Կիպրոսում գրանցված «Four Assist Development Consulting Limited» ընկերությունն արձագանքել է ՀՀ վերահսկիչ պալատի հաշվետվությանը և գրությամբ պահանջել ճշգրտումներ մտցնել դրանում: Ընկերության ցանցային համակարգող Մարիա Տասիուլան նամակում թվարկել է անճշտությունները և նշել, որ դրանք ոտնահարում են «Four Assist Development Consulting Limited» ըներության իրավունքները և վնաս պատճառում նրա գործարար համբավին: «Four Assist Development Consulting Limited»-ը ՎՊ-ին ուղղված նամակը տրամադրել է նաև «Հետքին»:  Ընկերության բաժնետեր Իրինա Գրիգորյանին ուղղված մեր հարցերին նույնպես պատասխանել է Մարիա Տասիուլան:  

Հիշեցնենք, որ Կիպրոսում գրանցված այս ընկերությունը 2012-13թթ. 704 հազար (ներառյալ հարկերը) դոլար է ստացել Հայաստանի Հանրապետության կառավարությունից, որպեսզի իրականացնի հաշվապահական հաշվառման իրավական ակտերի նախագծերի և ձեռնարկի ամբողջական փորձարկման ու հաշվապահական հաշվառման ավտոմատացված համակարգի ներդրման աշխատանքներ: Մինչդեռ Վերահսկիչ պալատը գտել է, որ աշխատանքների ողջ ծավալն իրականացրել է «Փի-Էյջ-Փի Փարթնըրզ» ՓԲԸ հայաստանյան ընկերությունը` ենթակապալառուի պայամանագրով, իսկ «մրցույթով հետաքրքրված տեղական ընկերությունը միտումնավոր ստեղծում է որևէ ոչ ռեզիդենտ ընկերություն կամ կապ է հաստատում համանման ընկերության հետ, որ շահեկան դիրք գրավելու արդյունքում կարողանա հաղթող ճանաչվել մրցույթում և կնքել պայմանագիր: Արդյունքում՝ որոշ ոչ ռեզիդենտների մասնակցությունը պետական գնումներին դառնում է զուտ ձևական, գումարները փոխանցվում են Հանրապետությունից դուրս»:

««Four Assist Development Consulting Limited»-ը միջազգային խորհրդատվական ընկերություն է, որը գործում է 2007-ից, այսինքն՝ Հայաստանում այս ծրագրի իրականացումից դեռևս 5 տարի առաջ: Այս փաստարկն է ներկայացնում ընկերության ներկայացուցիչ Մարիա Տասիուլան մեր հարցերին պատասխանելիս:

ՎՊ-ին ուղղված նամակում էլ համակարգողը նշում է, որ ֆինանսների նախարարության պայմանագրի հայտարարությունը պահանջում էր, որ լիդեր ընկերությունը հանրային հատվածի հաշվապահության միջազգային փորձ ունենա, իսկ «Four Assist Development Consulting Limited»-ը տիրապետում է այդ փորձին՝ ի տարբերություն «Փի-Էյջ-Փի Փարթնըրզ» ՓԲԸ -ի, որի փորձը սահմանափակվում է միայն Հայաստանով: Հետևաբար, աշխատանքների բաշխումով «Four Assist Development Consulting Limited»-ը լիդեր ընկերությունն էր, իսկ «Փի-Էյջ-Փի Փարթնըրզ» ՓԲԸ -ին հանձնարարվել էր աշխատանքների նրանց բաժինը՝ ելնելով հայաստանյան առանձնահատկությունների իրենց գիտելիքներից:

«Հարկ է նշել, որ «Four Assist Development Consulting Limited» ընկերությունը, ի թիվս այլ ծառայությունների, տրամադրել է միջազգային որակավորում ունեցող երկու հաշվապահ (ներառյալ ծրագրի ղեկավարը)՝ ծրագրի իրականացման, որակի վերահսկողության և մի շարք այլ աջակցության ծառայությունների համար»,- գրել է «Four Assist Development Consulting Limited»-ի ներկայացուցիչը: Վերջինս նշել է նաեւ, որ «Փի-Էյջ-Փի Փարթնըրզ»-ը չուներ ֆինանսների նախարարության մի շարք պահանջներին համապատասխան տեխնիկական կարողություններ և միջազգային փորձ՝ այդ ծառայությունները մատուցելու համար:

Մարիա Տասիուլան «Հետքին» պատասխանելիս նշել է, որ «Four Assist Development Consulting Limited»-ի ֆինանսական առաջարկն այս ծրագրի համար գրեթե կես գինն էր՝ երկրորդ լավագույն առաջարկի համեմատությամբ, որով ծրագրի իրականացման համար պահանջվում էր 925 հազար դոլար: 

Հարցին, թե ինչու են ծրագրեր իրականացնում Կիպրոսում, այլ ոչ թե ՀՀ-ում գրանցված ընկերությամբ, «Four Assist Development Consulting Limited»-ի ներկայացուցիչը պատասխանել է, որ իրենց բիզնես շահերը գնում են ավելի հեռու, քան Հայաստանն է: Ներկայումս ընկերության ուշադրության կենտրոնում Աֆրիկան է, Ասիան և Արևելյան Եվրոպան, որտեղ, ըստ նրա, հեռանկար կա: «Մենք երբևէ չենք մտածել Հայաստանում մասնաճյուղ բացելու մասին, քանզի բիզնեսի շրջանակն այնտեղ սահմանափակ է»,- ամփոփում է ընկերության համակարգողը:

Մեր հարցին, թե ինչ առնչություն ունեն Կիպրոսում գրանցված ընկերության հայ բաժնետերերը ՀՀ պաշտոնյաների հետ, որի մասին գրվել է հայկական մամուլում, Մարիա Տասիուլան պատասխանել է. «Իրենց միջազգային պրոֆեսիոնալ գործունեության ընթացքում մեր գործընկերները աշխատել են նաև Հայաստանում բազում միջազգային հաջողված ծրագրերի միջոցով: Մեր գործընկերներից որևէ մեկը որևէ առնչություն չունի Հայաստանի պաշտոնատար անձանց հետ` բացի մասնագիտական առնչությունից: Հարկավոր է հստակեցնել, որ մեր գործընկերներից ոչ մեկը երբևէ չի աշխատել որևէ նախարարությունում՝ որպես պետական ծառայող, փոխարենը, ինչպես վերևում նշվեց, նրանք եղել են Հայաստանի կառավարության խորհրդատուներ՝ միջազգային ծրագրերի միջոցով»: 

Կիպրոսյան ընկերության ղեկավարներին Վերահսկիչ պալատի «բացահայտումները» մտահոգել են: Բացի դրանից՝ նրանց անհանգստացրել է մեր հրապարակման այն մասը, որտեղ նշել ենք, որ «Four Assist Development Consulting Limited»-ը Իշխան Զաքարյանի բացահայտումներին որևէ պարզաբանում չի տվել:

«Մեզ երբևէ չի ասվել պարզաբանումներ տալ ո́չ աուդիտի և ո́չ էլ ՎՊ-ի հաշվետվության հրապարակումից հետո: Մենք ինքներս ենք իմացել այս ամենի մասին հայկական մամուլից և մայիսի 21-ին նամակ ենք գրել Վերահսկիչ պալատին՝ նշելով բոլոր սխալ հայտարարությունները և խնդրել ենք վերանայել համապատասխան մասերը: Մենք մինչ օրս որևէ պատասխան չենք ստացել»,- գրել է Մարիա Տասիուլան:

«Four Assist Development Consulting Limited»-ը անպատասխան է թողել մեր հարցի այն մասը, թե Հայաստանում իրականացրած յուրաքանչյուր ծրագրի համար որքան ֆինանսավորում է ստացել, միայն նշել է, որ «Four Assist Development Consulting Limited»-ը սահմանափակ գործունեւություն է ծավալում Հայաստանում` համեմատած աշխարհի մյուս երկրների: Իսկ ծրագրերի իրականացումը նրանց ընձեռվել է մրցույթի միջոցով՝ մի շարք տեխնիկական և ֆինանսական չափանիշների համապատասխան մրցունակ տենդերներին մասնակցելու միջազգային դոնորների կանոններին և ընթացակարգերին համահունչ: