Ամբաստանյալների հարազատներից շատերը չկարողացան մտնել դահլիճ

Այսօր Շանթ Հարությունյանի և 12 այլ քաղաքացիների գործով առաջին դատական նիստն էր Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում: Նրանք մեղադրվում են անցյալ տարվա նոյեմբերի 5-ին Մաշտոցի պողոտայում տեղի ունեցած միջադեպի ժամանակ խուլիգանական գործողություններ կատարելու մեջ եւ 7 ամիս գտնվում են անազատության մեջ: Ձերբակալվածները սկզբում 14-ն էին, սակայն նրանցից Միսակ Միսակ Առաքելյանի խափանման միջոցը այս տարվա ապրիլի 1-ին փոխարինվեց ստորագրությամբ` չհեռանալու մասին:   

Դատարանի շենքի դիմաց երկաթյա ուղեփակոցներ էին տեղադրված, որոնց մի կողմում կանգնած էին ոստիկաններ ու դատական կարգադրիչներ, իսկ մյուսում` 14 ամբաստանյալների հարազատները, իրավապաշտպաններ, քաղաքացիներ, ակտիվիստներ` պաստառներով, Շանթ Հարությունյանի, մյուս կալանավորվածների, Վոլոդյա Ավետիսյանի դիմանկարներով, «Բոլորիս ազատությունը սկսվում է քաղբանտարկյալների ազատությունից» պաստառով ու եռագույն դրոշներով: Քաղաքացիներին թույլ չէին տալիս ուղեփակոցներից ներս անցնել: Ամբաստանյալների հարազատներից շատերը չկարողացան այդպես էլ ներկա գտնվել նիստին:   

Իրավապաշտպան Ավետիք Իշխանյանը «Հետքի» հետ զրույցում ասաց, որ երկար ժամանակ է` դատարանի դիմաց է, սակայն այդպես էլ չի կարողանում մասնակցել նիստին:

Կարգադրիչները պատճառաբանում էին, թե դահլիճում տեղ չկա

Կարգադրիչները «Հետքի» թղթակցին ևս մոտ 10 րոպե թույլ չէին տալիս անցնել ու ներկա գտնվել նիստին` պատճառաբանելով, որ դահլիճում տեղ չկա: Այնուհետև 3 լրագրողի թույլատրեցին մտնել նիստերի դահլիճ, որտեղ ֆոտոխցիկով ու տեսախցիկով արձանագրեցինք, որ նիստերի դահլիճը կիսադատարկ է` ամեն կողմից 3-4 շարք ազատ նստարաններ կային, որտեղ մեն-մենակ կանգնած էր Րաֆֆի Հովհաննիսյանը:

«Հետքն» այս հարցով դիմեց ՀՀ դատական դեպարտամենտի միջազգային համագործակցության և հասարակայնության հետ կապերի ծառայության պետ Արսեն Բաբայանին, ով քիչ անց եկավ դատարան: Տեսնելով իրավիճակը` նա նշեց, որ եթե բոլոր լրագրողները նստեն (նրանք կանգնած էին), տեղ չի մնա դահլիճում:

Նշենք, որ լրագրողները ևս չէին կարողանում աշխատել դահլիճում կարգադրիչների ու ոստիկանների մեծ թվի պատճառով: 

«Սա քաղաքական հարց է, փաստաբաններն ի՞նչ պիտի անեն»

Դատավոր Մնացական Մարտիրոսյանը հայտնեց, որ դատարան չեն ներկայացել ամբաստանյալների մի մասի պաշտպանները` հայտնելով, որ աշխատանքային ծանրաբեռնվածություն ունեն, ամբաստանյալներից մեկի պաշտպանն էլ գտնվում էարձակուրդում, մյուսինն էլ փաստաբանի հետ կնքած պայմանագրի ժամկետն էր ավարտվել:

Շանթ Հարությունյանն առաջարկեց հրաժարվել փաստաբաններից. «Սա քաղաքական հարց է, իրավունքի հարց չի, փաստաբաններն ի՞նչ պիտի անեն: Հայաստանում արդարադատություն չկա, եթե լիներ, ինչի էի հեղափոխություն սկսում, կսպասեի 2018-ի ընտրություններին»:

Հարազատներից մի քանիսին հաջողվել էր մտնել դահլիճ

Պահեստազորի մայոր Արմեն Հովհաննիսյանի կինը` Շողեր Հակոբյանը, կարողացել էր մտնել դահլիճ: Նա դիմեց դատարանին` ասելով, որ տղաների հարազատներին, քաղաքացիներին թույլ չեն տալիս մոտենալ շենքին, մտնել դահլիճ. «Դռնբաց դատական նիստ է, իսկ մարդիկ դրսում են: Ո՞րն է խնդիրը»:

«Հետքի» հետ զրույցում Շողերը հայտնեց, որ ֆիզիկական ու հոգեկան ցավ են իրեն պատճառել ոստիկաններն ու կարգադրիչները` չթողնելով մտնել դահլիճ. «Ստորացուցիչ է, երբ քո պետության ներսում այսպես են վարվում քաղաքացու հետ: Ի՞նչ իրավունքով, չէ՞ որ սնվում են քաղաքացիների հարկերից»,- ասաց Շողերը:

Ազատամարտիկ Վահե Մկրտչյանի կինը` Մարգարիտա Ստեփանյանը, ասաց, որ Վահեի 80-ամյա հորաքույրը մնացել է դրսում, նրան ևս թույլ չեն տվել մտնել դատարանի շենք:

Նոր փաստաբաններ ներգրավելու նպատակով դատական նիստը հետաձգվեց մինչև հունիսի 25-ը: Նիստի հետաձգումից հետո դատարանում լարված իրավիճակ էր. ամբաստանյալների հարազատները, քաղաքացիները երկար ժամանակ չէին հեռանում:

Հանրային խորհրդի անդամ Հայկ Հարությունյանի մայրը` Լաուրա Պետրոսյանը, դժգոհություն հայտնեց. «Ինչո՞ւ եք նիստը հետաձգում, քի՞չ եք պահել բանտում, ամեն օրն էլ իրենց համար նշանակություն ունի, իսկ դուք 10 օրից ավել հետաձգում եք, նախօրոք կազմակերպեիք փաստաբանների հարցերը»:  

Այնուհետև քաղաքացիները երթով շարժվեցին դեպի Նախախորհրդարանի գրասենյակ` «Հայաստանն առանց քաղբանտարկյալների», «Ազատություն» բղավելով: