժողի իրավահաջորդ Սաթենիկ Գևորգյանի պահանջով նախաքննական մարմինը բջջային օպերատորից ստացել է մահացած աղջկա հեռախոսահամարի ելքային ու մուտքային զանգերի բացվածքը (ներկայացվել է դատարան), որտեղ Սյուզիի հեռախոսահամարից Արարատ Կաֆյանի հեռախոսահամարին կատարված զանգ չի հայտնաբերվել: Հակառակը, Արարատի համարից մի քանի անգամ դեպքին նախորդող ժամանակահատվածում զանգեր են եղել Սյուզիի համարին:

Արարատի ցուցմունքի համաձայն` երբ դեպքի օրը իր «Օպել» մակնիշի մեքենայով Սյուզիին տարել է Նորամարգ գյուղ, այնտեղ սպասել են որոշ ժամանակ, սակայն այն մարդն, ում պիտի Սյուզին տեսներ, չի եկել: Հետո մտել են «Քաջ Նազար» խորտկարան, որտեղ մնացել են 30 րոպե ու դուրս եկել ու շարժվել Մասիս:

Ըստ դատավճռի` Կաֆյանը մեքենան վարել է 100 կմ/ժ անթույլատրելի արագությամբ: Կաֆյանի ցուցմունքով` Սյուզին հետդարձի ճանապարհին շեղել է իր ուշադրությունը, որի հետևանքով նա կորցրել է մեքենայի կառավարումն ու դուրս գալով ճանապարհի երթևեկելի մասից՝ հարվածել հողաթմբին: Ըստ Կաֆյանի ցուցմունքի` Սուսաննա (Սյուզի) Գևորգյանը վթարից առաջ դուրս է ընկել մեքենայից ու գլխի շրջանում ստացած վնասվածքներից մահացել: Դատաբժշկական փորձաքննության համաձայն` նա մահացել է վթարից 1-2 րոպե անց:

Երբ աներձագդ նաև քննիչ է

Վթարից հետո, ըստ քրեական գործի նյութերի, Արարատ Կաֆյանը շտապօգնություն չի կանչել, փոխարենը կանչել է իր աներձագին՝ Սամվել Անդրեասյանին, ով աշխատում է որպես քննիչ ոստիկանության քննչական գլխավոր վարչության Արարատի մարզի քննչական բաժնի Մասիսի քննչական բաժանմունքում:

Հենց քննիչ-աներձագ Սամվել Անդրեասյանն էլ հիվանդանոց է տեղափոխել Այուզիին ու Արարատին: «Բայց դատաբժիշկը գրել էր, որ մահը վրա է հասել ընկնելուց 1-2 րոպե անց, հետևաբար ստացվում է, որ քննիչ-աներձագ Անդրեասյանն արդեն աղջկաս դին է տեղափոխել հիվանդանոց: Ինչ իրավունքով է նա տեղաշարժել դին: Լինելով քննիչ՝ նա փայլուն գիտի, որ չի կարելի դա անել: Ես էլ իրավունք ունեմ կասկածել, որ հենց նրա բարեկամական ջանքերով են կոծկվել կարևորագույն ապացույցներ: Իմ համառ պնդումներից հետո նախաքննության մարմինը, որը նույն Մասիսի քննչականն էր, այսինքն՝ Կաֆյանի աներձագի ողջ ընկերությունը, ստիպված եղավ գոնե ձևական հարցաքննել Սամվել Անդրեասյանին: Հետո նա գալիս էր դատերին, բայց ոչ որպես վկա, այլ որպես աներձագ, չէ՞ որ, իբր, դատում էին իր քրոջ ամուսնուն: Ես պահանջում էի, որ նրան հարցաքննեն դատարանում, բայց անօգուտ: Համարյա համոզված եմ, որ կաշառքով ու ծանոթ-բարեկամական կապերով կոծկեցին այս գործը»,- պատմեց Սաթենիկ Գևորգյանը:  

Copy-paste-ով դատավճիռը

Արարատի ու Վայոց ձորի մարզի ընդհանուր իրավասության դատարանի դատավոր Ելենա Քոչարյանը, ով լսել է այս գործը, երկու էջանոց դատավճռում երկու սխալ է թույլ տվել: Նախ սխալ է գրված Սյուզիի՝ Սուսաննա Գևորգյանի ազգանունը (դատավճռում նշված է Գրիգորյան), երկրորդ՝ այլ քրեական գործից copy-paste է արված մեկ ուրիշ մեղադրյալի անուն՝ Արթուր Ռաֆիկի Պետրոսյան:

 

Դատարանում Կաֆյանը զղջացել է տեղի ունեցածի համար ու իրեն մեղավոր ճանաչել: Դատաբժշկական փորձաքննության եզրակացության համաձայն, վթարից վնասվել է Արարատ Կաֆյանի աջ ուսգլխիկը: Քրեական գործի նյութերում կարդում ենք, որ դեպքի օրը 23:30 ստուգվել է Արարատ Կաֆյանի սթափությունը ( թիվ 18 ակտ՝ սթափ), սակայն դատաբժշկական փորձաքննության 13/հ արձանագրությունից երևում է, որ Կաֆյանը հիվանդանոց է ընդունվել 00:30-ին: Հարց. ինչպե՞ս կարող էր ստուգվել վարորդի սթափությունը, եթե նա դեռ հիվանդանոցում չէր:

Սաթենիկը չի հավատում անգամ Արարատի ուսագլխի վնասվածքին, նրա կարծիքով, դա էլ համոզիչ չէ: «Գործի նյութերով էլ գրված է, որ մեքենան ոչ ծառին է հարվածել, ոչ այլ մեքենայի, ուղղակի ստացվում է որ ինքն իրեն վթարվել է: Ես ամբողջովին ծանոթացել եմ քրեական գործին՝ որպես տուժողի իրավահաջորդ, բայց այնտեղ անգամ լուսանկարներ չեմ տեսել»,-ասաց Սաթենիկը՝ «Հետքին» տրամադրելով քրեական գործի պատճենահանված նյութերը (պատճեները Սաթենիկ Գևորգյանին տրամադրել է դատարանը՝ որպես տուժողի իրավահաջորդ):

Եվ կրկին կորած ներքնաշորերի մասին

Սյուզին

Սաթենիկն ու իր 85-ամյա մայրը՝ Արևհատ տատը, պարբերաբար բողոքել են, թե ինչու իրենց չեն տալիս Սյուզիի հագուստը: Մի օր էլ ծեր կինը գնացել է Մասիսի դատարան ու հանդիպել դատավոր Ելենա Քոչարյանին: Խոսակցությունը շորերի շուրջ տաքացել է ու Սյուզիի տատիկը դատավորին ասել է՝ բենզինը կլցնեմ, կվառեմ. «Այդ նախադասության պատճառով մորս վրա ուզում էին մահվան սպառնալիքի հոդված դնեին: 85 տարեկան կնոջը ահաբեկիչ էին դարձնում: Մայրս արդեն չկա, մնացել եմ մեն-մենակ իմ պայքարի հետ…Քննչականից ինձ ասում էին՝ եղբոր տղաներ ունես, չե՞ս վախենում՝ գլխներին գործ սարքենք: Դա արվում էր, որ ես էլ չբողոքեմ, հաշտվեմ, որ վթար է եղել, անզգույշ պատահար ու վերջ: Բայց շարունակում էի բողոքել՝ հույսով, որ մի օր կիմանամ ճշմարտությունը»,-պատմում է Սաթենիկը: Նա աղջկա մահվան գաղտնիքը պարզելու համար տասնյակ բողոքներ, դիմումներ է ուղղել պետական տարբեր ատյաններ, ՀՀ նախագահի աշխատակազմ, սակայն բոլոր գրությունները ուղղորդվել են մեկ կառույցի՝ դատախազություն, որտեղից էլ եկել են պատասխաններ՝ կա օրինական ուժի մեջ մտած դատավճիռ:   

Վերաքննիչ քրեական դատարանն անփոփոխ է թողել առաջին ատյանի դատավճիռը, այն է՝ 2 տարվա պայմանական ազատազրկում փորձաշրջանով: Իսկ Վճռաբեկ դատարանն առհասարակ վարույթ չի ընդունել բողոքը: «Չեմ վստահում մեր իրավապահներին, մեր դատական համակարգին: Բայց ինչքան էլ ապրեմ, միևնույնն է, պիտի պարզեմ, թե ինչ է եղել իմ երեխայի հետ: Ես գրեթե վստահ եմ, որ վթար չի եղել, այլ բռնություն ու սպանություն»,-ասաց մահացած Սյուզիի մայրը:

Հ.Գ. Քրեական գործն ամբողջությամբ ուսումնասիրելու նպատակով, «Հետքը» դիմել է ՀՀ Դատական դեպարտամենտ: 19-ամյա Սուսաննա (Սյուզի) Գևորգյանի մահվան հանգամանքներին մանրամասն կանդրադառնանք ողջ քրեական գործն ուսումնասիրելուց հետո: 

Մեկնաբանություններ (3)

aram
Vnasvazq stazaz u gitakzutyun@ korzraz andzin verzneln u texapoxel@, aranz hatuk sarqavorumneri u voch masnageti koxmiz, orenqov patzeli ararq e. Mahazazin texapoxel@ da apazuyzneri qoxarkum e, vor@ nuynpes orenqov patzeli ararq e. Amen depqum qnnich anerdzag@ linelov orenqi nerkayazuzich tuyl e tvel qreoren patzeli ararqner.
ՄԱՐՏԻ 1
Քննչականից ինձ ասում էին՝ եղբոր տղաներ ունես, չե՞ս վախենում՝ գլխներին գործ սարքենք: - ԱՀԱ ՀՀ ԱՐԴԱՐԴԱՏՈՒԹՅԱՆ ԴԵՄՔԸ ԷՆՔԱՆ ԳՈՐԾ ՍԱՐՔԵՆ ՄԱՐԴՈՒ ՎՐԱ։ ԱՆԻԾՎԵԵԵԵԵԵԵԵԵԵԵԵԵԵԵԵԵԵԵԵԵԵՔ
hasmik
ցավալին այն է, որ ոչ մի բանի չես հասնում, երբ բողոքում ես, ընդհակառակը, այնքան են լկտիացել, որ սրանց ոչ թե արդարադատությունն է հետաքրքրում, այլ ոնց թե դու իրենց բան ասեցիր, դե հիմա կտեսնես, քննիչից մինչև աղվան թայլաթ փաշան իրենց սարքած գործը տանում են մինչև դատարան, դատարանում էլ աղվան թայլաթ փաշայի ահից դատավորը իր սև գործն է անում, և այսպիսով կատարելով սպիտակ ցեղասպանություն հայ ազգի նկատմամբ, անիծվեք...

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter