Ֆրանսիացի փաստաբան Մարի Լոռ Դոզենը  դատարանում պաշտպանում է Վարդան Պետրոսյանի շահերը: «Հետքի» զրույցը փաստաբանի հետ Վարդան Պետրոսյանի գործի, ֆրանսիական ու հայկական արդարադատության, օրենսդրության նմանությունների ու տարբերությունների մասին է:

-Դատավարության ժամանակ ասացիք, որ հայկական ու ֆրանսիական օրենսդրությունը՝ խափանման միջոցների չափորոշիչների առումով նույնն է: Կմանրամասնե՞ք:

-Մարդուն ազատությունից զրկել՝ կալանավորել կամ երկարացնել կալանքը, կարելի է միայն հստակ չափորոշիչների առկայության դեպքում, միայն բացառիկ դեպքերում: Դրանք են՝ տուժողների վրա ճնշում գործադրելու, կրկնահանցագործության, նախաքննությունից ու դատաքննությունից խուսափելու և փախուստի ռիսկերը: Հայաստանում էլ, մեզ մոտ էլ այս չափորոշիչները նույնն են:

-Ֆրանսիական օրենսդրությունում նույնպես կալանքի այլընտրանքը գրա՞վն է:

-Այո՛, երաշխիքի ու գումարի դիմաց, մարդը չի կալանավորվում: Գրավը մեզ մոտ հաճախ կիրառվող խափանման միջոց է:

-Հետևելով Վարդան Պետրոսյանի գործին՝ ի՞նչ կարծիք ունեք նախաքննության ու դատավարության մասին:

-Կալանքի կիրառման օրենսդրական չափորոշիչներից ելնելով՝ Վարդան Պետրոսյանի կալանավորումը միանշանակ անօրիանական է: Նա ալկոհոլ օգտագործած չի եղել: Դա հաստատվել է արձանագրությամբ: Նա չի գերազանցել թույլատրելի արագությունը, հեռախոսով չի խոսել, ուրեմն նա մեղավոր չէ: Եվ արդեն 2 ամիս է՝ դատավորը չի ասում, թե ինչու է իմ պաշտպանյալը շարունակում կալանքի տակ մնալ, որովհետև ինքն էլ չգիտի հիմքը: Այդ հիմքը պարզապես չկա: Ընդհանուր հաշվով, Վարդանն արդեն 6 ամիս է՝ անազատության մեջ է: Եթե Դուք ինձ ասեք, որ նրան կալանքի տակ են պահում, որովհետև երկու զոհ կա, ես էլ կասեմ, որ դա այլևս ժողովրդավարություն չէ, դա արդարադատություն չէ, սա ավելի շուտ վրեժխնդրություն է: Մադա՛մ, հարցը նրանում չէ, որ կա երկու զոհ, որ քրեական գործ է հարուցվել: Դժբախտ պատահար է, որը կարող է և որևէ անձի մեղավորությամբ չլինել: Սա ուղղակի դրամա է, իսկ դրաման ոճրագործություն չէ: Դրամայում մեղավորներ փնտրելը ճիշտ չէ:

-Այսինքն՝ կարծո՞ւմ եք, որ արդարացման դատավճիռ պիտի լինի:

-Նախ Վարդան Պետրոսյանին պիտի առհասարակ չկալանավորեին, քանի որ դրա հիմքերը, կրկնում եմ, բացակայում էին և հիմա էլ չկան: Նախաքննության ձեռք բերած նյութերը արդեն բավարար էին, որ կալանքը որպես խափանման միջոց չկիրառվեր: Ինքն արդեն անմեղ է, Դուք չե՞ք տեսնում, որ այդպես է:

-Ֆրանսիայում ի՞նչ արձագանք է գտել Վարդան Պետրոսյանի գործը:

-Ֆրանսիայում մամուլում, ազգային հեռուստատեսությամբ ու ռադիոյով մեկնաբանվում է Վարդան Պետրոսյանի գործը, քանի որ նա հանրային դեմք է: Ազդեցիկ պարբերականներում ու ամսագրերում տասնյակ հրապարակումներ են տպագրվել այս գործի մասին:

-Ճանապարհատրանսպորտային պատահարների գործերով դատավարությունների մասնակցելու փորձ ունե՞ք:

-Այո՛, Ֆրանսիայում էլ, Հայաստանում էլ ամեն օր նման դատեր են լինում: Բայց այն, ինչ տեսնում եմ այստեղ... զոհերի հիշատակը հարգել է պետք, բայց դա արդարադատության հետ կապել, սխալ է:

-Հայկական դատավարությունը նմա՞ն է նրան, ինչ ամեն օր տեսնում եք ֆրանսիական դատարաններում:

-Ո՛չ, սա, կարծես, լրատվության համար կրկես լինի: Այստեղ արդարադատությունը դիտվում է որպես բեմադրություն: Ֆրանսիայում հարգում են արդարադատությունը, այստեղ կեղտոտում են այն: Իմ տպավորությունն այդպիսին է:

Փաստաբան Մարի Լոռ Դոզեն 15 տարի Ֆրանսիայում զբաղվում է քրեական գործերով: Հայաստանում Վարդան Պետրոսյանի ու նրա ընտանիքի հրավերով դատարանում պաշտպանում է Պետրոսյանի շահերը:

Մեր զրույցը թարգմանում էր  Հասմիկ Խաչատրյանը: