Հարկեր չվճարող գյուղացիների գույքի վրա արգելանք կդրվի
Մարզային համայնքների ղեկավարներն ամեն ինչ անում են եկամուտների հավաքագրման կառավարության պահանջած 100%-ոց ցուցանիշն ապահովելու համար: Սակայն անտեսվում են գյուղացիների` հողի հարկը չվճարելու բուն պատճառները: Ալավերդու քաղաքապետ Արտավազդ Վարոսյանն ապրիլի 28-ին տեղի ունեցած ավագանու նիստում հայտնեց, որ 2014թ. բյուջեի առաջին եռամսյակի եկամուտների հավաքագրումը կատարվել է 98,5%-ով: «Առաջին եռամսյակը հարկահավաքության ամենադժվար եռամսյակն է, իսկ հողի հարկի հավաքագրումն` ամենադժվար հավաքագրվող հարկատեսակը»,- ասաց նա:
Ալավերդու քաղաքապետարանն առաջին եռամսյակում հողի հարկը նախատեսված 1 մլն 121 հազար 600 դրամ եկամուտների դիմաց հավաքագրվել է 1 մլն 104,500 հազար դրամ, թերակատարվել է 1,5%-ով: Արտավազդ Վարոսյանն ավագանուն բացատրեց, որ բարձր կատարողականն ապահովվել է իրավաբանական անձանցից հավաքագրվող հողի հարկի հաշվին: «Ֆիզիկական անձանց մասով մենք դեռեւս հարկահավաքության ցանկալի արդյունք չենք արձանագրել»,- ասաց նա` առանց դրա պատճառները մեկնաբանելու: Ա. Վարոսյանն անդրադարձավ նաեւ «Հարկերի մասին» ՀՀ օրենքի 29-րդ հոդվածում կատարված օրենսդրական փոփոխությանը, որը վերաբերում է ՏԻՄ-ին: «Հոդված 29.1. Հարկային պարտավորությունների գծով գումարների վճարումը սահմանված ժամկետից ուշացնելու դեպքում հարկային մարմինը կամ տեղական ինքնակառավարման մարմինը որոշում է կայացնում հարկ վճարողից ժամանակին չվճարված գումարը գանձելու վերաբերյալ և այդ մասին պատշաճ ծանուցում վերջինիս: Մինչև գումարի գանձման վերաբերյալ որոշման անբողոքարկելի դառնալը պարտավոր անձի գույքի վրա կարող է արգելանք դրվել»: «Մենք այլեւս դատարաններ չենք դիմում, հարկային գանձումներն իրականացնելու ենք միանգամից` հարկադիր կատարմամբ»,- բացատրեց քաղաքապետը:
Վերջինս նաեւ հայտնեց, որ մյուս բոլոր հարկատեսակների գծով առաջին եռամսյակում նախատեսված հավաքագրումները 100%-ից ավելի են, բացառությամբ արտաքին գովազդի վճարումների, որը կազմել է 93,3%-ով: Դա էլ, ըստ քաղաքապետի, պայմանագրային հիմունքներով կատարվող վճարում է եւ թերակատարման որեւէ խնդիր բյուջեի համար չի առաջացնի: Ընդհանուր առմամբ, առաջին եռամսյակի եկամուտների հավաքագրման կատարողականը համայնքում կազմել է 106,1%, ծախսայինը` 80%: «Էնպիսի տպավորություն չստեղծվի, որ մենք ինչ որ ծախսեր ենք ունեցել ու չենք արել: Ուղղակի հարցը կայանում է նրանում, որ ըստ ժամանակացույցի, որոշ հոդվածներով կան նախատեսվածից քիչ կատարված ծախսեր` առանց աշխատանքների ծավալները վնասելու»,- բացատրեց Արտավազդ Վարոսյանը` իր ասածը հիմնավորելով բյուջեի հանրային ծառայությունների մասով:
«ՔԿԱԳ-ի նախատեսված 1 մլն 154 հազար դրամի փոխարեն 2800 դրամ է ծախսվել, քանի որ ՔԿԱԳ-ի եռամսյակի ֆինանսավորումը եռամսյակի ավարտից հետո է լինում, հետեւաբար նրա ծախսային մասը կարտացոլվի արդեն երկրորդ եռամսյակում, առաջին եռամսյակի հետ միասին»: Բյուջեի ծախսային մասի մնացած խնդիրներին Ա. Վարոսյանը չանդրադարձավ, սակայն եկամուտների հավաքագրման միտումը հուսադրող համարեց: Ավագանու անդամ Վարուժան Սիմոնյանը տեղյակ էր, որ սեփական հարկային եկամուտները 100%-ով հավաքագրելու դեպքում կառավարությունը տվյալ համայնքին այլ ծրագրերով աջակցություն է ցուցաբերում: «17 կամ 20 հազարը գումար չէ, եթե ավագանուն էլ ասեիք, մենք կգնայինք ընկերոջը կհամոզեինք, որ հողի հարկը վճարեր, որ մենք այս հարցում խնդիր չունենայինք»,- ասաց նա: Ա. Վարոսյանը փարատեց ավագանու անհանգստությունը` հուսադրելով, որ բյուջեի տարեկան եկամուտների 100% հավաքագրման գործում խնդիրներ չեն ունենա:
«Հետքը» խնդրեց Ա. Վարոսյանի մեկնաբանությունը ֆիզիկական անձանց կողմից հողի հարկ չվճարելու պատճառների առնչությամբ: Քաղաքապետն ասաց, որ դա պայմանավորված է բնակչության սոցիալական խնդիրներով, ինչպես նաեւ` որոշ հարկատուների` քաղաքից բացակայելու հետ: «Էդ առումով նաեւ ոչ պակաս բարդացնող հանգամանք է այն, որ հողի սեփականատեր շատ հանգուցյալ հարկատուների ժառանգները ժառանգություն չեն ընդունել, որպեսզի ստանձնեն իրենց հարկային պարտավորությունը»,- հայտնեց քաղաքապետը:
Հիշեցնենք, որ Ալավերդի համայնքի հողի հարկատուներ են Ակներ եւ Սանահին գյուղական թաղամասերի գյուղացիները: «Մեր սեփականաշնորհած հողը գյուղի դաշտում է, բայց տոչնի չափը չգիտենք` ինչքան է: Ճիշտն ասած` 930 մետր հող ունենք, բայց սեփականության իրավունքի վկայական չունենք: Մեր հողի տարեկան հարկը կազմում է 13,300 դրամ: Ես հիմա չգիտեմ` որքան պարտք ունեմ, բայց ծանուցագիր է եկել, որ տույժն էլ հետը 73 հազար դրամ է: Հետն էլ գրել են, որ մենք գործը առանց Ձեզ էլ կարող ենq տենալ»,- պատմեց գյուղացիներից մի կին, որի` 1996թ. մահացած ամուսինը` Անուշավան Մոսինյանը, դեռեւս հողի սեփականատեր է:
Սանահին գյուղի հանգուցյալ Վլադիմիր Էվոյանի սեփականաշնորհած հողերի ժառանգորդ որդին` Սերգո Էվոյանը, նույնպես չունի հողի սեփականաշնորհման վկայական: «Մի երկու անգամ մուծել եմ հարկը, էլ բան չեն ասել, չեմ մուծել: Համ էլ թող հողերիս տեղը ցույց տան, որ հարկը մուծեմ»,- ասաց նա: Վարդան Էվոյանը նույնպես հողի սեփականանության վկայական չուներ:
Քաղաքապետ Ա. Վարոսյանն ապրիլի 29-ին հայտնեց, որ գյուղական թաղամասերում հողի բազային ճշտումների խնդիրներ կան: Ըստ քաղաքապետի` Սանահինի եւ Ակների գյուղացիները 2014թ. հունվարի 1-ի դրությամբ համայնքի բյուջեին 770 հազար դրամ ապառքներ ունեն: Ու մինչ Ալավերդու քաղաքապետն ու ավագանին ջանքեր չեն խնայում բյուջեի 2014թ. եկամուտների հավաքագրումը 100%-ով ապահովելու գործում, Ակներ գյուղի 51,2 հա եւ Սանահին գյուղի 45,8 հա վարելահողերում գյուղացիները ցանքս չեն կատարում: Գյուղացիներից շատերը դրանք օգտագործում են որպես խոտհարք:
Մեկնաբանել